জেনেভা/নিউয়ৰ্ক, ১৫ জুন (হি.স.)। বিশ্বৰ নেতা আৰু আন্তঃৰাষ্ট্ৰীয় সংস্থাসমূহে আমেৰিকা আৰু ইৰাণৰ মাজত হোৱা শান্তি চুক্তিক আদৰণি জনাইছে। ১৯ জুনত ছুইজাৰলেণ্ডত স্বাক্ষৰিত আৰু কাৰ্যকৰী হোৱা এই প্ৰস্তাৱিত চুক্তিখনে সামুদ্ৰিক অৱৰোধ প্ৰত্যাহাৰ কৰি হৰমুজ জলদ্বীপ পুনৰ মুকলি কৰিব।
ইৰাণৰ চৰকাৰী সংবাদ সংস্থা প্ৰেছইডি টিভিয়ে প্ৰকাশ কৰা অনুসৰি চুক্তিখন চূড়ান্ত হোৱাৰ পিছত ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে এই চুক্তিক বিবাদ সমাধানৰ দিশত এক “গুৰুত্বপূৰ্ণ পদক্ষেপ” বুলি অভিহিত কৰিছে। তেওঁ আশা প্ৰকাশ কৰে যে সকলো পক্ষই এই সুযোগ গ্ৰহণ কৰি স্থায়ী সমাধানৰ দিশত আগবাঢ়ি যাব।
কাটাৰৰ প্ৰধানমন্ত্ৰী শ্বেইখ মহম্মদ বিন আব্দুল ৰহমান আল থানীয়ে এই চুক্তিক আদৰণি জনাই আশা প্ৰকাশ কৰে যে সকলো পক্ষই ভৱিষ্যতে “ইতিবাচক আৰু গঠনমূলক মনোভাৱে” আলোচনাত লিপ্ত হ’ব। তুৰ্কীৰ ৰাষ্ট্ৰপতি ৰেচেপ টাইপ এৰদোগান আৰু বৈদেশিক মন্ত্ৰী হাকান ফিডানে এই চুক্তিক আঞ্চলিক শান্তি আৰু স্থিতিশীলতাৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। লগতে সকলো পক্ষকে কোনো ধৰণৰ উচটনিমূলক কামৰ পৰা বিৰত থাকিবলৈ আহ্বান জনায়।
ব্ৰিটেইন, ফ্ৰান্স, জাৰ্মানী আৰু ইটালীয়ে যৌথ বিবৃতি প্ৰকাশ কৰি কয় যে ইৰাণে নিজৰ পাৰমাণৱিক কাৰ্যসূচীৰ ওপৰত স্পষ্ট আৰু পৰীক্ষাযোগ্য পদক্ষেপ গ্ৰহণ কৰিলে নিষেধাজ্ঞাৰ সকাহ দিবলৈ সাজু।
ইউৰোপীয় সংঘৰ বৈদেশিক নীতিৰ মুৰব্বী কাজা কালাছে এই চুক্তিক “সম্ভাৱ্যভাৱে বৃহৎ কূটনৈতিক অগ্ৰগতি” বুলি অভিহিত কৰিছে। ইউৰোপীয় আয়োগৰ সভানেত্ৰী উৰ্চুলা ভন ডেৰ লেয়েনে কয় যে হৰমুজ জলদ্বীপ পুনৰ মুকলি কৰাটো বিশ্ব অৰ্থনীতি আৰু আঞ্চলিক স্থিতিশীলতাৰ বাবে অতি গুৰুত্বপূৰ্ণ হ’ব।
ব্ৰিটিছ প্ৰধানমন্ত্ৰী কেয়াৰ ষ্টাৰমাৰে এই চুক্তিক যুদ্ধৰ অন্ত পেলোৱা আৰু আঞ্চলিক স্থিতিশীলতা পুনৰুদ্ধাৰৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। ফ্ৰান্সৰ ৰাষ্ট্ৰপতি ইমানুৱেল মেক্ৰনেও এই চুক্তিক কূটনৈতিক প্ৰচেষ্টাৰ সফল বুলি প্ৰশংসা কৰি ইয়াক দ্ৰুত আৰু সম্পূৰ্ণ ৰূপায়ণৰ আহ্বান জনায়। জাৰ্মানীৰ চ্যান্সেলৰ ফ্ৰেড্ৰিখ মেৰ্জে ইয়াক বিশ্ব অৰ্থনীতি আৰু মধ্যপ্ৰাচ্যৰ নিৰাপত্তাৰ বাবে এক ইতিবাচক সুযোগ বুলি অভিহিত কৰি দুয়োপক্ষক অভিনন্দন জনায়।
