নতুন দিল্লী, ২১ জুন (হি.স.)। প্ৰধানমন্ত্ৰী নৰেন্দ্ৰ মোদীয়ে দেওবাৰে পশ্চিম বংগৰ কলকাতাৰ শ্যামা প্ৰসাদ মুখাৰ্জী বন্দৰত অনুষ্ঠিত এক বৃহৎ অনুষ্ঠানত তিনিখন অত্যাধুনিক থলুৱা যুদ্ধ জাহাজ আইএনএছ অগ্ৰয়, আইএনএছ দুনাগিৰি আৰু আইএনএছ সংশোধক দেশবাসীৰ বাবে উৎসৰ্গা কৰে। নৌসেনাৰ মুৰব্বী আৰু জ্যেষ্ঠ সামৰিক বিষয়াৰ উপস্থিতিত প্ৰধানমন্ত্ৰীয়ে ফিতা কাটি আনুষ্ঠানিকভাৱে তিনিখন জাহাজ নৌসেনাত চামিল কৰে।
অনুষ্ঠানত প্ৰধানমন্ত্ৰীয়ে নৌসেনা আৰু এই অভিযানসমূহৰ সৈতে জড়িত বিজ্ঞানী, অভিযন্তা, শ্ৰমিকসকলক অভিনন্দন জনায়। তেওঁ কয় যে উন্নয়ন, নিৰাপত্তা, সমৃদ্ধি সাগৰৰ সৈতে জড়িত হোৱাৰ বাবে সামুদ্ৰিক সামৰ্থ্য অবিহনে কোনো দেশেই ডাঙৰ শক্তি হ’ব নোৱাৰে বুলি বিশ্বই সাক্ষী। আজি বিশ্বৰ বেছিভাগ বাণিজ্য সাগৰীয় পথেৰে পৰিচালিত হয় আৰু বিশ্বক সংযোগ কৰা বিশাল ডাটা নেটৱৰ্কসমূহো সাগৰৰ তলত পাৰ হৈ যায়। ভৱিষ্যতে অত্যাৱশ্যকীয় খনিজ পদাৰ্থ, গভীৰ সাগৰীয় সম্পদ, শক্তিৰ নতুন উৎসও সাগৰৰ লগত সংযোগ হ’ব।
ইফালে পৰম্পৰাগত ৰণশিঙাৰ শব্দৰ সৈতে তিনিখন জাহাজ নৌসেনাত আনুষ্ঠানিকভাৱে প্ৰৱেশৰ উপলক্ষে ৰাষ্ট্ৰীয় পতাকা আৰু নৌসেনাৰ পতাকা উত্তোলন কৰা হয়। ২১ জুন তাৰিখে বিশ্ব জলবিজ্ঞান দিৱসত দেশৰ আটাইতকৈ উন্নত জৰীপ জাহাজ আই এন এছ সংশোধনক নৌসেনাত অন্তৰ্ভুক্ত কৰা হয়। এই উপলক্ষে প্ৰধানমন্ত্ৰীয়ে জাহাজসমূহ পৰিদৰ্শন কৰে আৰু জাহাজত থকা ক্ৰু সদস্যসকলক সাক্ষাৎ কৰি তেওঁলোকক উৎসাহিত কৰে।
প্ৰতিৰক্ষা খণ্ডত আত্মনিৰ্ভৰশীলতাৰ ওপৰত গুৰুত্ব আৰোপ কৰি প্ৰধানমন্ত্ৰীয়ে কয় যে ভাৰত কেৱল প্ৰতিৰক্ষা সঁজুলিৰ ক্ৰেতা হৈ থাকিব নিবিচাৰে, বৰঞ্চ ই এক প্ৰধান নিৰ্মাতা হিচাপে আত্মপ্ৰকাশ কৰিছে। তেওঁ আঙুলিয়াই দিয়ে যে যোৱা কেইবছৰমানৰ ভিতৰত ভাৰতীয় নৌসেনাই ৪০খনতকৈও অধিক মেড ইন ইণ্ডিয়া যুদ্ধজাহাজ আৰু চাবমেৰিনক নিজৰ বহৰত অন্তৰ্ভুক্ত কৰিছে। তেওঁ কয় যে আই এন এছ বিক্ৰান্তৰ পৰা আজিৰ এই যাত্ৰা ভাৰতৰ ক্ৰমবৰ্ধমান আত্মনিৰ্ভৰশীলতাৰ প্ৰতীক।
প্ৰতিৰক্ষা উৎপাদনৰ পৰিসংখ্যা ভাগ কৰি প্ৰধানমন্ত্ৰীয়ে ব্যাখ্যা কৰে যে ২০১৪ চনত দেশৰ প্ৰতিৰক্ষা উৎপাদন প্ৰায় ৪০,০০০ কোটি ₹ আছিল, যিটো এতিয়া ১.৮ লাখ কোটি ₹লৈ বৃদ্ধি পাইছে। ইফালে প্ৰতিৰক্ষা ৰপ্তানি ₹৭০০ কোটিৰ পৰা প্ৰায় ₹৪০,০০০ কোটিলৈ বৃদ্ধি পাইছে, আৰু ভাৰতীয় প্ৰতিৰক্ষা সামগ্ৰী এতিয়া প্ৰায় ৮০খন দেশলৈ ৰপ্তানি কৰা হৈছে।
