চেন্নাই, ২২ জুন (হি.স.)। তামিলনাডু বিধানসভাৰ অধিৱেশনৰ তৃতীয় দিন সোমবাৰে তিৰুভাল্লুৰ জিলাৰ এটা সাগৰীয় খাদ্য প্ৰক্ৰিয়াকৰণ ইউনিটত পাঁচজন শ্ৰমিকৰ মৃত্যু হোৱা এমোনিয়া গেছ নিৰ্গত হোৱাৰ বিষয়টো সদনত বিশিষ্টভাৱে উত্থাপন হয়। শ্ৰম কল্যাণ বিভাগৰ মন্ত্ৰী মহম্মদ পাৰভেজে বিধানসভাত চৰকাৰৰ হৈ এক বিশদ বিবৃতি দি তিৰুভাল্লুৰৰ দৰে কৰুণ ঔদ্যোগিক দুৰ্ঘটনাৰ পুনৰাবৃত্তি ৰোধ কৰিবলৈ ৰাজ্য চৰকাৰে সকলো প্ৰয়োজনীয় আৰু কঠোৰ সুৰক্ষা ব্যৱস্থা ৰূপায়ণ কৰিব বুলি আশ্বাস দিয়ে।

পুৱা ৯:৩০ বজাৰ পৰা আৰম্ভ হোৱা বিধানসভাৰ কাৰ্যসূচীত ১১০ নং নিয়মৰ অধীনত বিবৃতি দি মন্ত্ৰী মহম্মদ পাৰভেজে তিৰুভাল্লুৰ জিলাৰ উথুকোট্টাই তালুকৰ কানিগাইপাৰ গাঁৱত অৱস্থিত ছেইণ্ট পিটাৰ এণ্ড পল ছিফুড এক্সপ’ৰ্টছ প্ৰাইভেট লিমিটেডত সংঘটিত হোৱা দুৰ্ঘটনাৰ বিষয়ে হাউছক অৱগত কৰে।

তেওঁ কয় যে দেওবাৰে কাৰখানা চৌহদত স্থাপন কৰা আইচ ফ্লেকছ জেনেৰেটৰ মেচিনলৈ যোৱা পাইপলাইনত থকা এটা ভালভত হঠাতে কাৰিকৰী বিজুতি ঘটিছিল, যাৰ ফলত এমোনিয়া গেছ লিক হৈছিল। গেছ নিৰ্গত হোৱাৰ সময়ত কাৰখানা চৌহদ আৰু শ্ৰমিক আৱাস এলেকাত উপস্থিত থকা বৃহৎ সংখ্যক শ্ৰমিক ক্ষতিগ্ৰস্ত হয়।

মন্ত্ৰীগৰাকীৰ মতে, এই দুৰ্ঘটনাত মুঠ ৭৪ জন লোক ক্ষতিগ্ৰস্ত হৈছে, য’ত ৭০ গৰাকী মহিলা আৰু ৪ জন পুৰুষ। ততাতৈয়াকৈ ক্ষতিগ্ৰস্ত লোকসকলক বিভিন্ন চৰকাৰী আৰু বেচৰকাৰী চিকিৎসালয়ত ভৰ্তি কৰোৱা হয়। ইয়াৰে ১৫ জন ৰোগীক চৰকাৰী চিকিৎসালয়ত ভৰ্তি কৰা হৈছে আৰু ২৭ জন ব্যক্তিগত চিকিৎসালয়ৰ ইনটেনচিভ কেয়াৰ ইউনিট (আই চি ইউ)ত আছে, য’ত তেওঁলোকৰ অৱস্থাৰ ওপৰত নিৰন্তৰ নজৰ ৰখা হৈছে। অতিৰিক্ত ২৭ গৰাকীয়ে সাধাৰণ চিকিৎসা গ্ৰহণ কৰি আছে।

মন্ত্ৰীগৰাকীয়ে উল্লেখ কৰে যে, মুখ্যমন্ত্ৰীৰ নিৰ্দেশ অনুসৰি সকলো আক্ৰান্ত শ্ৰমিকক উত্তম চিকিৎসা সুবিধা প্ৰদান কৰা হৈছে। ৰাজ্য চৰকাৰে স্বাস্থ্য বিভাগক নিৰ্দেশ দিছে যে যাতে চিকিৎসাৰ কোনো অভাৱ নহয় আৰু গুৰুতৰভাৱে আহত ৰোগীসকলে যাতে বিশেষ নিৰীক্ষণ লাভ কৰে।

তেওঁ উল্লেখ কৰে যে এই দুৰ্ঘটনাত পাঁচগৰাকী মহিলা শ্ৰমিকৰ মৃত্যুত ৰাজ্য চৰকাৰ গভীৰ শোক প্ৰকাশ কৰিছে। মৃতকৰ পৰিয়াললৈ সমবেদনা জ্ঞাপন কৰি মুখ্যমন্ত্রী সোণোৱালে মুখ্যমন্ত্রীৰ ৰাজহুৱা সাহায্য পুঁজিৰ পৰা ২ লাখ টকাকৈ তাৎক্ষণিকভাৱে সাহায্য প্রদান কৰাৰ কথা ঘোষণা কৰে৷