জাপানৰ প্ৰধানমন্ত্ৰী ছানাই তাকাইচি আৰু স্পেইনৰ বৈদেশিক মন্ত্ৰী জোচে মেনুৱেল আলবাৰেজে এই সিদ্ধান্তক আদৰণি জনাই ইৰাণৰ পাৰমাণৱিক বিষয়ত অতি সোনকালে এক ব্যাপক চুক্তিত উপনীত হ’ব বুলি আশা প্ৰকাশ কৰে। বাংলাদেশৰ বৈদেশিক মন্ত্ৰালয়েও ইৰাণ আৰু আমেৰিকাৰ মাজত শান্তি চুক্তি চূড়ান্ত কৰাটো আদৰণি জনাই এক বিবৃতি প্ৰকাশ কৰি উত্তেজনা হ্ৰাস কৰাৰ দিশত ই এক ইতিবাচক উন্নয়ন বুলি অভিহিত কৰে।
অষ্ট্ৰেলিয়াৰ প্ৰধানমন্ত্ৰী এণ্টনি আলবানিজ আৰু নিউজিলেণ্ডৰ বৈদেশিক মন্ত্ৰী উইন্সটন পিটাৰ্ছেও এই চুক্তিক আদৰণি জনাই কয় যে দীৰ্ঘদিনীয়া বিবাদ সমাধানৰ বাবে আলোচনা আৰু কূটনীতি হৈছে আটাইতকৈ ফলপ্ৰসূ উপায় আৰু ইয়াক দ্ৰুত আৰু সম্পূৰ্ণ ৰূপায়ণৰ আহ্বান জনায়।
ইটালীৰ প্ৰধানমন্ত্ৰী জৰ্জিয়া মেল’নীয়ে ইয়াক “শান্তিৰ সুযোগ” বুলি অভিহিত কৰি হৰমুজ জলদ্বীপত সামুদ্ৰিক নিৰাপত্তাৰ প্ৰচেষ্টাত সহযোগিতা আগবঢ়ায়। নৰৱেৰ বৈদেশিক মন্ত্ৰী এছপেন বাৰ্থ আইডে কয় যে সাগৰীয় পথত মুক্তভাৱে চলাচল কৰাটো অতি প্ৰয়োজনীয় আৰু পাৰমাণৱিক কাৰ্যসূচীৰ আলোচনা অব্যাহত থাকিব লাগে। কলম্বিয়াৰ ৰাষ্ট্ৰপতি গুস্তাভো পেট্ৰ’ইও প্ৰস্তাৱিত চুক্তিখনক সমৰ্থন কৰি বিশ্ব শান্তিৰ দিশত এক ইতিবাচক পদক্ষেপ বুলি অভিহিত কৰে।
আন্তঃৰাষ্ট্ৰীয় সামুদ্ৰিক সংস্থাৰ সচিব প্ৰধান আৰ্চেনিঅ’ ডমিংগেজে কয় যে ভৱিষ্যতৰ এই চুক্তিখন সামুদ্ৰিক নিৰাপত্তা, আন্তঃৰাষ্ট্ৰীয় বাণিজ্য, আৰু জাহাজ চলোৱাৰ স্বাধীনতা পুনৰুদ্ধাৰৰ দিশত এক গুৰুত্বপূৰ্ণ পদক্ষেপ হ’ব।
আন্তঃৰাষ্ট্ৰীয় সমাজৰ মতে এই চুক্তি মধ্যপ্ৰাচ্যত উত্তেজনা হ্ৰাস কৰি আঞ্চলিক স্থিতিশীলতা প্ৰতিষ্ঠা কৰাৰ এক ঐতিহাসিক সুযোগ হিচাপে প্ৰমাণিত হ’ব পাৰে।
উল্লেখযোগ্য যে ২৮ ফেব্ৰুৱাৰীৰ পৰা আৰম্ভ হোৱা আমেৰিকা-ইৰাণৰ যুদ্ধ ১০৮ দিন ধৰি চলিছিল। অহা ১৯ জুনত চুইজাৰলেণ্ডত দুয়োখন দেশৰ মাজত হোৱা শান্তি চুক্তি স্বাক্ষৰিত হ’ব।
হিন্দুস্থান সমাচাৰ / মনোজ কুমাৰ শইকীয়া
