কলকাতা, ১৮ জুন (হি.স.)। পশ্চিম বংগ বিধানসভাৰ বাজেট অধিবেশন বৃহস্পতিবাৰে ৰাজ্যপাল আৰ.এন. ৰবিৰ ভাষণেৰে পৰা আৰম্ভ হৈছে । ভাষণত ৰাজ্যপালগৰাকীয়ে উল্লেখ কৰে যে প্ৰথম পৰ্যায়ৰ বাজেট অধিবেশন ২৫ জুনলৈকে চলি থাকিব, আনহাতে সোমবাৰে ৰাজ্যৰ বিত্তমন্ত্ৰী স্বপন দাসগুপ্তাই ৰাজ্যৰ বাজেট দাখিল কৰিব। এইবাৰ বাজেট অধিবেশনতো লাইভ টেলিকাষ্ট কৰা হ’ব।

ভাষণত ৰাজ্যপালগৰাকীয়ে আইন-শৃংখলা, দুৰ্নীতি, ধন দাবী, মহিলাৰ সুৰক্ষা, অনুপ্ৰৱেশ, শিক্ষা, স্বাস্থ্য, উদ্যোগ উন্নয়নকে ধৰি কেইবাটাও বিষয়ৰ কথা উল্লেখ কৰে। তেওঁ উল্লেখ কৰে যে নতুন ৰাজ্য চৰকাৰখনে নাগৰিকৰ সুৰক্ষা নিশ্চিত কৰাৰ বাবে প্ৰতিশ্ৰুতিবদ্ধ আৰু দুৰ্নীতি আৰু ধন দাবী ৰোধৰ বাবে কঠোৰ ব্যৱস্থা গ্ৰহণ কৰিছে।

ৰাজ্যপালগৰাকীয়ে উল্লেখ কৰে যে চৰকাৰে মহিলাক হাৰাশাস্তিৰ ক্ষেত্ৰত শূন্য সহনশীলতা নীতি গ্ৰহণ কৰিছে আৰু অসামাজিক উপাদান আৰু ধন দাবীকাৰীৰ বিৰুদ্ধে কঠোৰ ব্যৱস্থা গ্ৰহণৰ সংকল্প লৈছে। তেওঁ দাবী কৰে যে বিগত কেইবাবছৰ ধৰি ৰাজ্যখনত ভয় আৰু হিংসাৰ পৰিবেশ সৃষ্টি হৈছিল, যিটো নতুন চৰকাৰে আঁতৰাবলৈ চেষ্টা চলাইছে আৰু আইনৰ শাসন পুনৰ প্ৰতিষ্ঠা হ’ব।

ভাষণত ৰাজ্যপালগৰাকীয়ে সীমান্ত সুৰক্ষা আৰু অবৈধ অনুপ্ৰৱেশৰ বিষয়টোও উত্থাপন কৰে। তেওঁ উল্লেখ কৰে যে নতুন চৰকাৰে সীমান্ত সুৰক্ষা বাহিনীক ছিদ্ৰযুক্ত সীমান্তত কাঁইটীয়া তাঁৰ স্থাপন কৰিবলৈ ভূমি প্ৰদান কৰিছে। তেওঁৰ মতে, অনুপ্ৰৱেশ ৰাজ্যখনত এক ডাঙৰ সমস্যা হৈ পৰিছে আৰু ইয়াৰ ফলত জনসংখ্যাৰ গাঁথনিৰ পৰিৱৰ্তন ঘটিছে। অনুপ্ৰৱেশকাৰীক চিনাক্ত কৰি চৰকাৰে ব্যৱস্থা গ্ৰহণ কৰিছে, চৰকাৰী ভূমি বেদখলৰ পৰা মুক্ত কৰাৰ প্ৰচেষ্টা অব্যাহত আছে।

ৰাজ্যপালগৰাকীয়ে কয় যে নতুন চৰকাৰখনে বালি সৰবৰাহ আৰু প্ৰতিষ্ঠানিক দুৰ্নীতিকো কঠোৰভাৱে ৰোধ কৰাৰ বাবে কাম কৰি আছে। তেওঁ স্পষ্ট কৰি দিয়ে যে কোনো ধৰণৰ ভাবুকি সংস্কৃতি বা ভয়-ভাবুকিৰ ৰাজনীতি সহ্য কৰা নহ'ব।