প্ৰধানমন্ত্ৰীয়ে উল্লেখ কৰে যে দেশখনে সামুদ্ৰিক শক্তিৰ পৰৱৰ্তী স্তৰত উপনীত হোৱাৰ সময় আহি পৰিছে। ইয়াৰ লগত সংগতি ৰাখি ভাৰতে জাহাজ নিৰ্মাণ খণ্ডৰ বাবে এক নতুন দৃষ্টিভংগীৰে আগবাঢ়িছে। শেহতীয়া বছৰবোৰত কেইবাটাও নীতি সংস্কাৰ ৰূপায়ণ কৰা হৈছে আৰু ঘৰুৱা উৎপাদন ক্ষমতা বৃদ্ধিৰ বাবে বিশেষ পদক্ষেপ গ্ৰহণ কৰা হৈছে। জাহাজ নিৰ্মাণ, জাহাজ মেৰামতি, আৰু এম আৰ অ’ (ৰক্ষণাবেক্ষণ, মেৰামতি, আৰু অভাৰহ’ল)ক এটা ডাঙৰ ৰাষ্ট্ৰীয় অভিযান হিচাপে চোৱা হৈছে।
তেওঁ উল্লেখ কৰে যে এই বন্দৰৰ নাম দেশৰ প্রথম উদ্যোগ মন্ত্রী ড০ শ্যামা প্রসাদ মুখাৰ্জীৰ নামেৰে ৰখা হৈছে আৰু ভাৰতে যি নতুন সামুদ্ৰিক যুগৰ দিশে আগবাঢ়িছে তাত পশ্চিম বংগে গুৰুত্বপূৰ্ণ ভূমিকা পালন কৰিব৷ পশ্চিম বংগৰ বন্দৰ, উদ্যোগ, প্ৰতিভা, আৰু দক্ষতাৰ ক্ষেত্ৰত অপৰিসীম সম্ভাৱনা আছে যিয়ে সামুদ্ৰিক অৰ্থনীতিক নতুন উচ্চতালৈ লৈ যাব পাৰে। ভৱিষ্যতে পশ্চিম বংগ ভাৰতৰ নীলা অৰ্থনীতি, সামুদ্ৰিক উৎপাদন, লজিষ্টিক, আৰু উপকূলীয় উন্নয়নৰ বাবে এক গুৰুত্বপূৰ্ণ কেন্দ্ৰ হৈ পৰিব।
উল্লেখযোগ্য যে ভাৰতীয় নৌসেনাৰ যুদ্ধজাহাজ ডিজাইন ব্যুৰোৰ ডিজাইনৰ এই তিনিখন জাহাজ কলকাতাস্থিত গাৰ্ডেন ৰিচ শ্বিপবিল্ডাৰছ এণ্ড ইঞ্জিনিয়াৰ (জি আৰ এছ ই)ৰ দ্বাৰা নিৰ্মাণ কৰা হৈছিল। তেওঁলোকৰ নিৰ্মাণত ৭৫ শতাংশতকৈ অধিক থলুৱা সামগ্ৰী ব্যৱহাৰ কৰা হৈছিল, আৰু ২০০ৰো অধিক এম এছ এম ইয়ে অংশগ্ৰহণ কৰিছিল।
আই এন এছ ডুনাগিৰি হৈছে প্ৰজেক্ট ১৭এৰ অধীনত নিৰ্মিত ৬,৬৭০ টন ওজনৰ ১৪৯ মিটাৰ দৈৰ্ঘ্যৰ এখন অত্যাধুনিক ষ্টীল্থ ফ্ৰিগেট। ইয়াত ব্ৰহ্মছ মিছাইল আৰু মিডিয়াম ৰেঞ্জ ছাৰ্ফেচ-টু-এয়াৰ মিছাইল চিষ্টেম আছে।
আই এন এছ অগ্ৰয় হৈছে অৰ্ণালা শ্ৰেণীৰ ছাবমেৰিন যুদ্ধ বিৰোধী অগভীৰ পানীৰ জাহাজ। ৭৭ মিটাৰ দৈৰ্ঘ্যৰ এই যুদ্ধজাহাজখনে অগভীৰ পানীত শত্ৰুৰ ছাবমেৰিন ধৰা পেলাই ধ্বংস কৰিবলৈ সক্ষম।
আই এন এছ সংশোধক হৈছে ৩৪০০ টন ওজনৰ এখন উন্নত হাইড্ৰ’গ্ৰাফিক জৰীপ জাহাজ যিয়ে হাইড্ৰ’গ্ৰাফিক জৰীপ, সাগৰৰ মেপিং, আৰু সাগৰীয় তথ্য সংগ্ৰহৰ ক্ষেত্ৰত গুৰুত্বপূৰ্ণ ভূমিকা পালন কৰিব। ইয়াত আধুনিক পানীৰ তলত আৰু দূৰৈৰ পৰা চলোৱা জৰীপ ব্যৱস্থাৰে সজ্জিত।
হিন্দুস্থান সমাচাৰ / মনোজ কুমাৰ শইকীয়া
