ইম্ফল, ১৫ জুন (হি.স.)। মণিপুৰৰ কাংপোকপি জিলাত গুলীচালনাৰ ঘটনাত আহত তিনিজন কুকি লোকক চিকিৎসাৰ বাবে আঞ্চলিক চিকিৎসা বিজ্ঞান প্ৰতিষ্ঠানলৈ অনাৰ পাছতে সোমবাৰে চিকিৎসালয় চৌহদত উত্তেজনাপূৰ্ণ পৰিস্থিতিৰ সৃষ্টি হয়। ক্ৰমান্বয়ে প্ৰতিবাদ তীব্ৰতৰ হৈ পৰাত নিৰাপত্তা বাহিনীয়ে কন্দুৱা গেছ ব্যৱহাৰ কৰি জনসমাগম নিয়ন্ত্ৰণ কৰিবলৈ বাধ্য হয়।

খবৰ অনুসৰি কাংপকপি জিলাৰ লেইলন ভাইফেই আৰু কনছাখুল গাঁৱৰ সমীপত সংঘটিত হোৱা গুলীচালনাত আহত তিনিজন লোকক বিশেষ চিকিৎসাৰ বাবে ৰিমছত ভৰ্তি কৰোৱা হৈছে। তেওঁলোক আহি পোৱাৰ লগে লগে চিকিৎসালয়খনৰ মূল গেটত এক বৃহৎ সংখ্যক প্ৰতিবাদকাৰীয়ে সমবেত হৈ ভৰ্তিৰ বিৰোধিতা কৰি শ্লোগান দিবলৈ আৰম্ভ কৰে।

একাংশ প্ৰতিবাদকাৰীয়ে নিৰাপত্তাৰক্ষীৰ বেহু ভাঙি চিকিৎসালয়ৰ চৌহদত প্ৰৱেশ কৰাত পৰিস্থিতি আৰু অধিক উত্তেজিত হৈ পৰে। আহত লোককেইজন প্ৰতিদ্বন্দ্বী কুকি গোটৰ বুলি অভিযোগ উত্থাপন কৰে প্ৰতিবাদকাৰীসকলে। ইফালে, সদৌ নগা ছাত্ৰ সন্থা মণিপুৰৰ প্ৰতিনিধিয়ে আহতসকলক চিকিৎসালয়লৈ লৈ যোৱা ভাৰতীয় নিৰাপত্তা বাহিনীৰ এস্কৰ্টক লৈ প্ৰশ্ন উত্থাপন কৰি ঘটনাৰ নিৰপেক্ষ তদন্তৰ দাবী জনায়।

প্ৰতিবাদ তীব্ৰতৰ হোৱাৰ লগে লগে একাংশ লোকে চিকিৎসালয়খনৰ জৰুৰীকালীন ৱাৰ্ডৰ ফালে আগবাঢ়িবলৈ আৰম্ভ কৰে, যাৰ ফলত নিৰাপত্তা বাহিনী আৰু প্ৰতিবাদকাৰীৰ মাজত সংঘাতৰ সৃষ্টি হয়। আইন-শৃংখলা বজাই ৰাখিবলৈ আৰু ৰাইজক ছত্ৰভংগ দিবলৈ নিৰাপত্তাৰক্ষীয়ে কন্দুৱা গেছ নিক্ষেপ কৰে, তাৰ পিছত প্ৰতিবাদকাৰীসকলে চিকিৎসালয় চৌহদৰ পৰা আঁতৰি যায়।

অৱশ্যে চিকিৎসালয়ৰ বাহিৰত বিভিন্ন গোটৰ প্ৰতিবাদ অব্যাহত থাকে। কোনো ধৰণৰ অশুভ কাণ্ড ৰোধ কৰিবলৈ ৰিমছ আৰু ইয়াৰ আশে-পাশে নিৰাপত্তা কটকটীয়া কৰা হৈছে। এই বাতৰি লিখাৰ সময়লৈকে এই কাণ্ডত কোনো অতিৰিক্ত আঘাতপ্ৰাপ্ত বা গ্ৰেপ্তাৰৰ কোনো আনুষ্ঠানিক নিশ্চয়তা হোৱা নাছিল, আৰু প্ৰতিবাদকাৰীসকলে উত্থাপন কৰা অভিযোগ সন্দৰ্ভত প্ৰশাসনে কোনো আনুষ্ঠানিক বিবৃতি প্ৰকাশ কৰা হোৱা নাছিল।

---------------

হিন্দুস্থান সমাচাৰ / অৰৱিন্দ