নতুন দিল্লী, ১৯ জুন (হি.স.)। প্ৰাক্তন কেন্দ্ৰীয় বন আৰু পৰিৱেশ মন্ত্ৰী আৰু কংগ্ৰেছৰ সাধাৰণ সম্পাদক (যোগাযোগ) জয়ৰাম ৰমেশে মহান নিকোবৰ দ্বীপ উন্নয়ন প্ৰকল্প সন্দৰ্ভত কেন্দ্ৰীয় পৰিৱেশ, বন, আৰু জলবায়ু পৰিৱৰ্তন মন্ত্ৰী ভূপেন্দ্ৰ যাদৱলৈ পুনৰ পত্ৰ প্ৰেৰণ কৰিছে । পত্ৰখনত তেওঁ ১৩ জুনত প্ৰকল্পটোৰ পৰিৱেশ অনুমোদন আৰু প্ৰকল্পটোৰ সৈতে জড়িত পদ্ধতিসমূহত স্বচ্ছতাৰ অভাৱৰ প্ৰতি যাদৱৰ সঁহাৰিক “সম্পূৰ্ণ হতাশাজনক আৰু অসন্তুষ্টিজনক” বুলি অভিহিত কৰিছে।

শুকুৰবাৰে লিখা পত্ৰখনত জয়ৰাম ৰমেশে উল্লেখ কৰিছে যে মহান নিকোবৰ প্ৰকল্পৰ বিভিন্ন দিশৰ বাবে পৰিৱেশ প্ৰভাৱ মূল্যায়ন (ইআইএ) সম্পূৰ্ণ অপৰ্যাপ্ত। পৰিৱেশ, বন, জলবায়ু পৰিৱৰ্তন মন্ত্ৰালয়ে নিজেই নিৰ্ধাৰণ কৰা নিৰ্দেশনাৰ স্পষ্ট উলংঘা। কেন্দ্ৰীয় মন্ত্ৰীগৰাকীয়ে পূৰ্বে উত্থাপন কৰা কাৰিকৰী, আইনী, বৈজ্ঞানিক প্ৰশ্নসমূহৰ কোনো সুনিৰ্দিষ্ট বা সন্তোষজনক উত্তৰ নাই। চৰকাৰে কেৱল নিজৰ পুৰণি বাক্যবাণ আওৰাই মূল বিষয়বোৰৰ পৰা দৃষ্টি আকৰ্ষণ কৰাৰ প্ৰয়াস কৰিছে।

তেওঁ কয় যে, নিয়ম অনুসৰি প্ৰকল্পটোৰ ডেৰ বছৰীয়া অনুসৰণ প্ৰতিবেদন ৰাজহুৱা কৰিব লাগিব, কিন্তু ২০২৪ চনৰ মাৰ্চ মাহৰ পৰা এনে কোনো প্ৰতিবেদন উপলব্ধ কৰা হোৱা নাই । তদুপৰি, সভাখন সম্পূৰ্ণ হোৱাৰ কেইবামাহো পিছত প্ৰকল্প নিৰীক্ষণ সমিতিৰ বৈঠকৰ কাৰ্য্যবিৱৰণী ৱেবছাইটত আপলোড কৰা হৈছে, যাৰ ফলত সমগ্ৰ প্ৰক্ৰিয়াটোৰ ওপৰত প্ৰশ্ন উত্থাপন হৈছে।

ৰমেশে উল্লেখ কৰে যে ২০২২ চনৰ ১১ নৱেম্বৰত জাৰি কৰা পৰিৱেশ অনুমোদনৰ অধীনত ১৫ দিনৰ ভিতৰত বিভিন্ন সংৰক্ষণ আৰু প্ৰশমন পৰিকল্পনা দাখিল কৰিব লাগিছিল। ভাৰতীয় বন্যপ্ৰাণী প্ৰতিষ্ঠান (WII), ভাৰতীয় জুলজিকেল জৰীপ (ZSI), ভাৰতীয় উদ্ভিদ জৰীপ (BSI), আন্দামান আৰু নিকোবৰ বন বিভাগে প্ৰস্তুত কৰা এই গুৰুত্বপূৰ্ণ পৰিকল্পনাসমূহ আজিলৈকে জনসাধাৰণৰ বাবে উপলব্ধ কৰা হোৱা নাই।

