ব্ৰাটিছলাভা, ১৫ জুন (হি.স.)। ইউৰোপৰ দেশ শ্লোভাকিয়াৰ প্ৰধানমন্ত্ৰী ৰবাৰ্ট ফিকোৱে ইউক্ৰেইনলৈ যোগান ধৰা সামৰিক সঁজুলি আৰু অস্ত্ৰ-শস্ত্ৰৰ বাবে ইউৰোপীয় সংঘৰ পৰা ক্ষতিপূৰণ বিচাৰিব বুলি ঘোষণা কৰিছে। দেওবাৰে ফেচবুকত ভিডিঅ’ বাৰ্তাযোগে ফিকোৱে অভিযোগ কৰে যে ইউক্ৰেইনৰ সাহায্য চুক্তি সন্দৰ্ভত পূৰ্বৰ চৰকাৰে শ্লোভাক জনসাধাৰণক বিপথে পৰিচালিত কৰিছিল।

ৰাছিয়াৰ আন্তঃৰাষ্ট্ৰীয় বাতৰি টেলিভিছন নেটৱৰ্ক ৰাছিয়া টুডেৰ তথ্য অনুসৰি প্ৰধানমন্ত্ৰী ফিকোৱে কয় যে ২০২২ আৰু ২০২৩ চনৰ ভিতৰত তেতিয়াৰ প্ৰধানমন্ত্ৰী এডুয়াৰ্ড হেগাৰৰ চৰকাৰে ইউক্ৰেইনলৈ বৃহৎ পৰিমাণৰ সামৰিক সাহায্য প্ৰেৰণ কৰিছিল, যাৰ ফলত শ্লোভাকিয়াৰ নিৰাপত্তা সামৰ্থ্যৰ সৈতে আপোচ কৰা হৈছিল। তেওঁৰ মতে, দেশখন প্ৰায় সম্পূৰ্ণ অসুৰক্ষিত হৈ পৰিল। ইউক্ৰেইনৰ সংঘাতৰ তীব্ৰতা বৃদ্ধিৰ পিছত শ্লোভাকিয়াই কিয়েভক ছোভিয়েট যুগৰ বহুতো টেংক, পদাতিক যুদ্ধ বাহন, মিকোয়ান মিগ-২৯ যুঁজাৰু বিমান আৰু এছ-৩০০ বায়ু প্ৰতিৰক্ষা ব্যৱস্থা প্ৰদান কৰে। কিল ইনষ্টিটিউট ফৰ দ্য ৱৰ্ল্ড ইকনমিৰ তথ্য অনুসৰি ২০২২ চনৰ পৰা ২০২৩ চনৰ ভিতৰত শ্লোভাকিয়াই ইউক্ৰেইনলৈ প্ৰায় ৭০ কোটি ইউৰো (৭,৬৮৭ কোটি) মূল্যৰ সামৰিক সঁজুলি দান কৰিছিল।

প্ৰধানমন্ত্ৰী ফিকোৱে কয় যে তেওঁ আগন্তুক ইউৰোপীয় ইউনিয়নৰ শীৰ্ষ সন্মিলনত এই বিষয়টোৰ ওপৰত আলোকপাত কৰিব আৰু ইউক্ৰেইনক দান কৰা সামৰিক সঁজুলিৰ বাবে আৰ্থিক বা সামৰিক ক্ষতিপূৰণৰ দাবী জনাব। পূৰ্বৰ চুক্তি অনুসৰি শ্লোভাকিয়াই দান কৰা অস্ত্ৰ-শস্ত্ৰসমূহৰ ক্ষতিপূৰণ পশ্চিমীয়া দেশসমূহে নিৰ্মাণ কৰা সামৰিক সঁজুলিৰে প্ৰদান কৰিব লাগিছিল, যিবোৰ মূলতঃ জাৰ্মানীয়ে যোগান ধৰিছিল। কিন্তু শ্লোভাকিয়াৰ প্ৰতিৰক্ষা মন্ত্ৰালয়ে পূৰ্বে এই ব্যৱস্থাক অপৰ্যাপ্ত বুলি সমালোচনা কৰিছিল, কিয়নো জাৰ্মানীয়ে মাত্ৰ আধা সঁজুলিৰ ক্ষতিপূৰণ দিয়াৰ প্ৰতিশ্ৰুতি দিছিল। ফিকো দীৰ্ঘদিন ধৰি ইউৰোপীয় ইউনিয়নৰ ৰাছিয়া-ইউক্ৰেইন নীতিৰ সমালোচক হৈ আহিছে। এই বছৰ মস্কোত বিজয় দিৱস উদযাপনত অংশগ্ৰহণ কৰা ইউৰোপীয় ইউনিয়নৰ একমাত্ৰ নেতা আছিল তেওঁ।

ইউৰোপ আৰু ৰাছিয়াৰ মাজত ক্ৰমাৎ বৃদ্ধি পোৱা উত্তেজনাক তেওঁ নিউ আইৰণ কৰ্টেন (নতুন বিভাজন ৰেখা)ৰ ভাবুকি বুলি অভিহিত কৰে, আলোচনা আৰু কূটনৈতিক সমাধানৰ ওপৰত গুৰুত্ব আৰোপ কৰে। ইউৰোপীয় ইউনিয়নৰ ৰাছিয়া বিৰোধী নীতি আৰু নিষেধাজ্ঞাক সমালোচনা কৰি তেওঁ কয় যে ইয়াৰ ফলত ইউৰোপীয় দেশসমূহৰ প্ৰতিযোগিতামূলক ক্ষমতা আৰু শক্তিৰ ব্যয়ত প্ৰভাৱ পৰিছে। ফিকোৱে দাবী কৰে যে ইউৰোপে শক্তিৰ বৰ্ধিত মূল্য আৰু অৰ্থনৈতিক প্ৰত্যাহ্বানৰ সন্মুখীন হ’লেও ইউৰোপীয় ইউনিয়নে ইউক্ৰেইনৰ প্ৰতি সমৰ্থন অব্যাহত ৰাখিবলৈ প্ৰতিশ্ৰুতিবদ্ধ হৈ আছে।

আনহাতে ৰাছিয়াই কেতিয়াও আলোচনাত অস্বীকাৰ কৰা নাই বুলি উল্লেখ কৰিছে৷ মস্কোৱে অভিযোগ কৰে যে পশ্চিমীয়া নীতিয়ে সংঘাত দীঘলীয়া কৰি তুলিছে আৰু শান্তিৰ প্ৰচেষ্টাক ক্ষতিগ্ৰস্ত কৰিছে।

হিন্দুস্থান সমাচাৰ / মনোজ কুমাৰ শইকীয়া