ছিয়াটল, ২০ জুন (হি.স.)। ফিফা বিশ্বকাপ ২০২৬ৰ গ্ৰুপ ডি মেচত শুকুৰবাৰে অষ্ট্ৰেলিয়াক ২-০ গ’লত পৰাস্ত কৰি একেৰাহে দ্বিতীয়বাৰৰ বাবে জয়লাভ কৰি তথা এখন মেচ বাকী থকা অৱস্থাত আমেৰিকাই নকআউট পৰ্যায়ত (শেষ ৩২) স্থান নিশ্চিত কৰে।

খেলখনৰ আৰম্ভণিৰে পৰাই আমেৰিকাই আগ্ৰাসী খেলি ১১ মিনিটত অগ্ৰগতি লাভ কৰে। আমেৰিকান খেলুৱৈ ফ’লাৰিন বালোগুনে এক সুন্দৰ খেল প্ৰদৰ্শন কৰি অষ্ট্ৰেলিয়াৰ ডিফেন্সৰ মাজেৰে বলটো সোমাই দিলে যদিও ইয়াক ৰখাবলৈ চেষ্টা কৰি থাকোঁতে অষ্ট্ৰেলিয়াৰ ডিফেণ্ডাৰ কেমেৰন বাৰ্জেছে ভুলবশতঃ নিজৰ নেটত বলটো সোমাই দিয়ে।

প্ৰথমটো গ’ল দিয়াৰ পাছত অষ্ট্ৰেলিয়াই পুনৰ উভতি অহাৰ চেষ্টা চলাইছিল যদিও আমেৰিকান দলে হেঁচা বজাই ৰাখিছিল। প্ৰথমাৰ্ধ শেষ হোৱাৰ ঠিক আগতেই আমেৰিকাই নিজৰ অগ্ৰগতি দুগুণ কৰি তুলিছিল।

ক্ল’জ ৰেঞ্জৰ হেডাৰেৰে গ’ল দিয়ে এলেক্স ফ্ৰীমেনে। প্ৰথমতে গ’লটো অফছাইড বুলি ধৰা হৈছিল যদিও ভিডিঅ’ এচিষ্টেণ্ট ৰেফাৰীয়ে (ভিএআৰ) পৰ্যালোচনাৰ পিছত গ’লটো বৈধতা লাভ কৰে। ইয়াৰ ফলত ষ্টেডিয়ামত আমেৰিকাৰ সমৰ্থকসকলৰ মাজত উৎসাহৰ সৃষ্টি হয়।

এই জয়ৰ জৰিয়তে আমেৰিকাই দুখন মেচৰ পৰা ছয় পইণ্ট লাভ কৰি গ্ৰুপৰ পৰা বাহিৰ হোৱাৰ ভাবুকি সম্পূৰ্ণৰূপে নাইকিয়া কৰি ৩২ ৰাউণ্ডলৈ আগবাঢ়ি যায়।

আমেৰিকাই এতিয়া লছ এঞ্জেলছ ষ্টেডিয়ামত তুৰস্কৰ বিৰুদ্ধে গ্ৰুপৰ অন্তিমখন মেচ খেলিব, আনহাতে বৰ্তমান তিনিটা পইণ্ট লাভ কৰা অষ্ট্ৰেলিয়াই পেৰাগুৱেৰ বিৰুদ্ধে জয়লাভ কৰিব লাগিব যাতে নকআউটৰ আশা জীয়াই ৰাখিব পাৰে।

-----------------

হিন্দুস্থান সমাচাৰ / অৰৱিন্দ