নতুন দিল্লী, ১৬ জুন (হি.স.)। আমেৰিকা আৰু ইৰাণৰ মাজত হোৱা চুক্তি আৰু আন্তঃৰাষ্ট্ৰীয় খাৰুৱা তেলৰ মূল্য হ্ৰাসৰ ফলত সহায়ক হৈ শ্বেয়াৰ বজাৰখন একেৰাহে তৃতীয়টো ব্যৱসায়িক দিনত লাভৰ সৈতে বন্ধ হৈ পৰে। আজিৰ ট্ৰেডিং সৱল ৰূপত আৰম্ভ হৈছিল।
প্ৰথম অধিবেশনত বজাৰখন অবিৰতভাৱে উঠা-নমা কৰিছিল যদিও দ্বিতীয় অধিবেশনত ক্ৰেতাসকলে নিজৰ ক্ৰয় ক্ষমতা শক্তিশালী কৰিছিল। ক্ৰয়ৰ দ্বাৰা সমৰ্থিত হৈ চেন্সেক্স আৰু নিফটি দুয়োটা সূচকাংকই যথেষ্ট লাভ কৰিবলৈ সক্ষম হয়। দিনটোৰ ব্যৱসায়িক অধিবেশনৰ পিছত ০.৭১ শতাংশ আৰু নিফ্টীৰ ০.৫৭ শতাংশ বৃদ্ধিৰে বন্ধ হয়।
আই টি, গ্ৰাহক টেকসই সামগ্ৰী, শক্তি, আৰু সংবাদ মাধ্যম খণ্ডৰ ষ্টকত গোটেই দিনটো অবিৰত ক্ৰয় চলি থাকিল। একেদৰে এফএমচিজি, ৰিয়েলটি, বেংকিং, মূলধনী সামগ্ৰী, তেল আৰু গেছ, ৰাজহুৱা খণ্ডৰ উদ্যোগ, আৰু টেক সূচকাংকসমূহো লাভৰ সৈতে বন্ধ হৈ পৰে। আনহাতে, ধাতু, ঔষধ, আৰু অটোমোবাইল খণ্ডৰ ষ্টক আজিও বিক্ৰীৰ চাপৰ সন্মুখীন হৈয়েই আছে। বহল বজাৰত ক্ৰয় কাৰ্যকলাপ অব্যাহত থকাৰ ফলত নিফ্টি মিডকেপ সূচকাংক ০.৪১ শতাংশ বৃদ্ধিৰে বন্ধ হয়। একেদৰে স্মলকেপ সূচকাংকত ০.৪২ শতাংশ বৃদ্ধিৰে ব্যৱসায়ৰ অন্ত পৰে।
আজিৰ দিনত ষ্টক মাৰ্কেটৰ শক্তিশালী প্ৰদৰ্শনৰ বাবে ষ্টক মাৰ্কেট বিনিয়োগকাৰীৰ সম্পদ প্ৰায় ২.৭৫ লাখ কোটি টকা বৃদ্ধি পাইছে। আজিৰ ব্যৱসায়ৰ পিছত বিএছইত তালিকাভুক্ত কোম্পানীসমূহৰ বজাৰ মূলধন ৪৭২.২৬ লাখ কোটি (অস্থায়ী)লৈ বৃদ্ধি পায়। পূৰ্বৰ ব্যৱসায়িক দিন সোমবাৰে তেওঁলোকৰ বজাৰ মূলধন আছিল ₹৪৬৯.৫৫ লাখ কোটি। ফলস্বৰূপে আজিৰ ব্যৱসায়ৰ পৰা বিনিয়োগকাৰীয়ে প্ৰায় ২.৭১ লাখ কোটি টকা লাভ কৰে।
