নতুন দিল্লী, ২৩ জুন (হি.স.)। কেন্দ্ৰীয় গৃহ আৰু সমবায় মন্ত্ৰী অমিত শ্বাহে মঙলবাৰে ভাৰতীয় কৃষি সমবায় বিপণন ফেডাৰেচন লিমিটেডৰ নতুন ডিজিটেল নিলাম পৰ্টেল ‘নাফেক্স ডট ইন’ (nafex.in) মুকলি কৰে। তেওঁ ইয়াক দেশৰ কৃষক আৰু কৃষি প্ৰতিষ্ঠানসমূহৰ সুবিধাৰ্থে স্বচ্ছতা, দক্ষতা, আৰু সুলভতা বৃদ্ধিৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। তেওঁ কয় যে এই আধুনিক ডিজিটেল প্লেটফৰ্মে নিলাম সম্পৰ্কীয় কাম-কাজৰ সুবিধা প্ৰদান আৰু কৃষকসকলক অৰ্থনৈতিকভাৱে সবলীকৰণৰ ক্ষেত্ৰত এক মাইলৰ খুঁটি হিচাপে প্ৰমাণিত হ’ব।
এই অনুষ্ঠানত কেন্দ্ৰীয় কৃষি আৰু কৃষক কল্যাণ মন্ত্ৰী শিৱৰাজ সিং চৌহান, কেন্দ্ৰীয় সহযোগিতা ৰাজ্যিক মন্ত্ৰী কৃষ্ণপাল গুৰজাৰ, নাফেদৰ অধ্যক্ষ জেঠা ভাই আহীৰ, উপাধ্যক্ষ সিদ্দাপ্পা এছ হোট্টি, আৰু পৰিচালন সঞ্চালক দীপক আগৰৱালৰ লগতে কেইবাজনো উচ্চপদস্থ বিষয়া আৰু কৃষি বিশেষজ্ঞ উপস্থিত থাকে। এই নতুন পৰ্টেলৰ জৰিয়তে নাফেডে আধুনিক প্ৰযুক্তিৰ সহায় লৈ কৃষিজাত সামগ্ৰীৰ স্বচ্ছ ক্ৰয় আৰু ৪৮ ঘণ্টাৰ ভিতৰত কৃষকৰ একাউণ্টলৈ প্ৰত্যক্ষ পেমেণ্ট (ডিবিটি) নিশ্চিত কৰিছে। ইয়াৰ উপৰিও কৃষকসকলক দীঘলীয়া শাৰীৰ পৰা ৰক্ষা কৰিবলৈ প্ৰি-ৰেজিষ্ট্ৰেচনৰ ব্যৱস্থা আছে।
অমিত শ্বাহে কয় যে ২০১৪ চনত বন্ধ হোৱাৰ উপক্ৰম হোৱা নাফেডে এতিয়া সমগ্ৰ দেশৰ ৭৬ লাখ কৃষকক সেৱা আগবঢ়াইছে, চৰকাৰৰ নিৰন্তৰ সংস্কাৰ আৰু প্ৰচেষ্টাৰ বাবেই ৩০ হাজাৰ কোটি টকাৰ ব্যৱসায় আৰু ৫০০ কোটি ₹ লাভ হৈছে। এই দিনটোৰ তাৎপৰ্যৰ ওপৰত আলোকপাত কৰি তেওঁ কয় যে ২৩ জুন তাৰিখটো সকলো শ্ৰমিকৰ বাবে এক অতি প্ৰেৰণাদায়ক দিন, কিয়নো আজিৰ দিনটোতে ড° শ্যামা প্ৰসাদ মুখাৰ্জীয়ে জম্মু-কাশ্মীৰৰ কাৰাগাৰত দেশৰ ঐক্য আৰু অখণ্ডতাৰ বাবে নিজৰ প্ৰাণ আহুতি দিছিল। তেওঁ ব্ৰিটিছৰ সৈতে যুঁজি পশ্চিম বংগ ভাৰতৰ অবিচ্ছেদ্য অংগ হৈ থকাটো নিশ্চিত কৰিছিল।
