নতুন দিল্লী, ২৮ জুন (হি.স.)। ভাৰতৰ তাৰকা শ্বাটলাৰ তথা বিশ্বৰ প্ৰাক্তন এক নম্বৰ কিদাম্বী শ্ৰীকান্তই ইউ এছ অ’পেন বেডমিণ্টন ২০২৬ৰ পুৰুষৰ একক ফাইনেলত তাৰকা প্ৰদৰ্শনেৰে প্ৰৱেশ কৰিছে। ছেমি ফাইনেলত ৩৩ বছৰীয়া শ্ৰীকান্তে চতুৰ্থ বাচনিৰ জাপানৰ য়ুদাই অকিমোটোক ২২-২০, ১৫-২১, ২১-১৯ ব্য়ৱধানত পৰাস্ত কৰে।

প্ৰথমখন খেলত শ্ৰীকান্তই শক্তিশালী আৰম্ভণি কৰিছিল যদিও অকিমোটোৱে প্ৰতিশোধ লয়, গেম পইণ্ট লাভ কৰে। অৱশ্যে ভাৰতীয় খেলুৱৈগৰাকীয়ে স্থিৰ হৈ থাকি প্ৰথমখন খেলত ২২-২০ ব্য়ৱধানত জয়লাভ কৰে।

দ্বিতীয়খন খেলত অকিমোটোৱে আক্ৰমণাত্মকভাৱে খেলি ২১-১৫ ব্য়ৱধানত জয়লাভ কৰি মেচখন নিৰ্ণায়ক তৃতীয়খন খেললৈ লৈ যায়।

নিৰ্ণায়ক খেলখনত শ্ৰীকান্তেও আগতীয়াকৈ অগ্ৰগতি লাভ কৰিছিল যদিও অকিমোটোৱে প্ৰত্যাহ্বান অব্যাহত ৰাখিছিল। ইয়াৰ পিছত ভাৰতীয় খেলুৱৈগৰাকীয়ে একেৰাহে ৬ পইণ্ট লাভ কৰি মেচখনত নিজৰ দখল সুদৃঢ় কৰে। শেষত নিজৰ অভিজ্ঞতাক নিজৰ সুবিধাৰ বাবে ব্যৱহাৰ কৰি শ্ৰীকান্তে খেলখন আৰু মেচখন ২১-১৯ ব্য়ৱধানত জয়লাভ কৰে।

এতিয়া ফাইনেলত শ্ৰীকান্তৰ মুখামুখি হ’ব চাইনিজ টাইপেইৰ ছু লি ইয়াঙ। দ্বিতীয়খন ছেমিফাইনেলত ভাৰতৰ যুৱ শ্বাটলাৰ ৰাউনাক চৌহানক পোনপটীয়াকৈ ২১-১৭, ২১-১৯ ব্য়ৱধানত পৰাস্ত কৰি ইয়াঙে ফাইনেলত প্ৰৱেশ কৰে।

গোটেই প্ৰতিযোগিতাখনত ৰৌনাক চৌহানে আকৰ্ষণীয় প্ৰদৰ্শন আগবঢ়াইছিল। কোৱাৰ্টাৰ ফাইনেলত ইজৰাইলৰ মিছা জিলবাৰমেনক ২৩-২১, ২১-১১ ব্য়ৱধানত পৰাস্ত কৰি ছেমিফাইনেলত প্ৰৱেশ কৰে।

মহিলা একক শাখাত ডেনমাৰ্কৰ লাইন ক্রিষ্টোফাৰচেনৰ বিৰুদ্ধে প্রথমখন খেলত ২১-১৫ ব্য়ৱধানত জয়লাভ কৰি ভাৰতৰ দেৱীকা সিহাগে শক্তিশালী আৰম্ভণি কৰে৷ অৱশ্যে ক্রিষ্টোফাৰচেনে শক্তিশালী প্রত্যাৱর্তন ঘটাই পৰৱৰ্তী দুখন খেলত ২১-১১ আৰু ২১-১৫ গ’লত জয়লাভ কৰি ফাইনেলত প্ৰৱেশ কৰে। এই পৰাজয়ে দেৱিকাৰ অভিযানৰ অন্ত পেলাইছিল।

ভাৰতীয় ক্ৰীড়া কৰ্তৃপক্ষই শ্ৰীকান্তক ফাইনেলৰ বাবে শুভেচ্ছা জনায়। দেওবাৰে ছ’চিয়েল মিডিয়াত কৰ্তৃপক্ষই পোষ্ট কৰি কয় যে কিদাম্বী শ্ৰীকান্তই ইউ এছ অ’পেন ছুপাৰ ৩০০ৰ পুৰুষৰ একক ফাইনেলত প্ৰৱেশ কৰিছে । ছেমি ফাইনেলত তেওঁ শান্ত আৰু সংযত খেলেৰে নিজৰ ধাৰা প্ৰমাণ কৰিলে। ফাইনেলৰ বাবে শুভেচ্ছা, শ্ৰীকান্ত।

-----------

হিন্দুস্থান সমাচাৰ / অৰৱিন্দ