কামৰূপ, ১৮ জুন (হি.স.)। অৱশেষত স্বগৃহলৈ অনা হ'ব ৰঙিয়া ততাঁৰকুছি গাঁৱৰ সঞ্জীৱ ঘোষৰ নশ্বৰ দেহ। ৰঙিয়া ততাঁৰকুছি গাঁৱৰ এটা সাধাৰণ পৰিয়ালৰ ৬ জনকৈ সদস্যই কৰ্মসূত্ৰে তামিলনাডুত আছিল । তামিলনাডুৰ ৰাজপালায়মৰ এছআৰ টিভি কোম্পানীত কাম কৰি আছিল ঘৰৰ আটাইকেইজন সদস্যই। কিন্তু দুৰ্ভাগ্যবশত: ১০জুন তাৰিখে এক শোকাৱহ বিদ্যুৎ দূৰ্ঘটনাত থিতাতে প্ৰাণ হেৰুৱাইছিল মাতৃ সাবিত্ৰী ঘোষে । ইয়াৰ পিছতে ১৫জুনত চিকিৎসাধীন অৱস্থাতে মৃত্যু হয় পুত্ৰ সঞ্জীৱ ঘোষৰো । তাৰ পিছৰ পৰাই তামিলনাডুত আৱদ্ধ হৈ আছিল দুৰ্ভগীয়া পৰিয়ালটো।

অৱশেষত স্বগৃহলৈ অনাৰ ব্যৱস্থা কৰা হ’ল সঞ্জীৱ ঘোষৰ মৃতদেহৰ লগতে দুৰ্ভগীয়া পৰিয়ালটোক । অসম চৰকাৰক ৰাইজৰ অনুৰোধ পৰিয়ালটোক সহায় কৰিবলৈ চৰকাৰৰ ওচৰত অনুৰোধ জনাইছে স্থানীয় ৰাইজে। আনহাতে ৰঙিয়াৰ বিধায়ক ভৱেশ কলিতাকো সহায় কৰিবলৈ ৰাইজে আহ্বান জনাইছে ।

---------------

হিন্দুস্থান সমাচাৰ / প্ৰকাশ ডেকা