কামৰূপ, ২৪ জুন (হি.স.): সম্প্ৰতি ভূত বাংলোত পৰিণত হৈছে কামৰূপ জিলাৰ হেকৰাস্থ লোকনিৰ্মাণ বিভাগৰ ডাক বাংলো। কামৰূপ জিলাৰ হেকৰাস্থ লোকনিৰ্মাণ বিভাগৰ ডাক বাংলোৰ গৃহসমূহ দীৰ্ঘদিন ধৰি মেৰামতি নকৰাৰ বাবেই আজি জহি-খহি বিধ্বস্ত হৈ পৰিছে ।

স্থানীয় লোক আৰু দল সংগঠনে গৃহসমূহ মেৰামতি অথবা পুনঃনিৰ্মাণৰ বাবে লোকনিৰ্মাণ বিভাগক বাৰম্বাৰ দাবী জনোৱাৰ পাছতো একোৱেই নকৰাৰ অভিযোগ উঠিছে । লোকনিৰ্মাণ বিভাগৰ এনে হেমাহিৰ বাবেই গৃহসমূহ জহি-খহি যোৱাত ক্ষোভ ব্যক্ত কৰিছে একাংশ ৰাইজে। হাবি-জংঘলেৰে আৱৰি ধৰিছে গৃহসমূহ । এইক্ষেত্ৰত শীঘ্ৰে হেকৰা ডাক বাংলোৰ গৃহসমূহ পুনঃনিৰ্মাণ কৰিবলৈ লোকনিৰ্মাণ বিভাগক দাবী জনাইছে ৰাইজে ।

হিন্দুস্থান সমাচাৰ / কিশোৰ মিশ্ৰ