চেন্নাই, ২১ জুন (হি.স.)। তামিলনাডুৰ পেৰিয়াপালয়ামৰ সমীপৰ এটা কাৰখানাত এমোনিয়া গেছ নিৰ্গত হোৱাৰ ফলত ৭ গৰাকী মহিলাসহ দহজন শ্ৰমিকৰ মৃত্যু হৈছে। ইতিমধ্যে মহিলাকেইগৰাকীৰ মৃত্যু হৈছিল যদিও চেন্নাইৰ ষ্টেনলি হাস্পতালত আৰু তিনিজন শ্ৰমিকৰ মৃত্যুৰ লগে লগে এই দুৰ্ঘটনাত মৃত্যু হোৱা লোকৰ সংখ্যা এতিয়া ১০জনলৈ বৃদ্ধি পাইছে। তামিলনাডু চৰকাৰে মৃতকৰ পৰিয়াললৈ ২ লাখ ₹ (২ লাখ টকা) আৰ্থিক সাহায্য দিয়াৰ কথা ঘোষণা কৰাৰ লগতে চিকিৎসালয়ত ভৰ্তি হোৱা শ্ৰমিকসকলৰ চিকিৎসা নিশ্চিত কৰিবলৈ চিকিৎসালয়সমূহক নিৰ্দেশ দিছে।
তিৰুৱল্লুৰ জিলাৰ পেৰিয়াপলায়ামৰ সমীপত এটা চিংৰা প্ৰক্ৰিয়াকৰণ কাৰখানা চলি আছে, য’ত বৃহৎ সংখ্যক শ্ৰমিক নিয়োজিত হৈ আছে। ২১ জুনৰ পুৱা শ্ৰমিকসকলে কাম কৰি থকাৰ সময়তে হঠাতে এমোনিয়া গেছ নিৰ্গত হোৱাৰ ফলত কেইবাজনো শ্ৰমিকৰ উশাহ-নিশাহত অসুবিধা হয়। এমোনিয়া গেছ নিৰ্গত হোৱাৰ ফলত ৭ গৰাকী মহিলাৰ মৃত্যু হয়। পৰৱৰ্তী সময়ত লিক হোৱাৰ বাবে ৪৫ জনতকৈ অধিক শ্ৰমিক অচেতন হৈ পৰে। লগে লগে উদ্ধাৰ কৰি মঞ্জংগৰণাই অঞ্চলৰ এখন ব্যক্তিগত চিকিৎসালয়ত ভৰ্তি কৰোৱা হয়।
জিলা উপায়ুক্ত এছ কবিতাই জনোৱা মতে, ৪৬ জন ৰোগীক ওৱেলছ হাস্পতালত আৰু ২১ জন ৰোগীক ভেংকটেশ্বৰা হাস্পতালত ভৰ্তি কৰা হৈছে। সংকটজনক অৱস্থাত থকা ৯ জন ৰোগীক উন্নত চিকিৎসাৰ বাবে চেন্নাইৰ চৰকাৰী ষ্টেনলি মেডিকেল কলেজ হাস্পতাললৈ এম্বুলেন্সেৰে বদলি কৰা হয়। একাংশ অচেতন ৰোগীৰ মুখ আৰু নাকৰ পৰা তেজ ওলাই আহিছিল। চিকিৎসালয়খনত চিকিৎসাৰ সময়ত দুজন শ্ৰমিককে ধৰি মুঠ তিনিজন লোকৰ মৃত্যু হয়। একাংশই বৰ্তমান চেন্নাইৰ ষ্টেনলি হাস্পতালত চিকিৎসা গ্ৰহণ কৰি আছে।
তামিলনাডুৰ ৰাজ্যপাল ৰাজেন্দ্ৰ বিশ্বনাথ আৰ্লেকাৰে শোক প্ৰকাশ কৰি কয় যে, এই মৰ্মান্তিক কাণ্ডত আপোনজনক হেৰুৱা পৰিয়ালক গভীৰ শোক প্ৰকাশ কৰিছো। এই কঠিন সময়ত তেওঁলোকৰ মানসিক শক্তি আৰু সাহসৰ বাবে প্ৰাৰ্থনা জনাইছো। লগতে চিকিৎসাধীন সকলো আহতসকলৰ আশু আৰোগ্য আৰু পূৰ্ণ আৰোগ্য কামনা কৰিছো।
ততাতৈয়াকৈ আৰাক্কোনামত থকা ৰাষ্ট্ৰীয় দুৰ্যোগ সঁহাৰি বাহিনী (এনডিআৰএফ)ৰ মুখ্য কাৰ্যালয়ত এই জৰুৰীকালীন অৱস্থাৰ খবৰ দিয়ে। ব্যক্তিগত সুৰক্ষা সঁজুলি, গেছ ধৰা পেলোৱা সঁজুলি, বিশেষ উদ্ধাৰ সঁজুলিৰে সজ্জিত চেন্নাইৰ পৰা অহা ৩০ জনীয়া ৰাষ্ট্ৰীয় দুৰ্যোগ সঁহাৰি দল এটাই সেই স্থানত উপস্থিত হৈ উদ্ধাৰ আৰু নিয়ন্ত্ৰণ অভিযান আৰম্ভ কৰে। সাহায্য আৰু উদ্ধাৰৰ প্ৰচেষ্টা অব্যাহত আছে। এই ঘটনাই অঞ্চলটোত ব্যাপক আতংকৰ সৃষ্টি কৰিছে। ইফালে মন্ত্ৰী কুমাৰে এমোনিয়া গেছ নিৰ্গত হোৱা আৰু ওৱেলছ হাস্পতালত চিকিৎসা গ্ৰহণ কৰা লোকসকলক সাক্ষাৎ কৰি সান্ত্বনা দিয়ে।
হিন্দুস্থান সমাচাৰ / মনোজ কুমাৰ শইকীয়া
