উইন্সটন-চেলেম, ১৯ জুন (হি.স.)। ফিফা বিশ্বকাপ ২০২৬ৰ পিছত আন্তঃৰাষ্ট্ৰীয় ফুটবলৰ পৰা পুনৰ অৱসৰ লোৱাৰ কথা বৃহস্পতিবাৰে ঘোষণা কৰে জাৰ্মানীৰ প্ৰবীণ গ’লৰক্ষক মেনুৱেল ন্যুয়াৰে। ৪০ বছৰীয়া ন্যুয়াৰে স্পষ্ট কৰি দিয়ে যে এইখন তেওঁৰ কেৰিয়াৰৰ অন্তিমখন আন্তঃৰাষ্ট্ৰীয় প্ৰতিযোগিতা হ’ব ।

২০১৪ চনত জাৰ্মানীক বিশ্বকাপ জয়ৰ দিশত আগুৱাই নিয়া ন্যুয়াৰে একেৰাহে পঞ্চমবাৰৰ বাবে বিশ্বকাপত জাৰ্মানীৰ মূল গ’লৰক্ষক হিচাপে খেলি আছে। ইউৰো ২০২৪ত জাৰ্মানীয়ে কোৱাৰ্টাৰ ফাইনেলত পৰাজয়ৰ পিছত ৰাষ্ট্ৰীয় দলৰ পৰা অৱসৰ গ্ৰহণ কৰে যদিও ক্লাব পৰ্যায়ত তেওঁৰ আকৰ্ষণীয় প্ৰদৰ্শনৰ পিছত তেওঁক পুনৰ বিশ্বকাপৰ বাবে নিযুক্তি দিয়া হয়।

ন্যুয়াৰে এক সংবাদমেলত কয় যে, মই ২০২৪ চনত সঠিক কাৰণত আন্তঃৰাষ্ট্ৰীয় ফুটবল এৰিছিলো। যোৱা দুবছৰ ধৰি ৰাষ্ট্ৰীয় দলৰ হৈ অবিৰতভাৱে খেলাটো শাৰীৰিকভাৱে কঠিন হ'লহেঁতেন। এতিয়া নিশ্চিত হৈছে যে এইখন মোৰ শেষ প্ৰতিযোগিতা। মই পৰৱৰ্তী ইউৰো ২০২৪ চেম্পিয়নশ্বিপত খেলিব নোৱাৰিম, যিটো দুবছৰৰ পিছত অনুষ্ঠিত হ'ব ।

তেওঁ কয় যে যোৱা কিছুদিনত তেওঁ মানি লৈছে যে জাৰ্মানীৰ হৈ এইবোৰ তেওঁৰ শেষ মেচ হ’ব, কিন্তু এই মুহূৰ্তত তেওঁৰ একমাত্ৰ গুৰুত্ব তেওঁৰ বিদায়ৰ ওপৰত নহয়, দলৰ প্ৰদৰ্শনৰ ওপৰত।

বিশ্বকাপৰ পূৰ্বে গ’লৰক্ষক অলিভাৰ বাউমানক জাৰ্মানীৰ প্ৰথম পছন্দৰ গ’লৰক্ষক হিচাপে গণ্য কৰা হৈছিল যদিও ন্যুয়াৰ ঘূৰি অহাৰ পিছত তেওঁক আৰম্ভণিৰ স্থান দিয়া হৈছিল। দুবছৰৰ পাছত ৰাষ্ট্ৰীয় দলৰ হৈ প্ৰথমখন মেচ খেলি তেওঁ কুৰাচাওৰ বিৰুদ্ধে ৭-১ গ’লত জয়লাভ কৰে।

ন্যুয়াৰে কয় যে তেওঁ আৰু বাউমেনৰ মাজত অতি ভাল বুজাবুজি আছে আৰু দলৰ স্বাৰ্থত একেলগে কাম কৰি আছে।

এতিয়া জাৰ্মানীয়ে পৰৱৰ্তী গ্ৰুপ মেচত আইভৰি কোষ্টৰ বিৰুদ্ধে খেলিব। এই জয়ে জাৰ্মানীক নকআউট পৰ্যায়লৈ আগুৱাই নিব পাৰে। যোৱা দুখন বিশ্বকাপ (২০১৮ আৰু ২০২২)ত জাৰ্মান দলটো গ্ৰুপ পৰ্যায়ত বাহিৰ হৈছিল।

ন্যুয়াৰে কয়, আমি অতীতৰ ব্যৰ্থতাৰ ওপৰত গুৰুত্ব দিয়া নাই। আমাৰ লক্ষ্য হৈছে পৰৱৰ্তী মেচত জয়ী হোৱা আৰু দ্ৰুত নকআউটৰ স্থান নিশ্চিত কৰা।

লগতে তেওঁ কয় যে এই বয়সত আন এটা বিশ্বকাপ খেলাটো এক উপহাৰ। তেওঁ স্বীকাৰ কৰে যে যদি তেওঁ বিশ্বকাপ জয়ৰ সুযোগ দেখা নাপায় তেন্তে তেওঁ ইয়াত নাথাকিব ।

-----------------

হিন্দুস্থান সমাচাৰ / অৰৱিন্দ