নতুন দিল্লী, ২৪ জুন (হি.স.)। কেন্দ্ৰীয় গৃহ আৰু সমবায় মন্ত্ৰী অমিত শ্বাহে ২৬ জুন শুকুৰবাৰে বিজ্ঞান ভৱনত অনুষ্ঠিত হোৱা নাৰ্কো-কৰ্ডিনেচন চেণ্টাৰৰ দশম শীৰ্ষ পৰ্যায়ৰ বৈঠকৰ সভাপতিত্ব কৰিব। নাৰ্কটিক কণ্ট্ৰল ব্যুৰো (এন চি বি)ৰ উদ্যোগত অনুষ্ঠিত এই বৈঠকত দেশখনক ড্ৰাগছমুক্ত কৰাৰ লক্ষ্যৰ দিশত বিভিন্ন মন্ত্ৰালয়, ৰাজ্য আৰু আইন প্ৰয়োগকাৰী সংস্থাৰ প্ৰচেষ্টাৰ পৰ্যালোচনা কৰা হ’ব।

বুধবাৰে গৃহ মন্ত্ৰালয়ে কয় যে এই বৈঠকত অমিত শ্বাহে ড্ৰাগ নিয়ন্ত্ৰণৰ দৃষ্টিভংগীৰ নথিপত্ৰ (২০২৬-২০২৯) আৰু এনচিবিৰ বাৰ্ষিক প্ৰতিবেদন ২০২৫ প্ৰকাশ কৰিব। বিস্তৃত আলোচনাৰ অন্তত প্ৰস্তুত কৰা এই দৃষ্টিভংগী নথিখনে ড্ৰাগছৰ চাহিদা হ্ৰাস, যোগান নিয়ন্ত্ৰণ, আৰু ড্ৰাগছৰ অপব্যৱহাৰৰ ফলত হোৱা ক্ষতি হ্ৰাস কৰাৰ বাবে অহা তিনি বছৰৰ বাবে এক উমৈহতীয়া ৰোডমেপ দাঙি ধৰিব।

নথিখনত কৃত্ৰিম ড্ৰাগছ, ডাৰ্কনেটৰ জৰিয়তে সৰবৰাহ, যুৱক-যুৱতীসকলক ড্ৰাগছ সেৱনৰ পৰা আঁতৰাই ৰখা, চিকিৎসা আৰু পুনৰ্বাসন কেন্দ্ৰ সম্প্ৰসাৰণ, বিভিন্ন সংস্থাৰ মাজত সমন্বয় উন্নত কৰা আদি বিষয়সমূহৰ ওপৰত বিশেষ গুৰুত্ব আৰোপ কৰা হৈছে। চৰকাৰে কয় যে এই নথিখনে প্ৰধানমন্ত্ৰী নৰেন্দ্ৰ মোদীয়ে “ড্ৰাগছমুক্ত ভাৰত”ৰ প্ৰতিশ্ৰুতি বাস্তৱায়িত কৰাৰ বাবে এক পথ প্ৰদৰ্শক কাঠামো হিচাপে কাম কৰিব।

গৃহমন্ত্ৰীয়ে এই উপলক্ষে অনলাইন ড্ৰাগছ নিষ্কাশন পষেক অভিযানো আৰম্ভ কৰিব। এই বিশেষ অভিযানৰ অধীনত বিভিন্ন কেন্দ্ৰীয় আৰু ৰাজ্যিক সংস্থাই সমগ্ৰ দেশতে প্ৰায় ২০৯,৫০০ কিলোগ্ৰাম নিচাজাতীয় দ্ৰব্য ধ্বংস কৰিব, যাৰ মূল্য ৬,০০০ কোটি ₹ বুলি অনুমান কৰা হৈছে। জম্মু-গুৱাহাটীত নৱনির্মিত এনচিবিৰ খণ্ড কার্যালয়সমূহো উদ্বোধন কৰিব অমিত শ্বাহে৷

৪৪টা কেন্দ্ৰীয় মন্ত্ৰালয় আৰু বিভাগৰ প্ৰতিনিধিৰ লগতে ৰাজ্য চৰকাৰ আৰু ড্ৰাগছ আইন প্ৰয়োগকাৰী সংস্থাৰ ১০৮ জন প্ৰতিনিধিয়ে ব্যক্তিগত আৰু ভাৰ্চুৱেল দুয়োটা দিশতে এই বৈঠকত অংশগ্ৰহণ কৰিব। এই বৈঠকত অহা তিনিবছৰত ড্ৰাগছ সৰবৰাহৰ আৰু ড্ৰাগছ সেৱনৰ সমস্যাক ফলপ্ৰসূভাৱে প্ৰতিহত কৰাৰ কৌশল সন্দৰ্ভত আলোচনা কৰা হ’ব।

-----------

হিন্দুস্থান সমাচাৰ / অৰৱিন্দ