নতুন দিল্লী, ১৭ জুন (হি.স.)। কংগ্ৰেছ নেতা ৰাহুল গান্ধীৰ কোটাত ছাত্ৰ সংলাপ কাৰ্যসূচীক লৈ ৰাজনৈতিক বাক্যবাণ তীব্ৰতৰ হৈ পৰিছে। ভাৰতীয় জনতা পাৰ্টিয়ে ৰাহুল গান্ধীক নীট পৰীক্ষাৰ মাত্ৰ তিনিদিন পূৰ্বে এনে এক অনুষ্ঠান আয়োজন কৰি ছাত্ৰ-ছাত্ৰীৰ ভৱিষ্যত বিপন্ন কৰাৰ অভিযোগ উত্থাপন কৰি তীব্ৰ আক্ৰমণ চলাইছে।

বুধবাৰে বিজেপিৰ ৰাষ্ট্ৰীয় মুখপাত্ৰ ড০ সুধাংশু ত্ৰিবেদীয়ে দলৰ মুখ্য কাৰ্যালয়ত এক সংবাদমেলযোগে কয় যে মাত্ৰ তিনিদিনৰ ভিতৰতে নীট পৰীক্ষা পুনৰ অনুষ্ঠিত হোৱাৰ কথা। সকলো ছাত্ৰ-ছাত্ৰীয়ে অধ্যৱসায়ীভাৱে পৰীক্ষাৰ বাবে প্ৰস্তুতি চলাই থকাৰ সময়তে চৰকাৰে পৰম সংবেদনশীলতা আৰু সতৰ্কতাৰে কাম কৰি আছে যাতে সমগ্ৰ প্ৰক্ৰিয়াটো শৃংখলাবদ্ধভাৱে সম্পন্ন হয়।

তেওঁ কয় যে চৰকাৰে সংবেদনশীলতাৰে কাম কৰি থকা সত্ত্বেও বিৰোধী দলপতি ৰাহুল গান্ধীয়ে ধূৰ্ততাৰ আশ্ৰয় লোৱা যেন লাগে। তেওঁ কয় যে ৰাহুল গান্ধীয়ে ছাত্ৰ জীৱনত অসফল হৈছিল, কাম কৰা কোম্পানীতো অসফল হৈছিল, চলোৱা কোম্পানীতো অসফল হৈছিল, নেতা হিচাপেও বিফল হৈছিল।

বিজেপিৰ মুখপাত্ৰ ত্ৰিবেদীয়ে প্ৰশ্ন কৰে যে পৰীক্ষাৰ আগৰ যোৱা ৭২ ঘণ্টাত, যেতিয়া পৰীক্ষাৰ্থীয়ে সম্পূৰ্ণ একাগ্ৰতা আৰু মানসিক শিথিলতাৰে চূড়ান্ত ৰাউণ্ডৰ বাবে প্ৰস্তুতি চলোৱাৰ কথা, তেনে অনুষ্ঠান আয়োজন কৰি, তেওঁলোকৰ একাগ্ৰতা বিঘ্নিত কৰি, তেওঁলোকৰ মনত ভয় আৰু মানসিক চাপৰ সৃষ্টি কৰি কংগ্ৰেছে কিয় মানসিক নিৰ্যাতন চলাবলৈ চেষ্টা কৰিছে।

ত্ৰিবেদীয়ে প্ৰশ্ন কৰে যে যেতিয়া ইতিমধ্যে পৰীক্ষা পুনৰ অনুষ্ঠিত কৰাৰ সিদ্ধান্ত লোৱা হৈছে আৰু ন্যায়পালিকাই বিষয়টোৰ প্ৰতি লক্ষ্য ৰাখিছে, তেতিয়া কংগ্ৰেছে এতিয়া কি দাবী কৰিছে? ৰাজস্থানক প্ৰতিবাদৰ কেন্দ্ৰবিন্দু কৰি তোলাৰ ওপৰতো প্ৰশ্ন উত্থাপন কৰে। ত্ৰিবেদীয়ে কয় যে কংগ্ৰেছ চৰকাৰৰ কাৰ্যকালত ৰাজস্থানত ১৯খন পৰীক্ষাৰ কাগজ ফাদিল হৈছিল যদিও কোনো এটা গোচৰতে কোনো ব্যৱস্থা গ্ৰহণ কৰা হোৱা নাছিল। ইফালে বিজেপি চৰকাৰৰ কাৰ্যকালৰ যোৱা ডেৰ-দুবছৰত এখনো প্ৰশ্ন কাকত ফাদিল হোৱা নাই।

ৰাহুল গান্ধীৰ ৰেলীৰ বাবে ছাত্ৰ-ছাত্ৰীৰ বৃহৎ ভিৰ গোটাবলৈ হোষ্টেল, পি জি, গেষ্ট হাউছৰ মালিকৰ ওপৰত হেঁচা প্ৰয়োগ কৰা বুলি অভিযোগ উত্থাপন কৰে বিজেপি নেতাগৰাকীয়ে। পৰীক্ষাৰ মাত্ৰ ৭২ ঘণ্টা আগতে কিয় এনে কৰা হৈছে বুলি তেওঁ প্ৰশ্ন কৰে।

কংগ্ৰেছে সুপৰিকল্পিত ষড়যন্ত্ৰৰ আয়োজন কৰাৰ অভিযোগ উত্থাপন কৰি বিজেপিৰ মুখপাত্ৰ ত্ৰিবেদীয়ে কয় যে এয়া কংগ্ৰেছৰ “টুলকিট মানসিকতাৰ” উদাহৰণ। যেতিয়া পুনৰ পৰীক্ষাৰ সিদ্ধান্ত ইতিমধ্যে লোৱা হৈছে আৰু আদালতে বিষয়টোৰ প্ৰতি লক্ষ্য ৰাখিছে, তেতিয়া আপুনি কি দাবী কৰিছে?

হিন্দুস্থান সমাচাৰ / মনোজ কুমাৰ শইকীয়া