কলকাতা, ২৪ জুন (হি.স.)। কলকাতাৰ তৰাটালা অঞ্চলত বুধবাৰে বিয়লি নিৰ্মাণৰত গুদামৰ চাল হঠাতে ভাঙি পৰে। দুৰ্ঘটনাৰ সময়ত তাত পঞ্চাশৰ পৰা ৬০জন শ্ৰমিক কৰ্মৰত আছিল। ছাদৰ ধ্বংসাৱশেষ আৰু গধুৰ লোহাৰ গঠনৰ তলত আবদ্ধ হৈ পৰাৰ আশংকা কৰা হৈছে কেইবাজনো শ্ৰমিক। এই পৰ্যন্ত ৬ৰ পৰা সাতজন শ্ৰমিকক উদ্ধাৰ কৰাৰ বিপৰীতে উদ্ধাৰ অভিযান অব্যাহত আছে।

এই তথ্য লাভ কৰাৰ লগে লগে আৰক্ষী, অগ্নিনিৰ্বাপক বাহিনী, দুৰ্যোগ সাহায্য দল আৰু সেনা জোৱান উপস্থিত হয়। উদ্ধাৰকাৰী দলে গেছ কাটাৰেৰে লোহাৰ বীম কাটি ধ্বংসাৱশেষৰ তলত আবদ্ধ হৈ থকা শ্ৰমিকসকলৰ ওচৰলৈ যাবলৈ চেষ্টা চলাইছে। এই স্থানত এখন ক্ৰেনো স্থাপন কৰা হৈছে, যাৰ সহায়ত গধুৰ ধ্বংসাৱশেষ আঁতৰোৱা হৈছে।

ৰাইজৰ মতে, ঢালাই কাম চলি থকাৰ সময়তে নিৰ্মাণৰত গুদামৰ এটা অংশ ভাঙি যায়। ধ্বংসাৱশেষৰ তলত আৱদ্ধ হৈ পৰা একাংশ শ্ৰমিকৰ মাত শুনা যায় বুলিও দাবী কৰা হৈছে। স্থানীয় বাসিন্দাসকলে প্ৰথমে নিজাববীয়াকৈ উদ্ধাৰ অভিযান আৰম্ভ কৰিছিল, তাৰ পিছত প্ৰশাসনিক দল।

স্থানত কেইবাখনো এম্বুলেন্স মোতায়েন কৰা হৈছে। উদ্ধাৰ হোৱা আহত শ্ৰমিকক ততাতৈয়াকৈ ওচৰৰ চিকিৎসালয়লৈ লৈ যোৱা হৈছে। আহত একাংশৰ অৱস্থা সংকটজনক বুলি জানিব পৰা গৈছে। আনুষ্ঠানিকভাৱে কোনো লোকৰ মৃত্যু নিশ্চিত হোৱা নাই যদিও ধ্বংসাৱশেষৰ তলত কেইবাজনো লোক আবদ্ধ হৈ থকাৰ বাবে আৰু অধিক হতাহতিৰ সম্ভাৱনা অব্যাহত আছে।

দুৰ্ঘটনাটোৰ তথ্য লাভ কৰাৰ লগে লগে ভাৰতীয় জনতা পাৰ্টিৰ নেতা ৰাকেশ সিংও ঘটনাস্থলীত উপস্থিত হয়। দুৰ্ঘটনাটোৰ কাৰণ সন্দৰ্ভত তদন্ত আৰম্ভ কৰা হৈছে। নিৰ্মাণৰ সময়ত শ্ৰমিকসকলৰ বাবে পৰ্যাপ্ত সুৰক্ষা ব্যৱস্থা গ্ৰহণ কৰা হৈছিল নে নাই সেয়াও নিৰ্ণয় কৰা হৈছে। স্থানীয় ৰাইজে আশংকা কৰিছে যে মঙলবাৰে হোৱা ধাৰাসাৰ বৰষুণে হয়তো নিৰ্মাণৰত গাঁথনিটো দুৰ্বল কৰি তুলিছিল ।

--------------

হিন্দুস্থান সমাচাৰ / অৰৱিন্দ