কামৰূপ, ১৬ জুন (হি.স.): বস্ত্ৰ নগৰী শুৱালকুছিত অবৈধ সুৰা ব্যৱসায়ীৰ বিৰুদ্ধে যোৱা কালি সোমবাৰে নিশা আবকাৰীৰ বিভাগৰ তীব্ৰ অভিযান চলে । অভিযানত বৃহৎ পৰিমানৰ সুৰাৰ সৈতে মিঠুন মড়ল নামৰ অবৈধ সুৰা ব্যৱসায়ীক আটক কৰা হয় ।
শুৱালকুছি মূল প্ৰৱেশদ্বাৰৰ সমুখত যোৱা কিছুদিন ধৰি গঢ় লৈ উঠিছে কেইবাখনো অবৈধ বিলাতী সুৰাৰ দোকান । দৈনিক পুৱা পৰা নিশালৈকে অঞ্চলটোত মুকলি ভাৱে চলাই আছিল দেশী বিদেশী সুৰা ৰমৰমীয়া বেপাৰ । যাৰ পৰিণতিত অঞ্চলটোত সংঘটিত হৈছিল বিভিন্নধৰণৰ অপৰাধমূলক ঘটনা । যাৰবাবে এই অবৈধ সুৰা ব্যৱসায়ী বিৰুদ্ধে নিশা অভিযান চলালে শুৱালকুছি আৰক্ষীৰ সহযোগত কামৰূপ আবকাৰী বিভাগে ।
কামৰূপৰ আবকাৰী বিভাগৰ উপ আৰক্ষী অধীক্ষক দিপক শৰ্মাৰ নেতৃত্বত চলে এই অভিযান । অভিযানত প্ৰায় ৩ লাখ টকা মূলৰ দেশী বিদেশী সুৰা জব্দ কৰিবলৈ সক্ষম হয় আবকাৰী বিভাগে । লগতে আটক কৰা হয় অবৈধ সুৰা ব্যৱসায়ৰ লগত জড়িত মিঠুন মড়লক।
হিন্দুস্থান সমাচাৰ / কিশোৰ মিশ্ৰ