হাইলাকান্দি, ১৩ জুন (হি.স.)। হাইলাকান্দি জিলাৰ কাটলিছড়া জিপিৰ অন্তৰ্গত ৰাঙাবাক প্ৰথম খণ্ড এলেকাৰ বাগান ফেৰীঘাট সংলগ্ন পথৰ সংস্কাৰৰ দাবীত আজি পথলৈ ওলাই আহিল স্থানীয় বাসিন্দাসকল। দীৰ্ঘদিন ধৰি অৱহেলিত হৈ থকা এই পথটোৰ জৰাজীৰ্ণ অৱস্থাৰ বাবে এলেকাবাসীয়ে প্ৰতিদিনে চূড়ান্ত দুৰ্ভোগ ভুগিবলগীয়া হৈছে। স্থানীয় লোকসকলৰ অভিযোগ অনুসৰি, স্বাধীনতাৰ পিছত দেশৰ অধিকাংশ গ্ৰাম্য পথৰ উন্নয়ন হ’লেও এই গুৰুত্বপূৰ্ণ পথটোৰ প্ৰকৃত সংস্কাৰ আজিও হোৱা নাই।

কাগজে-কলমে দুবাৰ সংস্কাৰ কাৰ্য সম্পন্ন হোৱা বুলি দেখুওৱা হ’লেও বাস্তৱত পথটোৰ কোনো উন্নয়ন হোৱা নাই বুলি তেওঁলোকৰ দাবী। ফলত সামান্য বৰষুণতে পথটো পানীত ডুব যায় আৰু বৰ্ষাকালত আঁঠুসমান পানী পাৰ হৈ যাতায়াত কৰিবলগীয়া হয় স্থানীয় ৰাইজে।এই অঞ্চলত প্ৰায় ২০০ৰ পৰা ২৫০টা পৰিয়াল বসবাস কৰে। কিন্তু দুৰ্বল যোগাযোগ ব্যৱস্থা আৰু পৰ্যাপ্ত পানী নিষ্কাশন ব্যৱস্থা নথকাৰ ফলত বৰ্ষাকালত জলাবদ্ধতাই ভয়ংকৰ ৰূপ ধাৰণ কৰে। বহু ঘৰত পানী সোমাই পৰে, স্বাভাৱিক জীৱনযাত্ৰা ব্যাহত হয় আৰু জনসাধাৰণৰ ভোগান্তি চূড়ান্ত পৰ্যায়ত উপনীত হয়।সৰ্বাধিক দুৰ্ভোগৰ সন্মুখীন হৈছে স্কুল-কলেজলৈ যোৱা ছাত্ৰ-ছাত্ৰীসকল। প্ৰতিদিনে জীৱনৰ আশংকা লৈ জলাবদ্ধ আৰু বোকাময় পথ পাৰ হৈ শিক্ষা প্ৰতিষ্ঠানলৈ যাবলগীয়া হয় তেওঁলোকক। অসুস্থ ব্যক্তি, জ্যেষ্ঠ নাগৰিক তথা জৰুৰী প্ৰয়োজনত যাতায়াত কৰা লোকসকলেও একে সমস্যাৰ সন্মুখীন হ’বলগীয়া হৈছে।স্থানীয় ৰাইজৰ বক্তব্য অনুসৰি, বছৰ বছৰ ধৰি তেওঁলোকে উন্নয়নৰ আশাত অপেক্ষা কৰি আছে। কিন্তু বাস্তৱ চিত্ৰ আজিও একেই হৈ আছে। সেয়ে এলেকাটোৰ সৰ্বস্তৰৰ লোক একত্ৰিত হৈ বিধায়ক ডাঃ মিলন দাস-ৰ দৃষ্টি আকৰ্ষণ কৰিছে আৰু শীঘ্ৰে পথটোৰ স্থায়ী সংস্কাৰ তথা ফলপ্ৰসূ পানী নিষ্কাশন ব্যৱস্থা গঢ়ি তোলাৰ দাবী জনাইছে।

হিন্দুস্থান সমাচাৰ / কিশোৰ মিশ্ৰ