গোলাঘাট, ২৬ জুন (হি.স.)। ৰাজ্যৰ হস্ততাঁত বস্ত্ৰশিল্প বিভাগৰ নৱনিযুক্ত মন্ত্ৰী বিশ্বজিৎ দৈমাৰীৰ বৃহৎ ঘোষণা । শীঘ্ৰেই বন্ধ হ'ব বৰ্হিৰাজ্যৰ আমদানীকৃত গামোচা আৰু অন্যান্য বস্ত্ৰ । হস্ততাঁত বস্ত্ৰশিল্প বিভাগে বিশেষ কৌশল অৱলম্বন কৰি বন্ধ কৰিব পাৱাৰলুমৰ বস্ত্ৰ ৷ বোকাখাতৰ পানবাৰীত নিৰ্মিয়মান কাজিৰঙা সংহত হস্ততাঁত উদ্যান পৰিদৰ্শন কৰি মন্ত্ৰী বিশ্বজিৎ দৈমাৰীৰ এই ঘোষণা ।
ৰাজ্যৰ বয়ন শিল্পৰে জড়িত শিপিনী সকলক সকাহ দিয়াৰ উদেশ্যেৰে ৰাজ্য চৰকাৰৰ কেবিনেটে এই সন্দৰ্ভত পৰামৰ্শ দিছে হস্ততাঁত বস্ত্ৰশিল্প বিভাগক । এই ক্ষেত্ৰত কম দিনৰ ভিতৰতে বিভাগটোৱে জাৰি কৰিব অধিসূচনা । বোকাখাতৰ পানবাৰী সংহত হস্ততাঁত বস্ত্ৰশিল্প উদ্যানৰ কাম কাজ পৰিদৰ্শন কৰি মন্ত্ৰী দৈমাৰীয়ে কয় এই উদ্যানত উপলৱদ্ধ হ'ব অসমৰ বয়নশিল্পৰ সকলো সা-সামগ্ৰী আৰু অসমীয়া থলুৱা খাদ্য সম্ভাৰ । ইয়াৰ জড়িয়তে কাজিৰঙা ভ্ৰমণলৈ অহা দেশী-বিদেশী পৰ্যটকক আকৰ্ষণ কৰাৰ লক্ষ্য বিভাগটোৰ । তাৰোপৰি নৈশ যাপনৰো ব্যৱস্থা থাকিব প্ৰকল্পটোত ৷ প্ৰকল্পটো ২০২৭ চনৰ ভিতৰত সম্পূৰ্ণ হ'ব বুলি জানিবলৈ দিয়ে ৷ প্ৰকল্প পৰিদৰ্শনৰ পিছতে মন্ত্ৰীগৰাকীয়ে পানবাৰীৰ কাষৰীয়া পানবাৰী গাঁৱৰ মহিলা আত্মসহায়ক গোটৰ এটি তাঁতশাল কেন্দ্ৰ পৰিদৰ্শন কৰে ৷ সেইসকল মহিলাক উন্নত মানৰ তাঁতশাল যোগান ধৰি স্বাৱলম্বী হোৱাৰ পথ বাচি দিব বুলি দানিবলৈ দিয়ে ৷
হিন্দুস্থান সমাচাৰ / প্ৰকাশ ডেকা