মন্ত্ৰীগৰাকীয়ে লগতে কয় যে মৃত শ্ৰমিকসকলৰ মৃতদেহ তেওঁলোকৰ গৃহ ৰাজ্যলৈ সন্মানজনকভাৱে কঢ়িয়াই নিয়াৰ লগতে অন্ত্যেষ্টিক্ৰিয়াৰ সকলো ব্যৱস্থা ৰাজ্য চৰকাৰে বহন কৰিব। আহতসকলক কৰ্মচাৰীৰ ৰাজ্যিক বীমা (ই এছ আই) আৰু কৰ্মচাৰী ভৱিষ্য নিধি (পি এফ)ৰ সুবিধা তৎকালীনভাৱে প্ৰদান কৰাৰ নিৰ্দেশনাও দিয়া হৈছে।

দুৰ্ঘটনাটোৰ ভয়াৱহতাৰ প্ৰতি লক্ষ্য ৰাখি মুখ্যমন্ত্ৰীয়ে ঔদ্যোগিক সুৰক্ষা আৰু স্বাস্থ্য বিভাগৰ সঞ্চালক, জনস্বাস্থ্য বিভাগৰ সঞ্চালক, আৰু তামিলনাডু প্ৰদূষণ নিয়ন্ত্ৰণ ব’ৰ্ডৰ সদস্য সচিবক ২৪ ঘণ্টাৰ ভিতৰত প্ৰাথমিক প্ৰতিবেদন আৰু তিনিদিনৰ ভিতৰত বিশদ তদন্তৰ প্ৰতিবেদন দাখিল কৰিবলৈ নিৰ্দেশ দিছে। এই প্ৰতিবেদনসমূহৰ ভিত্তিত দুৰ্ঘটনাৰ প্ৰকৃত কাৰণ চিনাক্ত কৰি দায়বদ্ধ পক্ষৰ বিৰুদ্ধে প্ৰয়োজনীয় ব্যৱস্থা গ্ৰহণ কৰা হ’ব।

মন্ত্ৰী মহম্মদ পাৰৱেজে উল্লেখ কৰে যে ৰাজ্য চৰকাৰে এই ঘটনাক গুৰুত্বসহকাৰে লৈছে আৰু ভৱিষ্যতে এনে দুৰ্ঘটনা ৰোধৰ বাবে এক বিস্তৃত সুৰক্ষা অডিট চলাব। তেওঁ কয় যে তামিলনাডুত বৰ্তমান ৫৪,৯৫৭টা কাৰখানা চলি আছে, য’ত প্ৰায় ২৭.৬.৫ কোটি শ্ৰমিকে কৰ্মৰত। ইয়াৰে ৬,৬৬৯টা ইউনিটক বিপজ্জনক উদ্যোগ হিচাপে শ্ৰেণীভুক্ত কৰা হৈছে, য’ত সুৰক্ষাৰ মানদণ্ডৰ বিশেষ গুৰুত্ব আছে।

তেওঁ উল্লেখ কৰে যে, মুখ্যমন্ত্ৰীৰ নিৰ্দেশ অনুসৰি সমগ্ৰ ৰাজ্যৰ সকলো বিপজ্জনক উদ্যোগতে এক বিশেষ পৰিদৰ্শন অভিযান আৰম্ভ কৰা হ’ব। বিশেষজ্ঞ আৰু সংশ্লিষ্ট বিভাগসমূহৰ এটা যৌথ দলে সুৰক্ষাৰ মানদণ্ড, গেছ সংৰক্ষণ ব্যৱস্থা, দুৰ্যোগ ব্যৱস্থাপনা ব্যৱস্থা, জৰুৰীকালীন সঁহাৰি ব্যৱস্থা, আৰু শ্ৰমিকৰ সুৰক্ষা ব্যৱস্থাসমূহ পৰ্যালোচনা কৰিব। য’ত অভাৱ পোৱা যায় তাত তাৎক্ষণিকভাৱে সংশোধনীমূলক ব্যৱস্থা গ্ৰহণ কৰা হ’ব।

মন্ত্ৰীগৰাকীয়ে সদনক আশ্বাস দিয়ে যে ঔদ্যোগিক বিকাশ আৰু শ্ৰমিকৰ সুৰক্ষা দুয়োটা ৰাজ্য চৰকাৰৰ শীৰ্ষ অগ্ৰাধিকাৰৰ ভিতৰত অন্যতম। ঔদ্যোগিক প্ৰতিষ্ঠানত নিয়োজিত শ্ৰমিকৰ সুৰক্ষাৰ ক্ষেত্ৰত যাতে কোনো প্ৰকাৰে আপোচ নহয় তাৰ প্ৰতি লক্ষ্য ৰাখিব চৰকাৰে। তেওঁ উল্লেখ কৰে যে তিৰুভাল্লুৰ কাণ্ডৰ পৰা লাভ কৰা শিক্ষাৰ ভিত্তিত ভৱিষ্যতে এনে কৰুণ ঘটনা ৰোধ কৰিবলৈ সুৰক্ষা ব্যৱস্থা আৰু অধিক শক্তিশালী কৰা হ’ব।

--------------

হিন্দুস্থান সমাচাৰ / অৰৱিন্দ