তেওঁ প্ৰশ্ন উত্থাপন কৰে যে পৰিৱেশ মূল্যায়ন সমিতিৰ পৰামৰ্শ অনুসৰণ কৰি এই পৰিকল্পনাসমূহৰ বাবে সংশোধিত প্ৰস্তাৱ কিয় কিছুমান প্ৰতিষ্ঠানৰ পৰা বিচৰা হৈছিল। এই পৰিকল্পনাসমূহ সংশ্লিষ্ট সমিতিৰ দ্বাৰা মূল্যায়নৰ পিছত দাখিল কৰাটোৱে ইয়াৰ পৰ্যাপ্ততা, প্ৰামাণ্যতা, নিৰ্ভৰযোগ্যতাৰ ওপৰত গুৰুতৰ সন্দেহৰ সৃষ্টি কৰাটো অত্যন্ত আচৰিত আৰু সন্দেহজনক। তদুপৰি বিভিন্ন সুনামধন্য প্ৰতিষ্ঠানে কৰা কমেও ১২টা অধ্যয়নৰ আধাৰত নবীকৃত পৰিৱেশ ব্যৱস্থাপনা পৰিকল্পনা জনসাধাৰণৰ পৰা সম্পূৰ্ণৰূপে লুকুৱাই ৰখা হৈছে।

ৰমেশে অভিযোগ কৰে যে প্ৰকল্পটোৰ সৈতে জড়িত কেইবাটাও গুৰুত্বপূৰ্ণ আৰু মৌলিক অধ্যয়ন এতিয়াও বাকী আছে, যিয়ে স্পষ্টভাৱে প্ৰমাণ কৰে যে প্ৰকল্পটোৰ বাবে পৰিৱেশ অনুমোদন খৰখেদাকৈ, অকালতে আৰু ৰাজনৈতিক হেঁচাত প্ৰদান কৰা হৈছিল। বৈজ্ঞানিক যুক্তিৰ উদ্ধৃতি দি তেওঁ কয় যে প্ৰকল্প এলেকাৰ পৰা প্ৰবাল প্ৰাচীৰ বৃহৎ পৰিসৰৰ স্থানান্তৰৰ দৰে প্ৰশমন পৰিকল্পনা সম্পূৰ্ণ অবাস্তৱ আৰু কাৰ্যকৰী কৰাটো প্ৰায় অসম্ভৱ।

কংগ্ৰেছ নেতা ৰমেশে কয় যে তেওঁ পূৰ্বে ৰাষ্ট্ৰীয় সেউজ ন্যায়াধিকৰণে গঠন কৰা উচ্চ ক্ষমতাসম্পন্ন সমিতিৰ প্ৰতিবেদন ৰাজহুৱাভাৱে প্ৰকাশ কৰিবলৈ দাবী জনাইছিল যদিও চৰকাৰে ইয়াকো দমন কৰাৰ চেষ্টা চলাইছে। তেওঁ ৰাজহুৱাভাৱে মুকলি কৰাৰ দাবী জনোৱা কোনো এটা প্ৰতিবেদন, পৰিকল্পনা বা অধ্যয়নে প্ৰকল্পটোৰ তথাকথিত কৌশলগত বা নিৰাপত্তামূলক লক্ষ্যৰ প্ৰতি কোনো ভাবুকি কঢ়িয়াই আনিব নোৱাৰে। প্ৰকল্পটোৰ অভাৱসমূহ লুকুৱাই ৰখা আৰু ন্যায্যতা প্ৰদানৰ বাবে এতিয়া কৌশলগত লক্ষ্যসমূহ অজুহাত হিচাপে ব্যৱহাৰ কৰা হৈছে।