দিনটোৰ ব্যৱসায়ৰ সময়ছোৱাত বিএছইত ৪৪০৭টা ষ্টক সক্ৰিয়ভাৱে ব্যৱসায় কৰা হৈছিল। ইয়াৰে ২,৩৬৮টা শ্বেয়াৰ লাভৰ সৈতে বন্ধ হয়, আনহাতে ১,৮৮৬টা শ্বেয়াৰ হ্ৰাস পায়, আৰু ১৫৩টা শ্বেয়াৰ অপৰিৱৰ্তিতভাৱে বন্ধ হয়। আজি এন এছ ইত ৩,০০৭ টা শ্বেয়াৰৰ সক্ৰিয় ব্যৱসায় সংঘটিত হয়। ইয়াৰে ১৭৩২টা শ্বেয়াৰ গ্ৰীণত বন্ধ হৈ লাভৰ সূচনা কৰাৰ বিপৰীতে ১২৭৫টা শ্বেয়াৰ ৰঙা সূচকত বন্ধ হৈ লোকচান লাভ কৰে। একেদৰে চেন্সেক্সত অন্তৰ্ভুক্ত ৩০টা শ্বেয়াৰৰ ভিতৰত ২১টা শ্বেয়াৰ লাভৰ সৈতে আৰু ৯টা লোকচানৰ সৈতে বন্ধ হয়। নিফটিত অন্তৰ্ভুক্ত ৫০টা শ্বেয়াৰৰ ভিতৰত ২৯টা সেউজীয়া, আৰু ২১টা ৰঙা সূচকত বন্ধ হয়।
আজি বিএছই চেন্সেক্সে ২৬২.৪৪ পইণ্ট বৃদ্ধিৰে ৭৬,৫২৬.৭৭ পইণ্টত মুকলি কৰে। ব্যৱসায় আৰম্ভ হোৱাৰ লগে লগে ক্ৰেতা আৰু বিক্ৰেতাই ইজনে সিজনক আধিপত্য বিস্তাৰ কৰিবলৈ চেষ্টা কৰিবলৈ ধৰিলে, যাৰ ফলত সূচকাংকৰ গতিবিধিৰ উঠা-নমা হ’ল। বিক্ৰীৰ চাপৰ বাবে সূচকাংক ৭৬,৪৪৩.৩৪ পইণ্টলৈ হ্ৰাস পায়।
কিন্তু দিনটোৰ দ্বিতীয় অধিবেশনত ক্ৰয়ৰ চাপ বৃদ্ধি পোৱাৰ লগে লগে সূচকাংকৰ গতি বৃদ্ধি পায়। দিনটোৰ ব্যৱসায়ৰ পিছত চেন্সেক্সৰ মূল্য ৫৪৪.১৫ পইণ্ট বৃদ্ধি পাই ৭৬,৮০৮.৪৮ পইণ্টত বন্ধ হয়। চেন্সেক্সৰ দৰেই এন এছ ই নিফটিয়েও ৭০ পইণ্ট জপিয়াই ২৩,৯২৩.৯০ পইণ্টত মুকলি কৰে। বজাৰ খোলাৰ পিছত দিনটোৰ প্ৰথম অধিবেশনত সূচকাংকৰ গতিৰ উঠা-নমা অব্যাহত থাকে। দ্বিতীয় অধিবেশনত ক্ৰেতাসকলে ক্ৰয়ৰ চাপ তীব্ৰতৰ কৰি তুলিলে, যাৰ বাবে নিফ্টীয়ে ১৩৫.২৫ পইণ্ট বৃদ্ধিৰে ২৩,৯৮৯.১৫ পইণ্টত বন্ধ হয়।
গোটেই দিনটোৰ ব্যৱসায়ৰ পিছত শ্বেয়াৰ বজাৰৰ হেভিৱেটৰ ভিতৰত এইচ চি এল টেকন’লজিছে ৩.৫৫ শতাংশ, টাটা কনজিউমাৰ প্ৰডাক্টছ ২.৭৭ শতাংশ, এন টি পি চি ২.১৪ শতাংশ, বাজাজ ফিনচাৰ্ভ ২.১২ শতাংশ আৰু হিন্দুস্তান ইউনিলিভাৰে ২.০৩ শতাংশ বৃদ্ধি পাই আজি শীৰ্ষ ৫ টা লাভৰ তালিকাত যোগদান কৰে। আনহাতে, হিণ্ডালকো ইণ্ডাষ্ট্ৰীজৰ ৩.১১ শতাংশ, জে এছ ডব্লিউ ষ্টীল ১.৭১ শতাংশ, এইচ ডি এফ চি লাইফ ১.১৭ শতাংশ, এপ’ল’ হাস্পতালত ০.৯২ শতাংশ আৰু আইচাৰ মটৰ্ছৰ ০.৮৪ শতাংশ হ্ৰাস পাই আজি শীৰ্ষ ৫ টা লোকচানৰ তালিকাত চামিল হয়।
হিন্দুস্থান সমাচাৰ / মনোজ কুমাৰ শইকীয়া
