নতুন দিল্লী, ২০ জুন (হি.স.)। ৰাষ্ট্ৰীয় পৰীক্ষা এজেন্সী (এনটিএ)য়ে নাগপুৰৰ এজন প্ৰাৰ্থীক পৰীক্ষা কেন্দ্ৰ হিচাপে আবুধাবী আবণ্টন দিয়াৰ সন্দৰ্ভত শনিবাৰে এক স্পষ্টীকৰণ জাৰি কৰি কয় যে পৰীক্ষা চহৰখনত এই পৰিৱৰ্তন পৰীক্ষাৰ্থীৰ নিজা পঞ্জীয়নভুক্ত লগইন ব্যৱহাৰ কৰি কৰা হৈছে, আৰু এজেন্সীৰ ৰেকৰ্ডত একেজন ব্যৱহাৰকাৰীয়ে এক ধাৰাবাহিক প্ৰৱেশৰ ধৰণ দেখুৱাইছে।

এনটিএই উল্লেখ কৰে যে ২১ জুনত অনুষ্ঠিত হ’বলগীয়া ৰাষ্ট্ৰীয় যোগ্যতা সহ প্ৰৱেশ পৰীক্ষা-স্নাতক (নীট-ইউজি) ২০২৬ৰ পুনৰ সময় নিৰ্ধাৰণৰ পিছত পৰীক্ষাৰ্থীৰ সুবিধাৰ্থে পৰীক্ষা নগৰ সংশোধনৰ খিৰিকীখন পুনৰ মুকলি কৰা হয়। এই সময়ছোৱাত প্ৰায় ৩.২ লাখ পৰীক্ষাৰ্থীয়ে নিজৰ পৰীক্ষা চহৰখন সংশোধন কৰিছিল আৰু ইয়াৰে ৯৯.৫ শতাংশতকৈ অধিক পৰীক্ষাৰ্থীক তেওঁলোকৰ পছন্দৰ পৰীক্ষা চহৰ আবণ্টন দিয়া হৈছিল।

সংস্থাটোৰ মতে, সংশ্লিষ্ট গোচৰত ‘আবুধাবি’ পৰীক্ষা কেন্দ্ৰৰ বাছনি পৰীক্ষাৰ্থীৰ পঞ্জীয়নভুক্ত লগইন ব্যৱহাৰ কৰি কৰা হৈছে। ৱেব কাৰ্য্যকলাপ ৰেকৰ্ডসমূহে ইয়াকো সূচায় যে একেজন ব্যৱহাৰকাৰীয়ে পৰিবৰ্তন প্ৰক্ৰিয়াৰ সময়ত এপ্লিকেচনটো অবিৰতভাৱে লগ ইন কৰিছিল আৰু অভিগম কৰিছিল।

এন টি এয়ে কয় যে তেওঁলোকৰ ৰেকৰ্ডত আবুধাবি কেন্দ্ৰৰ সৈতে জড়িত কাৰ্যকলাপৰ নথিভুক্ত কৰা হৈছে তিনিটা পৃথক পৃথক অনুষ্ঠানত। এবাৰ পৰীক্ষাৰ্থীৰ প্ৰমাণপত্ৰ ব্যৱহাৰ কৰি পৰীক্ষা কেন্দ্ৰটো আবুধাবিলৈ সলনি কৰা হৈছিল, আনহাতে আন দুবাৰো পৰীক্ষাৰ্থীয়ে তেওঁলোকৰ পৰীক্ষা কেন্দ্ৰটো আবুধাবি বুলি দেখুওৱা প্ৰিভিউও দেখিছিল।

ইয়াৰ পিছতো পৰীক্ষাৰ মাত্ৰ ৪৮ ঘন্টাৰ পূৰ্বে ১৯ জুনৰ সন্ধিয়া এই কেন্দ্ৰটো নাগপুৰলৈ সলনি কৰাৰ বাবে সংস্থাটোৱে অনানুষ্ঠানিক অনুৰোধ লাভ কৰে। এন টি এয়ে জনোৱা মতে, অনুৰোধ লাভ কৰাৰ লগে লগে তেওঁলোকৰ বিষয়াসকলে তাৎক্ষণিক ব্যৱস্থা গ্ৰহণ কৰে আৰু সেইদিনা সন্ধিয়া প্ৰাৰ্থীগৰাকীৰ পিতৃৰ সৈতে যোগাযোগ কৰি আনুষ্ঠানিক প্ৰক্ৰিয়া সম্পূৰ্ণ কৰাত সহায় কৰে।

সংস্থাটোৱে উল্লেখ কৰে যে পৰীক্ষা কেন্দ্ৰ পৰিবৰ্তন প্ৰক্ৰিয়াটো পৰীক্ষাৰ্থীৰ অনুৰোধ মানি লৈ সম্পূৰ্ণ কৰা হৈছিল যাতে পৰীক্ষাৰ্থীয়ে পৰীক্ষাত অৱতীৰ্ণ হোৱাৰ ক্ষেত্ৰত কোনো ধৰণৰ অসুবিধাৰ সন্মুখীন নহয়। এনটিএই পুনৰ কয় যে তেওঁলোকৰ অগ্ৰাধিকাৰ, ‘ছাত্ৰ-প্ৰথম’ পদ্ধতিৰ অধীনত, কোনো প্ৰশাসনিক বা কাৰিকৰী সমস্যাৰ বাবে কোনো পৰীক্ষাৰ্থীয়ে যাতে পৰীক্ষাৰ পৰা বঞ্চিত নহয়।

সংস্থাটোৱে কয় যে সকলো বিষয়তে প্ৰাৰ্থীৰ স্বাৰ্থক সৰ্বোচ্চ অগ্ৰাধিকাৰ দিয়া হয় আৰু প্ৰয়োজন হ’লে সময়মতে সহায় আগবঢ়োৱা হয়।

হিন্দুস্থান সমাচাৰ / মনোজ কুমাৰ শইকীয়া