উল্লেখযোগ্য যে ইয়াৰ পূৰ্বেও ৰমেশে কেন্দ্ৰীয় পৰিৱেশ মন্ত্ৰী ভূপেন্দ্ৰ যাদৱলৈ দুখন পত্ৰ লিখিছে, যাৰ উত্তৰত তেওঁ দিছে। প্ৰথমে ১০ মে’ত জয়ৰাম ৰমেশে মন্ত্ৰালয়ৰ সঘনাই সোধা প্ৰশ্ন (FAQ)ত প্ৰকল্পটোৰ পৰিৱেশ নিষ্কাশনৰ বিষয়ে গুৰুতৰ প্ৰশ্ন উত্থাপন কৰে। ইয়াক “বিজ্ঞানক অপমান” আৰু “পৰিৱেশ প্ৰভাৱ মূল্যায়ন প্ৰক্ৰিয়াক উপহাস” বুলি অভিহিত কৰি তেওঁ কয় যে নিয়মৰ অধীনত প্ৰয়োজনীয় তিনিটা ঋতুৰ প্ৰাথমিক তথ্য অবিহনে প্ৰকল্পটো অনুমোদন কৰা হৈছে। ইয়াৰ উত্তৰত ২৭ মে’ত কেন্দ্ৰীয় মন্ত্ৰী ভূপেন্দ্ৰ যাদৱে জয়ৰাম ৰমেশৰ অভিযোগ খণ্ডন কৰে। তেওঁ স্বীকাৰ কৰিছিল যে ঠাইতে সংগ্ৰহ কৰা প্ৰাথমিক তথ্যসমূহ মাত্ৰ এটা ঋতুৰ বাবেহে, কিন্তু যুক্তি দিছিল যে ইয়াক ১৭ বছৰীয়া উপগ্ৰহৰ ৰেকৰ্ড আৰু ইছৰো, ভাৰতীয় প্ৰাণীবিজ্ঞান জৰীপ, ভাৰতৰ উদ্ভিদ জৰীপৰ দৰে প্ৰতিষ্ঠানৰ ঐতিহাসিক তথ্য (গৌণ তথ্য)ৰ সৈতে সংযুক্ত কৰি এক বিস্তৃত পৰ্যালোচনা কৰা হৈছিল। এন জি টিৰ আদেশৰ উদ্ধৃতি দি তেওঁ এই প্ৰক্ৰিয়াটোক ন্যায্যতা প্ৰদান কৰে।

ইয়াৰ পিছত ৩ জুনত ৰমেশে ভূপেন্দ্ৰ যাদৱৰ সঁহাৰিৰ প্ৰতিহত কৰি কয় যে ঐতিহাসিক অভিলেখ কেতিয়াও ঠাইতে সংগ্ৰহ কৰা প্ৰত্যক্ষ, প্ৰাথমিক তথ্যৰ বিকল্প হ’ব নোৱাৰে। তেওঁ অভিযোগ কৰে যে মূল প্ৰতিবেদনখন প্ৰস্তুত কৰা একেবোৰ চৰকাৰী প্ৰতিষ্ঠানৰ পৰা পৰ্যালোচনা কৰাটো যথাযথ প্ৰক্ৰিয়াৰ উলংঘা। ২০২৫ চনৰ অক্টোবৰ মাহত এন জি টিত দাখিল কৰা ‘হাই পাৱাৰ কমিটি’ৰ প্ৰতিবেদন কিয় ছীল কভাৰত জনসাধাৰণৰ পৰা লুকুৱাই ৰখা হৈছে বুলি প্ৰশ্ন উত্থাপন কৰে।

তেওঁ ইয়াক বিশুদ্ধ বাণিজ্যিক প্ৰকল্প বুলি অভিহিত কৰে। ১৩ জুনত কেন্দ্ৰীয় মন্ত্ৰী ভূপেন্দ্ৰ যাদৱে চৰকাৰৰ এই স্থিতি পুনৰবাৰ উল্লেখ কৰি স্পষ্ট কৰি দিয়ে যে ৰাষ্ট্ৰীয় সুৰক্ষা আৰু কৌশলগত কাৰণত তথ্যৰ অধিকাৰ (আৰ টি আই) আইনৰ ধাৰা ৮(১)(ক)ৰ অধীনত উচ্চ ক্ষমতাসম্পন্ন সমিতিৰ কিছুমান তথ্য ৰাজহুৱা ক্ষেত্ৰৰ বাহিৰত ৰখাটো ৰাষ্ট্ৰীয় স্বাৰ্থত অপৰিহাৰ্য। কচ্ছপ আৰু স্থানীয় জনজাতি সুৰক্ষাৰ বাবে কঠোৰ পৰিবেশ নিয়ম মানি চলিছে।

হিন্দুস্থান সমাচাৰ / অৰৱিন্দ