নতুন দিল্লী, ১৪ জুন (হি.স.)। দেওবাৰে বিশ্ব ৰক্তদাতা দিৱস উপলক্ষে সংসদীয় পৰিক্ৰমা মন্ত্ৰী তথা সংখ্যালঘু পৰিক্ৰমা মন্ত্ৰী কিৰেণ ৰিজিজু আৰু কংগ্ৰেছৰ সভাপতি মল্লিকাৰ্জুন খৰ্গেৰ লগতে আন কেইবাজনো মন্ত্ৰীয়ে ৰক্তদাতাসকলৰ প্ৰতি কৃতজ্ঞতা প্ৰকাশ কৰি এক বাৰ্তা প্ৰেৰণ কৰি সজাগতা বৃদ্ধিৰ আহ্বান জনায়।

এই উপলক্ষে কিৰেন ৰিজিজুৱে কয় যে, এটা ইউনিট তেজে আৰ্তজনৰ বাবে জীৱন আৰু মৃত্যুৰ মাজত পাৰ্থক্য সৃষ্টি কৰিব পাৰে। আহক আমি অধিক লোকক ৰক্তদান কৰিবলৈ অনুপ্ৰাণিত কৰোঁ আৰু জীৱন ৰক্ষা কৰাত সহায় কৰোঁ।

খৰ্গে কয়, ৰক্তদান কৰক। এটা জীৱন ৰক্ষা কৰক। বিশ্ব ৰক্তদাতা দিৱসত মই সেই অগণন স্বেচ্ছাসেৱী ৰক্তদাতাক প্ৰণাম আৰু ধন্যবাদ জনাইছো, যিসকলৰ নিস্বাৰ্থ কামে আৰ্তজনক আশা, আৰোগ্য আৰু জীৱনৰ নতুন সুযোগ দিয়ে।

কেন্দ্ৰীয় সাংস্কৃতিক আৰু পৰ্যটন মন্ত্ৰীয়ে কয়, বিশ্ব ৰক্তদাতা দিৱসৰ আন্তৰিক শুভেচ্ছা। ৰক্তদান এক মহান দান, আৰু ৰক্তদাতাসকল সমাজ আৰু মানৱতাৰ অমূল্য সেৱক। আহক আমি সকলোৱে আজি প্ৰতিশ্ৰুতি দিওঁ যে ৰক্তদান কৰি আমি মানৱ জীৱন ৰক্ষাৰ ক্ষেত্ৰত এক উল্লেখযোগ্য অৱদান আগবঢ়াম।

বস্ত্ৰ মন্ত্ৰী গিৰিৰাজ সিঙে কয়, বিশ্ব ৰক্তদান দিৱস উপলক্ষে আহক আমি সকলোৱে ৰক্তদানৰ প্ৰতিশ্ৰুতি দিওঁ। আপোনাৰ সৰু প্ৰচেষ্টাই কাৰোবাক নতুন জীৱন দিব পাৰে। ৰক্তদান কৰক, এটা জীৱন ৰক্ষা কৰক।

বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে কয় যে আহক আমি সকলোৱে একত্ৰিত হৈ ৰক্তদানক আমাৰ সামূহিক দায়িত্ব হিচাপে আকোৱালি লওঁ।

কেন্দ্ৰীয় গ্ৰাহক পৰিক্ৰমা মন্ত্ৰী প্ৰহ্লাদ যোশীয়ে কয় যে, আহক আমি সেৱাৰ মনোভাৱক উৎসাহিত কৰি যাওঁ আৰু অধিক সংখ্যক লোকক আগবাঢ়ি আহি ৰক্তদান কৰিবলৈ অনুপ্ৰাণিত কৰোঁ, যাৰ ফলত এখন সুস্থ আৰু অধিক দয়ালু সমাজৰ সৃষ্টি হওঁক।

হিন্দুস্থান সমাচাৰ / মনোজ কুমাৰ শইকীয়া