নতুন দিল্লী, ২৬ জুন (হি.স.)। কেন্দ্ৰীয় মহিলা আৰু শিশু উন্নয়ন মন্ত্ৰী অন্নপূৰ্ণা দেৱীয়ে শুকুৰবাৰে কিৰ্গিজ ৰিপাব্লিকৰ ৰাজধানী বিষকেকত অনুষ্ঠিত হোৱা চাংহাই সহযোগিতা সংস্থাৰ মহিলা মঞ্চ ২০২৬ত ভিডিঅ’ বাৰ্তাৰ জৰিয়তে ভাষণ দিয়ে। এছ চি অ’ৰ পাৰস্পৰিক সন্মান, সমতা, আৰু সহমতৰ মূল নীতিসমূহৰ প্ৰতি ভাৰতৰ অটল দায়বদ্ধতাক পুনৰ উল্লেখ কৰি মহিলা সবলীকৰণক সৰ্বাংগীন আৰু বহনক্ষম উন্নয়নৰ মূল শিলাস্তম্ভ বুলি অভিহিত কৰে।
অৰ্থনৈতিক উন্নয়নত মহিলাৰ ভূমিকা শীৰ্ষক অধিবেশনত ভাষণ দি অন্নপূৰ্ণা দেৱীয়ে কয় যে নাৰী কেৱল উন্নয়নৰ হিতাধিকাৰী নহয়, বৰঞ্চ উন্নয়ন আৰু সামাজিক পৰিৱৰ্তনৰ আটাইতকৈ ডাঙৰ চালিকা শক্তি। তেওঁ কয় যে ভাৰতৰ উন্নয়নৰ আৰ্হিটোৱে মহিলাক কেন্দ্ৰ কৰি আগবাঢ়িছে, আৰু চৰকাৰে তেওঁলোকক অৰ্থনৈতিক, সামাজিক, আৰু ৰাজনৈতিকভাৱে সবলীকৰণৰ বাবে অহৰহ চেষ্টা কৰি আছে।
তেওঁ উল্লেখ কৰে যে ২০৪৭ চনৰ ভিতৰত এখন উন্নত ভাৰত গঢ়ি তোলাৰ লক্ষ্যত উপনীত হ'বলৈ মহিলা নেতৃত্বাধীন উন্নয়ন ভাৰতৰ মূল উন্নয়নৰ ধাৰণা। এই দৃষ্টিভংগীৰ লগত সংগতি ৰাখি চৰকাৰে মহিলা সবলীকৰণ, উদ্যোগীকৰণক প্ৰসাৰিত কৰা, আৰু সিদ্ধান্ত গ্ৰহণত তেওঁলোকৰ অংশগ্ৰহণ নিশ্চিত কৰাৰ বাবে কেইবাখনো আঁচনি ফলপ্ৰসূভাৱে ৰূপায়ণ কৰি আছে।
কেন্দ্ৰীয় মন্ত্ৰীগৰাকীয়ে উল্লেখ কৰে যে সমগ্ৰ দেশতে প্ৰায় ১০ কোটি মহিলা ৯০ লাখৰো অধিক আত্মসহায়ক গোটৰ সৈতে জড়িত। এই প্ৰচেষ্টাসমূহৰ ইতিবাচক ফলাফল হৈছে যে ৩ কোটিৰো অধিক মহিলা লাখপতি বাইদেউ হৈ পৰিছে, গ্ৰাম্য অৰ্থনীতি শক্তিশালী কৰিছে আৰু আন মহিলাসকলৰ বাবে প্ৰেৰণাৰ উৎস হিচাপে কাম কৰিছে।
অন্নপূৰ্ণা দেৱীয়ে কয় যে মিছন শক্তি আৰু মিছন পোছান ২.০ৰ দৰে ফ্লেগশ্বিপ আঁচনিসমূহে মহিলাৰ সুৰক্ষা, স্বাস্থ্য, পুষ্টি, যত্ন, আৰু অৰ্থনৈতিক সবলীকৰণৰ ক্ষেত্ৰত গুৰুত্বপূৰ্ণ ভূমিকা পালন কৰি আছে। এই আঁচনিসমূহৰ জৰিয়তে মহিলা আৰু শিশুৰ সামগ্ৰিক বিকাশৰ বাবে ব্যাপক কাম কৰা হৈছে।
তেওঁ কয় যে ভাৰতে মহিলাৰ অৰ্থনৈতিক নেতৃত্ব, উদ্যোগীকৰণ, আৰু সৰ্বাংগীন উন্নয়নৰ প্ৰসাৰৰ ক্ষেত্ৰত নিজৰ অভিজ্ঞতাসমূহ এছ চি অ’ৰ সদস্য দেশসমূহৰ সৈতে ভাগ-বতৰা কৰিবলৈ প্ৰতিশ্ৰুতিবদ্ধ। ভাৰতে মহিলা সৱলীকৰণৰ ক্ষেত্ৰত সহযোগিতা আৰু অধিক শক্তিশালী কৰাৰ লগতে যৌথ প্ৰচেষ্টাৰ জৰিয়তে আঞ্চলিক উন্নয়ন ত্বৰান্বিত কৰাৰ বাবেও কাম কৰি যাব।
ভাষণৰ সামৰণিত কেন্দ্ৰীয় মন্ত্ৰীগৰাকীয়ে কয় যে মহিলাসকলক সুযোগ, সম্পদ, আৰু নেতৃত্ব প্ৰদান নকৰাকৈ সৰ্বাংগীন আৰু বহনক্ষম উন্নয়ন অসম্ভৱ। তেওঁ এছচিঅ’ৰ সদস্য ৰাষ্ট্ৰসমূহক মহিলা সবলীকৰণৰ ক্ষেত্ৰত অংশীদাৰিত্ব আৰু অধিক শক্তিশালী কৰিবলৈ আহ্বান জনাই কয় যে সামূহিক প্ৰচেষ্টাৰ জৰিয়তেহে অধিক সমৃদ্ধিশালী, সৰ্বাংগীন, আৰু ন্যায়সংগত সমাজ গঢ়ি তুলিব পৰা যাব।
হিন্দুস্থান সমাচাৰ / মনোজ কুমাৰ শইকীয়া
