ঢাকা, ২৬ জুন (হি.স.)। ক্ষমতাচ্যুত বাংলাদেশৰ প্ৰধানমন্ত্ৰী শ্বেখ হাছিনাৰ দল আৱামি লীগৰ তিনিজন কৰ্মীৰ মৃত্যুক লৈ গুৰুতৰ প্ৰশ্ন উত্থাপন হৈছে । এইক্ষেত্ৰত আৰক্ষীৰ ষড়যন্ত্ৰৰ অভিযোগ তুলিছে সংশ্লিষ্ট পৰিয়ালৰ লোকসকলে । তিনিওজনকে হত্যা কৰা হৈছিল। আৰক্ষীৰ কাৰ্যকলাপৰ সৈতে জড়িত পৃথক পৃথক ঘটনাত চাৰি দিনৰ ভিতৰত তেওঁলোকৰ মৃত্যু হোৱা বুলি জানিব পৰা গৈছে। প্ৰতিবাদৰো সূত্ৰপাত হৈছে । উল্লেখযোগ্য যে বাংলাদেশত আৱামী লীগ নিষিদ্ধ।
ঢাকা ট্ৰিবিউন কাকতত প্ৰকাশিত এক বাতৰি অনুসৰি ২১ জুনৰ পৰা ২৫ জুনৰ ভিতৰত বৰিছাল, ফৰিদপুৰ আৰু চট্টগ্ৰামত এই ঘটনা সংঘটিত হৈছে । ইয়াৰ ভিতৰত আছে ৱাৰ্ড পৰ্যায়ৰ আৱামি লীগৰ নেতা, ছাত্ৰ লীগৰ কৰ্মী আৰু জুবো লীগৰ নেতা। প্ৰতিটো গোচৰতে কৰ্তৃপক্ষই বিভিন্ন উদ্দেশ্যৰ উল্লেখ কৰিছে যদিও পৰিয়াল আৰু ৰাজনৈতিক সমৰ্থকসকলে এই মৃত্যুৰ পৰিস্থিতিক লৈ প্ৰশ্ন উত্থাপন কৰিছে। শেহতীয়া ঘটনাটো বুধবাৰে সংঘটিত হয়। চট্টগাঁৱৰ সাটকনিয়া উপজিলাত ধেমশা ইউনিয়ন জুবো লীগৰ যুটীয়া আহ্বায়ক নুৰুল আলমৰ মৃত্যু হোৱা খবৰ আহিছে। বিস্ফোৰক গোচৰত কাৰাগাৰত ভৰ্তি হোৱাৰ এদিন নৌহওঁতেই তেওঁক চট্টগং কেন্দ্ৰীয় কাৰাগাৰৰ পৰা চিটাগং মেডিকেল কলেজ হাস্পতাললৈ লৈ যোৱা হয়।
কাৰাগাৰৰ বিষয়াসকলে জনোৱা মতে, বুধবাৰে পুৱা নুৰুলে অসুস্থ অনুভৱ কৰাৰ অভিযোগ উত্থাপন কৰে। প্ৰথমে কাৰাগাৰৰ চিকিৎসালয়ত চিকিৎসাধীন হৈ থকাৰ পিছত চিটাগং মেডিকেল কলেজ হাস্পতাললৈ প্ৰেৰণ কৰা হয় আৰু তাৰ পিছতে তেওঁৰ মৃত্যু হয়। কাৰাগাৰৰ বিষয়াসকলৰ মতে, তেওঁৰ মৃত্যুৰ প্ৰমাণপত্ৰত মৃত্যুৰ কাৰণ শ্বাস-প্ৰশ্বাসজনিত সমস্যা বুলি উল্লেখ কৰা হৈছে। তেওঁৰ পৰিয়ালে আনুষ্ঠানিক ব্যাখ্যা নাকচ কৰি অভিযোগ কৰে যে মঙলবাৰে ডিটেক্টিভ ব্ৰাঞ্চ আৰক্ষীয়ে গ্ৰেপ্তাৰ কৰাৰ পিছত তেওঁক “ষড়যন্ত্ৰৰ অংশ হিচাপে হত্যা কৰা হৈছে”।
ফৰিদপুৰৰ মধুখালীৰ ছাত্ৰ লীগৰ কৰ্মী মিৰ্জা ইষ্টিয়াক আহমেদৰ মৃত্যুৰ পিছতে এই ঘটনা সংঘটিত হৈছে। দেওবাৰে মৃত্যু হয় মিৰ্জাৰ। পৰিয়ালৰ লোকে জনোৱা মতে, শনিবাৰে বিয়লি জিলা চোৰাংচোৱা শাখাই ইষ্টিয়াকক গ্ৰেপ্তাৰ কৰি মাতৃৰ সন্মুখত প্ৰহাৰ কৰে। পিছদিনা পুৱা ফৰিদপুৰ চিকিৎসা মহাবিদ্যালয় হাস্পতালত তেওঁৰ মৃত্যু হয়। তেওঁৰ মৃত্যুৰ কাৰণ এতিয়াও প্ৰকাশ কৰা নাই আৰক্ষীয়ে। এই ঘটনাক লৈ মধুখালীত প্ৰতিবাদৰ সৃষ্টি হয়। স্থানীয় ৰাইজে পৰিয়ালৰ অনুৰোধত অৱৰোধ উঠাই লোৱাৰ পূৰ্বে প্ৰায় ৪০ মিনিট ধৰি ঢাকা-খুলনা ঘাইপথ অৱৰোধ কৰে।
এই ঘটনাৰ পিছতে মঙলবাৰে ফৰিদপুৰ ডি বি সদৰ মণ্ডলৰ ভাৰপ্ৰাপ্ত বিষয়া চৈয়দ মহম্মদ আলমগীৰ হোছেইনক আঁতৰাই আৰক্ষী লাইনলৈ প্ৰেৰণ কৰা হয়। বিষয়াসকলে “প্ৰশাসনিক কাৰণ” উল্লেখ কৰে। এই তিনিটা ঘটনাৰ ভিতৰত প্ৰথমটো ঘটনা দেওবাৰে বৰিশালত সংঘটিত হয়, য’ত ৱাৰ্ড নং ১ আৱামী লীগৰ সাধাৰণ সম্পাদক ৰছিদ খান মেননৰ মৃত্যু হয়। অভিযোগ অনুসৰি আৰক্ষীৰ অভিযানত গ্ৰেপ্তাৰৰ পৰা হাত সাৰিবলৈ চেষ্টা কৰিও তেওঁৰ মৃত্যু হয়। প্ৰত্যক্ষদৰ্শীয়ে জনোৱা মতে, ৰছিদে ছাদৰ মাজেৰে পলাবলৈ চেষ্টা কৰি থকা অৱস্থাত পিছলি পৰি মূৰত খুন্দা মাৰি পৰি পৰে। পিছত স্থানীয় চিকিৎসালয়ত তেওঁক মৃত ঘোষণা কৰা হয়। এই তিনিটা ঘটনাৰ কোনো এটাৰ স্বতন্ত্ৰ তদন্ত এতিয়াও ঘোষণা কৰা হোৱা নাই।
-----------------
হিন্দুস্থান সমাচাৰ / অৰৱিন্দ
