নতুন দিল্লী, ১৭ জুন (হি.স.)। প্ৰধানমন্ত্ৰী নৰেন্দ্ৰ মোদীয়ে ইভিয়ানত অনুষ্ঠিত জি-৭ শীৰ্ষ সন্মিলনৰ আঁৰত আজি ইউৰোপীয় পৰিষদৰ সভাপতি এণ্টনিঅ’ কোষ্টা আৰু ইউৰোপীয় আয়োগৰ সভাপতি উৰ্চুলা ভন ডেৰ লেয়েনৰ সৈতে দ্বিপাক্ষিক বৈঠকত মিলিত হয়।

ভাৰত-ইউৰোপীয় সংঘ (ইউৰোপীয় ইউনিয়ন)ৰ মুক্ত বাণিজ্য চুক্তিত আগতীয়া স্বাক্ষৰ আৰু কাৰ্যকৰীকৰণৰ ওপৰত গুৰুত্ব আৰোপ কৰে নেতাসকলে। তেওঁলোকৰ মতে ইয়াৰ দ্বাৰা বাণিজ্য আৰু বিনিয়োগৰ বাবে উল্লেখযোগ্য সুযোগ মুকলি হ’ব আৰু যোগান শৃংখলৰ বৈচিত্ৰ্যতা বৃদ্ধিত সহায়ক হ’ব। বৰ্তমানৰ অস্থিৰ ভূ-ৰাজনৈতিক পৰিৱেশত এই কথা বিশেষভাৱে গুৰুত্বপূৰ্ণ।

বৈদেশিক পৰিক্ৰমা মন্ত্ৰালয়ৰ তথ্য অনুসৰি ২০২৬ চনৰ জানুৱাৰী মাহত অনুমোদিত যুটীয়া ভাৰত-ইউৰোপীয় ইউনিয়নৰ সৰ্বাংগীন কৌশলগত কাৰ্যসূচীৰ ওপৰত নেতাসকলে অগ্ৰগতিৰ বিষয়ে চৰ্চা কৰি ভাৰত-ইউৰোপীয় ইউনিয়নৰ কৌশলগত অংশীদাৰিত্বক আৰু অধিক শক্তিশালী কৰি তুলিব আৰু দুয়োপক্ষৰ বাবে লাভজনক আৰু পৰিৱৰ্তনশীল ফলাফল প্ৰদান কৰিব বুলি একমত প্ৰকাশ কৰে।

পাৰস্পৰিক স্বাৰ্থৰ আঞ্চলিক আৰু বিশ্বব্যাপী বিষয়সমূহৰ ওপৰত মত বিনিময় কৰাৰ সময়ত নেতাসকলে পশ্চিম এছিয়াৰ উন্নয়নক আদৰণি জনায়। তেওঁলোকে শান্তি আৰু স্থিতিশীলতা, সমৃদ্ধি, আৰু বহনক্ষম উন্নয়নত অৰিহণা যোগোৱা এক শক্তিশালী বহুমেৰু বিশ্বব্যৱস্থা গঢ়ি তোলাৰ বাবে তেওঁলোকৰ ভাগ-বতৰা প্ৰতিশ্ৰুতি পুনৰবাৰ উল্লেখ কৰে।

মন কৰিবলগীয়া যে বিশ্বৰ দুখন বৃহত্তম গণতন্ত্ৰ আৰু মুক্ত বজাৰ অৰ্থনীতি, আৰু বৈচিত্ৰময় সমাজ হিচাপে ভাৰত আৰু ইউৰোপীয় ইউনিয়নৰ মাজত আস্থা, ভাগ-বতৰা কৰা মূল্যবোধ, আৰু ভৱিষ্যতৰ বাবে এক উমৈহতীয়া দৃষ্টিভংগীৰ ওপৰত ভিত্তি কৰি সম্পৰ্ক আছে।

উল্লেখ্য যে ২০২৬ চনৰ জানুৱাৰী মাহত ভাৰতত অনুষ্ঠিত হোৱা ১৬ সংখ্যক ভাৰত-ইউৰোপীয় ইউনিয়নৰ সন্মিলনৰ পিছত ভাৰত-ইউৰোপীয় ইউনিয়নৰ দ্বিপাক্ষিক সম্পৰ্কত হোৱা উল্লেখযোগ্য অগ্ৰগতিক নেতাসকলে আদৰণি জনায় ৷

হিন্দুস্থান সমাচাৰ / মনোজ কুমাৰ শইকীয়া