ড° মুখাৰ্জীৰ ঐতিহাসিক সংগ্ৰামৰ কথা স্মৰণ কৰি তেওঁ কয় যে ভাৰতৰ স্বাধীনতাৰ পিছত কাশ্মীৰত ৩৭০ অনুচ্ছেদ কাৰ্যকৰী হোৱাৰ বাবে কাশ্মীৰৰ এখন সুকীয়া পতাকা, সুকীয়া সংবিধান আৰু এক সুকীয়া প্ৰধান আছিল , যিটো দেশৰ সাৰ্বভৌমত্বৰ বাবে অত্যন্ত বিপদজনক আছিল। সেই সময়ত ড° মুখাৰ্জীয়ে এখন দেশৰ দুখন সংবিধান, দুই প্ৰধান আৰু দুখন পতাকাৰ বিৰুদ্ধে দিল্লীৰ পৰা কাশ্মীৰলৈ পদযাত্ৰা কৰিছিল আৰু অনুমতি অবিহনে প্ৰৱেশ কৰাৰ বাবে গ্ৰেপ্তাৰ হৈছিল। অমিত শ্বাহে সন্তুষ্টি প্ৰকাশ কৰি কয় যে আজি ৩৭০ অনুচ্ছেদ বিলুপ্ত হোৱাৰ লগে লগে ড° মুখাৰ্জীৰ ঐতিহাসিক সপোন সম্পূৰ্ণৰূপে বাস্তৱায়িত হৈছে।
কৃষি মন্ত্ৰী চৌহানে কয় যে ২০১৪ চনৰ পৰা দেশৰ কৃষি উৎপাদন ৪৪ শতাংশ উল্লেখযোগ্য বৃদ্ধি পঞ্জীয়ন কৰা হৈছে, যিটোৱে সেউজ বিপ্লৱতকৈ দ্ৰুত বৃদ্ধিৰ প্ৰতিনিধিত্ব কৰে। তেওঁ কয় যে কৃষি মন্ত্ৰালয়ৰ তিনিটা মূল লক্ষ্য আছে: প্ৰথম, খাদ্য সুৰক্ষা নিশ্চিত কৰা; দ্বিতীয়তে, সাধাৰণ মানুহক পুষ্টিকৰ খাদ্য যোগান ধৰা; আৰু তৃতীয়তে, কৃষকৰ জীৱিকা শক্তিশালী কৰা।
তেওঁ কয় যে বাম্পাৰ উতপাদনৰ সময়ত কৃষকসকলক মূল্য হ্ৰাসৰ পৰা ৰক্ষা কৰিবলৈ চৰকাৰে নূন্যতম সহায়ক মূল্য (এম এছ পি)ত অভিলেখ ক্ৰয় কৰিছে। দালি আৰু তৈলবীজৰ ক্ষেত্ৰত দেশখনক স্বাৱলম্বী কৰাৰ বাবে এক বিশেষ অভিযান আৰম্ভ কৰা হৈছে, যাৰ অধীনত চৰকাৰে এম এছ পিত ১০০% কপৌ মটৰ, মচুৰ দাইল, মাটি মাহ ক্ৰয় কৰিব। এই স্বচ্ছ ক্ৰয় নিশ্চিত কৰাৰ বাবে মই নাফেডক অভিনন্দন জনাইছো। এনচিচিএফৰ সহযোগত নেফেডে আধুনিক প্ৰযুক্তি ব্যৱহাৰ কৰি ক্ৰয় কৰাটো স্বচ্ছ হোৱাটো নিশ্চিত কৰিছে, আৰু ৪৮ ঘণ্টাৰ ভিতৰত কৃষকৰ একাউণ্টলৈ ধন হস্তান্তৰ কৰাটো নিশ্চিত কৰিছে। ক্ৰয়ৰ সময়ত শাৰী বন্ধ কৰি, পূৰ্ব পঞ্জীয়নৰ প্ৰয়োজনীয়তা, আৰু কৃষকসকলক ঠাইতে সকলো সুবিধা প্ৰদান কৰি, নাফেডে সঁচাকৈয়ে কৃষকৰ স্বাৰ্থত প্ৰশংসনীয় কাম কৰিছে। তেওঁলোকৰ সমগ্ৰ দলটোক অভিনন্দন জনাইছো। তদুপৰি নাফেডেও বিশ্বব্যাপী চকু ৰাখিছে। নাফেডেও ৰপ্তানিৰ দিশত আগবাঢ়িছে। শেহতীয়াকৈ সমবায় মন্ত্ৰালয়ে সমবায়ৰ জৰিয়তে সমৃদ্ধি শ্লোগানক সমগ্ৰ দেশৰ লাখ লাখ কৃষকৰ জীৱন মন্ত্ৰলৈ ৰূপান্তৰিত কৰিছে।
হিন্দুস্থান সমাচাৰ / মনোজ কুমাৰ শইকীয়া
