গুৱাহাটী, ২২ জুন (হি.স.)। অসমৰ মুখ্যমন্ত্রী ড০ হিমন্ত বিশ্ব শর্মাই সোমবাৰে ছ’চিয়েল মিডিয়াত ঘোষণা কৰে যে অহা ৪ আগষ্টৰ পৰা গুৱাহাটীৰ পৰা ডুবাই আৰু আবুধাবিলৈ পোনপটীয়া বিমান সেৱা আৰম্ভ হ’ব৷ তেওঁ উল্লেখ কৰে যে এই নতুন আন্তঃৰাষ্ট্ৰীয় সংযোগে অসমৰ বাণিজ্য, বিনিয়োগ, পৰ্যটন, আৰু বিশ্ব সম্পৰ্কক এক নতুন গতি প্ৰদান কৰিব।
মুখ্যমন্ত্ৰীয়ে উল্লেখ কৰে যে ইউৰোপীয় সংঘৰ (ইউৰোপীয় ইউনিয়ন)ৰ সদস্য ৰাষ্ট্ৰসমূহে অসমৰ বাবে ভ্ৰমণৰ পৰামৰ্শ প্ৰত্যাহাৰ কৰাৰ মাত্ৰ কেইদিনমানৰ পিছতে এই উল্লেখযোগ্য পদক্ষেপ লোৱা হৈছে । তেওঁ লগতে কয় যে এয়াৰ ইণ্ডিয়াই পৰিচালিত এই ননষ্টপ বিমান সেৱা আৰম্ভ হোৱাৰ লগে লগে গুৱাহাটী বিমানবন্দৰ এতিয়া সংযুক্ত আৰব আমিৰশ্বাহী, থাইলেণ্ড, ছিংগাপুৰ, ভূটানকে ধৰি চাৰিখন দেশৰ সৈতে পোনপটীয়াকৈ সংযোগ স্থাপন কৰা হ’ব ।
ড০ শৰ্মাই উল্লেখ কৰে যে এই পদক্ষেপে দক্ষিণ-পূব এছিয়াৰ এক প্ৰধান ভ্ৰমণ আৰু ট্ৰেনজিট হাব হিচাপে গুৱাহাটীৰ সম্ভাৱনাক এক বৃহৎ উত্থান প্ৰদান কৰিব । তেওঁ লগতে উল্লেখ কৰে যে তেওঁৰ পৰৱৰ্তী অগ্ৰাধিকাৰ হৈছে গুৱাহাটীৰ পৰা ভিয়েটনামলৈ পোনপটীয়া বিমান সেৱা আৰম্ভ কৰা।
এই কৃতিত্বক বিশ্বৰ সৈতে অসমৰ ক্ৰমবৰ্ধমান সংযোগৰ এক গুৰুত্বপূৰ্ণ অধ্যায় বুলি অভিহিত কৰি মুখ্যমন্ত্ৰীয়ে কয় যে নতুন বিমান বিমানেৰে ৰাজ্যখনৰ উন্নয়ন আৰু সমৃদ্ধিৰ বাবে নতুন সুযোগৰ দুৱাৰ মুকলি হ’ব।
হিন্দুস্থান সমাচাৰ / মনোজ কুমাৰ শইকীয়া
