নতুন দিল্লী, ১৮ জুন (হি.স.)। একেৰাহে পঞ্চমটো ব্যৱসায়িক অধিবেশনৰ বাবে শ্বেয়াৰ বজাৰৰ শক্তিশালী ধাৰা অব্যাহত আছে। ভূ-ৰাজনৈতিক ফ্ৰণ্টৰ ইতিবাচক পৰিঘটনা আৰু খাৰুৱা তেলৰ মূল্য অব্যাহত থকা কোমলতাই বজাৰখনক সমৰ্থন কৰিছিল, যাৰ ফলত বৃহস্পতিবাৰে ঘৰুৱা শ্বেয়াৰ বজাৰখন সেউজীয়া ৰূপত বন্ধ হৈ পৰে। চেন্সেক্সে ২৫৪ পইণ্ট আৰু নিফটিয়ে ৮২ পইণ্ট লাভ কৰে।
ব্যৱসায়ৰ অন্তত বম্বে ষ্টক এক্সচেঞ্জৰ ৩০ শ্বেয়াৰৰ বেঞ্চমাৰ্ক চেন্সেক্সৰ মূল্য ৭৭,৪০৯.৯৮ত বন্ধ হয়, যিটো ২৫৪.৩৬ পইণ্ট বা ০.৩৩ শতাংশ বৃদ্ধি। ব্যৱসায়িক অধিবেশনত ইয়াৰ উচ্চতম ৭৭,৪৯২.৩৩ আৰু নিম্নতম ৭৬,৯৫৩ত উপনীত হয়। ইফালে, নেশ্যনেল ষ্টক এক্সচেঞ্জৰ ৫০ শ্বেয়াৰৰ বেঞ্চমাৰ্ক সূচকাংক নিফটিও ৮২.৩০ পইণ্ট বা ০.৩৪ শতাংশ বৃদ্ধি পাই ২৪,১৬৮ত বন্ধ হয়।
চেন্সেক্সৰ প্ৰধান ষ্টকসমূহৰ ভিতৰত ইন্টাৰগ্ল’ব এভিয়েশন (ইণ্ডিগো), ট্ৰেণ্ট, ভাৰত ইলেক্ট্ৰনিক্স, এনটিপিচি, ষ্টেট বেংক অৱ ইণ্ডিয়া, আৰু এইচডিএফচি বেংক আদিয়েই প্ৰধান লাভজনক ষ্টকসমূহৰ ভিতৰত অন্যতম। ইফালে ইনফ’ছিছ, টেক মহিন্দ্ৰা, মাৰুতি, আৰু টাটা কনছালটেন্সি চাৰ্ভিচেছৰ শ্বেয়াৰ হ্ৰাস পাইছে। ইয়াৰ জৰিয়তে ঘৰুৱা শ্বেয়াৰ বজাৰৰ বাবে একেৰাহে পঞ্চমটো অধিবেশন লাভ কৰা হয়। এই সময়ছোৱাত বিএছই চেন্সেক্সে ৩৫৭৭.৪৩ পইণ্ট আৰু নিফটিয়ে ১০০৬.৪ পইণ্ট লাভ কৰে।
দক্ষিণ কোৰিয়াৰ কস্পি আৰু জাপানৰ নিকেইকে ধৰি এছিয়াৰ অন্যান্য শ্বেয়াৰ বজাৰসমূহ বৃদ্ধিৰ সৈতে বন্ধ হোৱাৰ বিপৰীতে চীনৰ চাংহাই কম্পোজিট আৰু হংকঙৰ হাং চেঙৰ শ্বেয়াৰ হ্ৰাস পাইছে। বিয়লিৰ অধিবেশনত ইউৰোপৰ বজাৰসমূহত মিশ্ৰিত ব্যৱসায় চলিছিল। পশ্চিম এছিয়াত উত্তেজনা হ্ৰাস পোৱাৰ বাবে আন্তঃৰাষ্ট্ৰীয় বজাৰত ব্ৰেণ্ট খাৰুৱা তেলৰ মূল্য ২.২৩ শতাংশ হ্ৰাস পাই প্ৰতি বেৰেলত ৭৭.৭৮ ডলাৰ হৈছে।
মন কৰিবলগীয়া যে বুধবাৰে চেন্সেক্সৰ মূল্য ৩৪৭.১৪ পইণ্ট বৃদ্ধি পাই ৭৭,১৫৫.৬২ পইণ্টত বন্ধ হয়। একেদৰে নিফটিয়ে ৯৭ পইণ্ট বৃদ্ধিৰে ২৪,০৮৫.৭০ত বন্ধ হয়।
হিন্দুস্থান সমাচাৰ / মনোজ কুমাৰ শইকীয়া