উন্নয়নমূলক প্ৰকল্পৰ কথা উল্লেখ কৰি ৰাজ্যপালগৰাকীয়ে কয় যে পূৰ্বৰ চৰকাৰৰ কাৰ্যকালত বহু গুৰুত্বপূৰ্ণ প্ৰকল্প বাকী আছিল। তেওঁ দাবী কৰে যে চিংৰিঘাটা মেট্ৰ’ প্ৰকল্প ১৮ মাহ ধৰি স্থবিৰ হৈ আছিল যদিও নতুন চৰকাৰে এই দিশত ক্ষিপ্ৰ পদক্ষেপ গ্ৰহণ কৰিছে। ইয়াৰ উপৰিও ৩৬টা ৰে’ল প্ৰকল্পৰ বাবে ভূমি উপলব্ধ কৰা হৈছে, আৰু বাকী থকা সকলো ৰে’ল আৰু মেট্ৰ’ প্ৰকল্প সম্পূৰ্ণ কৰাৰ প্ৰচেষ্টা চলোৱা হৈছে।

ঔদ্যোগিক বিকাশৰ ওপৰত গুৰুত্ব আৰোপ কৰি ৰাজ্যপালগৰাকীয়ে উল্লেখ কৰে যে দীৰ্ঘদিন ধৰি অৱহেলাৰ অন্তত এতিয়া ৰাজ্যত উদ্যোগসমূহক অগ্ৰাধিকাৰ দিয়া হৈছে। নতুন উদ্যোগিক ইউনিট আকৰ্ষণ আৰু বিনিয়োগ বৃদ্ধিৰ বাবে চৰকাৰে সক্ৰিয়ভাৱে কাম কৰি আছে।

শিক্ষা আৰু স্বাস্থ্য খণ্ডৰ পৰিকল্পনাৰ কথা উল্লেখ কৰি ৰাজ্যপালগৰাকীয়ে কয় যে ৰাজ্যত ৰাষ্ট্ৰীয় শিক্ষা নীতি ৰূপায়ণ কৰা হ’ব আৰু বিদ্যালয়সমূহত মধ্যাহ্ন ভোজনৰ উন্নত সেৱা নিশ্চিত কৰা হ’ব। মহিলা সৱলীকৰণৰ বাবেও নতুন পদক্ষেপ গ্ৰহণ কৰা হ’ব।

তেওঁ অৱগত কৰে যে চৰকাৰে ছাৰ্ভাইকেল কেন্সাৰ নিৰ্মূলৰ লক্ষ্যৰে বিনামূলীয়া টিকাকৰণ কাৰ্যসূচী আৰম্ভ কৰাৰ সিদ্ধান্ত লৈছে। ইয়াৰ উপৰিও জন আউষধি আঁচনিৰ অধীনত ৰাজ্যৰ জনসাধাৰণক ৫০ৰ পৰা ৮০ শতাংশ ৰেহাই মূল্যত ঔষধ যোগান ধৰাৰ পৰিকল্পনা কৰা হৈছে।

ৰাজ্যপালৰ ভাষণেৰে আৰম্ভ হোৱা বাজেট অধিৱেশনত চৰকাৰৰ অগ্ৰাধিকাৰ আৰু ভৱিষ্যতৰ নীতিগত দিশৰ স্পষ্ট ইংগিত পোৱা যায়। এতিয়া ৰাজ্যৰ বিত্তমন্ত্ৰীয়ে সোমবাৰে বাজেট দাখিল কৰি চৰকাৰৰ অৰ্থনৈতিক পৰিকল্পনা আৰু উন্নয়ন কাৰ্যসূচীৰ বিশদ ৰূপৰেখা সদনৰ সন্মুখত দাখিল কৰিব।

হিন্দুস্থান সমাচাৰ / মনোজ কুমাৰ শইকীয়া