তেহৰাণ/ছুইজাৰলেণ্ড, ২২ জুন (হি.স.)। ইৰাণৰ বৈদেশিক মন্ত্ৰী আব্বাছ আৰাকচিয়ে কয় যে পাকিস্তান আৰু কাটাৰৰ মধ্যস্থতাত আঞ্চলিক সংঘাতৰ অন্ত পেলোৱাৰ দিশত যথেষ্ট অগ্ৰগতি লাভ কৰা হৈছে যদিও লেবাননত যুদ্ধবিৰতিৰ ফলপ্ৰসূ ৰূপায়ণ এতিয়াও আটাইতকৈ বৃহৎ পৰীক্ষা হৈয়ে আছে।

ইৰাণৰ চৰকাৰী প্ৰেছটিভিয়ে প্ৰকাশ কৰা অনুসৰি সোমবাৰে ছ’চিয়েল মিডিয়া প্লেটফৰ্মত প্ৰকাশ কৰা এক বিবৃতিত আৰাকচিয়ে পাকিস্তান আৰু কাটাৰৰ “অদম্য মধ্যস্থতা”ক প্ৰশংসা কৰি কয় যে সংঘাতৰ অন্ত পেলোৱাৰ দিশত কেইবাটাও ইতিবাচক পদক্ষেপ গ্ৰহণ কৰা হৈছে। তেওঁ দাবী কৰে যে তেল আৰু পেট্ৰ’কেমিকেল ৰপ্তানিৰ সৈতে জড়িত ৰেহাই দিয়া হৈছে, কিছু নিষেধাজ্ঞা শিথিল কৰা হৈছে, পুনৰ নিৰ্মাণ আৰু উন্নয়ন প্ৰকল্পৰ কাম আৰম্ভ হৈছে। অৱশ্যে তেওঁ স্পষ্ট কৰি দিয়ে যে এই প্ৰচেষ্টাসমূহৰ প্ৰকৃত সফলতা নিৰ্ভৰ কৰিব লেবাননত যুদ্ধবিৰতি সম্পূৰ্ণ ৰূপায়ণৰ ওপৰত।

ইৰাণ আৰু আমেৰিকাৰ মাজত ছুইজাৰলেণ্ডত প্ৰথম ৰাউণ্ডৰ উচ্চ পৰ্যায়ৰ কাৰিকৰী আলোচনা সমাপ্ত হোৱাৰ সময়তে এই বক্তব্য প্ৰকাশ কৰিছে। ইৰাণৰ বিষয়াসকলৰ মতে, কাৰিকৰী পৰ্যায়ত আলোচনা অব্যাহত ৰাখিবলৈ চুক্তিবদ্ধ হ’লেও শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মন্তব্য আৰু ভাবুকিমূলক বক্তব্যৰ পিছত বহুপক্ষীয় (চতুৰ্পক্ষীয়) বৈঠক বন্ধ কৰি দিয়া হৈছিল।

ইৰাণৰ বৈদেশিক মন্ত্ৰালয়ৰ মুখপাত্ৰ ইছমাইল বাঘাইয়ে কয় যে আলোচনাৰ মূল উদ্দেশ্য আছিল পূৰ্বৰ চুক্তিসমূহ কাৰ্যকৰী কৰাৰ বিষয়ে আলোচনা কৰা। তেওঁ কয় যে যুদ্ধ আৰু আঞ্চলিক স্থিতিশীলতাৰ অন্ত নপৰিলে চূড়ান্ত চুক্তি সম্ভৱ নহ’ব। ইৰাণৰ তেল বিক্ৰীৰ অনুমোদন, নিথৰ আৰ্থিক সম্পদ মুকলি কৰা, হৰমুজ জলদ্বীপৰ মাজেৰে জাহাজৰ নিৰাপদ গতি আদি বিষয়ৰ আলোচনাতো অগ্ৰগতি লাভ কৰা হয়। তেওঁ কয় যে ইৰাণে আমেৰিকাৰ প্ৰতিশ্ৰুতি ৰূপায়ণৰ ওপৰত তীক্ষ্ণ দৃষ্টি ৰাখিব।

ইফালে কাটাৰ আৰু পাকিস্তানে যৌথ বিবৃতিযোগে আলোচনাক ইতিবাচক আৰু গঠনমূলক আখ্যা দিয়ে। বিবৃতিটোত কোৱা হৈছে যে ভৱিষ্যতে কাৰিকৰী আলোচনাৰ বাবে এটা প্ৰতিষ্ঠানিক ব্যৱস্থা গঢ়ি তোলাৰ লগতে ৰাজনৈতিক তদাৰকীৰ বাবে এখন উচ্চ পৰ্যায়ৰ সমিতি গঠনৰ বাবে এক চুক্তিত উপনীত হৈছে।

সূত্ৰ অনুসৰি ইৰাণে স্পষ্ট কৰি দিছে যে লেবাননকে ধৰি সকলো ফ্ৰণ্টতে সামৰিক অভিযান শেষ কৰাৰ চৰ্তসমূহ সম্পূৰ্ণৰূপে কাৰ্যকৰী নহ’লে অন্যান্য বিষয়ত অগ্ৰগতি সম্ভৱ নহ’ব।

ইফালে, শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মন্তব্যৰ প্ৰতি সঁহাৰি জনাই ইৰাণৰ সংসদৰ অধ্যক্ষ মহম্মদ বাকৰ গালিবাফে কয় যে হেঁচা আৰু ভাবুকিৰ দ্বাৰা ইৰাণৰ নীতিৰ কোনো পৰিৱৰ্তন নহ’ব। তেওঁ সকীয়াই দিয়ে যে ইৰাণৰ সশস্ত্ৰ বাহিনী যিকোনো প্ৰত্যাহ্বানৰ প্ৰতি সঁহাৰি জনাবলৈ সাজু।

আঞ্চলিক উত্তেজনাৰ মাজতে লেবাননত যুদ্ধবিৰতি পালন আৰু ইৰাণ-আমেৰিকাৰ আলোচনাৰ অগ্ৰগতি অনাগত দিনত পশ্চিম এছিয়াৰ ৰাজনীতিৰ গুৰুত্বপূৰ্ণ কেন্দ্ৰবিন্দু হৈ থাকিব। -----------------

হিন্দুস্থান সমাচাৰ / অৰৱিন্দ