বেংগালুৰু, ০২ জুন (হি.স.)। কৰ্ণাটকৰ ৰাজনীতিত এক নতুন অধ্যায় আৰম্ভ হ’বলৈ ওলাইছে। ৰাজ্যৰ নিযুক্ত মুখ্যমন্ত্ৰী ডি. শিৱকুমাৰে কাইলৈ বুধবাৰে (৩ জুন) বেংগালুৰুৰ লোকভৱনত মুখ্যমন্ত্ৰী হিচাপে শপত গ্ৰহণ কৰিব। ৰাজ্যপাল থাৱাৰ চান্দ গেহলটে সন্ধিয়া ৪:০৫ বজাত তেওঁক শপত বাক্য পাঠ কৰাব। এই বহু প্ৰত্যাশিত অনুষ্ঠানৰ বাবে ৰাজধানীত ব্যাপক প্ৰস্তুতি চলোৱা হৈছে, আৰু নিৰাপত্তাক অভূতপূৰ্ব পৰ্যায়লৈ শক্তিশালী কৰা হৈছে।

এক ভৱ্য অনুষ্ঠান নিশ্চিত কৰিবলৈ ৰাজ্য চৰকাৰ আৰু প্ৰশাসনে প্ৰয়োজনীয় সকলো ব্যৱস্থা সম্পূৰ্ণ কৰিছে। মুখ্যমন্ত্ৰীৰ লগতে মন্ত্ৰী পৰিষদৰ একাংশ সদস্যইও পদ আৰু গোপনীয়তাৰ শপত গ্ৰহণ কৰিব পাৰে। অৱশ্যে কেবিনেটৰ চূড়ান্ত গঠনৰ বিষয়ে আনুষ্ঠানিকভাৱে এতিয়াও ঘোষণা কৰা হোৱা নাই।

এই অনুষ্ঠানত কংগ্ৰেছ দলৰ শীৰ্ষ নেতৃত্ব উপস্থিত থকাৰ সম্ভাৱনা আছে। চৰকাৰী সূত্ৰ অনুসৰি কংগ্ৰেছৰ সভাপতি মল্লিকাৰ্জুন খাৰ্গেৰ লগতে লোকসভাৰ বিৰোধী দলৰ নেতা ৰাহুল গান্ধীকে ধৰি দলটোৰ কেইবাজনো জ্যেষ্ঠ ৰাষ্ট্ৰীয় নেতাই অংশগ্ৰহণ কৰাৰ সম্ভাৱনা আছে। কংগ্ৰেছ শাসিত ৰাজ্যসমূহৰ মুখ্যমন্ত্ৰী আৰু সৰ্বভাৰতীয় মিত্ৰজোঁটৰ কেইবাগৰাকীও বিশিষ্ট নেতাক আমন্ত্ৰণ জনোৱা হৈছে।

ইতিমধ্যে ৰাজ্য চৰকাৰে ভিআইপি অতিথিসকলক নিমন্ত্ৰণ পত্ৰ বিতৰণ কৰিছে। প্ৰায় ৮০০ বিশিষ্ট অতিথিক এই অনুষ্ঠানলৈ আমন্ত্ৰণ জনোৱাৰ বিপৰীতে ২২০০ৰো অধিক প্ৰৱেশ পাছ প্ৰদান কৰা হৈছে। এই অনুষ্ঠানত বৃহৎ সংখ্যক জনপ্ৰতিনিধি, উদ্যোগ প্ৰতিনিধি, সামাজিক সংগঠন, বিভিন্ন ক্ষেত্ৰৰ বিশিষ্ট ব্যক্তিয়েও অংশগ্ৰহণ কৰাৰ সম্ভাৱনা আছে।

শপতগ্ৰহণ অনুষ্ঠানত সহস্ৰাধিক কংগ্ৰেছ কৰ্মী আৰু সমৰ্থকে অংশগ্ৰহণ কৰাৰ সম্ভাৱনা আছে। লোক ভৱন আৰু ইয়াৰ আশে-পাশে থকা অঞ্চলত বিশেষ নিৰাপত্তাৰ ব্যৱস্থা কৰা হৈছে। আৰক্ষী প্ৰশাসনে ভিৰ ব্যৱস্থাপনা, যান-বাহন নিয়ন্ত্ৰণ, আইন-শৃংখলা বজাই ৰখাৰ বাবে অতিৰিক্ত আৰক্ষী বাহিনী মোতায়েন কৰিছে। স্পৰ্শকাতৰ অঞ্চলত চোৰাংচোৱাগিৰি বৃদ্ধি কৰা হৈছে, আৰু নিৰাপত্তা সংস্থাসমূহে পৰিস্থিতিৰ ওপৰত অহৰহ নিৰীক্ষণ কৰি আছে।

অনুষ্ঠানৰ সময়ত যান-জঁটৰ সম্ভাৱনাৰ পৰিপ্ৰেক্ষিতত প্ৰশাসনে বিশেষ ব্যৱস্থা গ্ৰহণ কৰিছে। মহানগৰীৰ মধ্য অংশত যান-জঁট হ্ৰাস কৰাৰ বাবে বিধান সৌধা, বিকাশ সৌধা, আৰু এম এছ বিল্ডিঙত কৰ্মৰত বিষয়া-কৰ্মচাৰীৰ বাবে বিয়লিৰ ছুটী ঘোষণা কৰা হৈছে। নাগৰিকসকলকো বিকল্প পথ ব্যৱহাৰ কৰিবলৈ পৰামৰ্শ দিয়া হৈছে।

হিন্দুস্থান সমাচাৰ / মনোজ কুমাৰ শইকীয়া