কলকাতা, ১২ জুন ৯হি.স.)। পশ্চিমবংগৰ মুখ্যমন্ত্ৰী শুভেন্দু অধিকাৰীয়ে কয় যে এসময়ত আন্তঃগাঁথনি উন্নয়নৰ ক্ষেত্ৰত পিছ পৰি থকা ভাৰত এতিয়া বিশ্বৰ দ্ৰুতগতিত বৃদ্ধি পোৱা অৰ্থনীতিৰ ভিতৰত অন্যতম। এই ৰূপান্তৰৰ কাৰণ তেওঁ প্ৰধানমন্ত্ৰী নৰেন্দ্ৰ মোডীৰ নেতৃত্বত ৰাষ্ট্ৰীয় গণতান্ত্ৰিক মিত্ৰজোঁটৰ যোৱা ১২ বছৰ চৰকাৰৰ বাবেই বুলি কয়।

কেন্দ্ৰত এন ডি এ চৰকাৰৰ ১২ বছৰ সম্পূৰ্ণ হোৱাৰ উপলক্ষে শুকুৰবাৰে অনুষ্ঠিত এক সংবাদমেলত মুখ্যমন্ত্ৰীয়ে দেশৰ অৰ্থনৈতিক আৰু আন্তঃগাঁথনি উন্নয়নৰ বিশদ বিৱৰণ দাঙি ধৰে।

তেওঁ কয় যে বিগত ১২ বছৰত সমগ্ৰ দেশতে ১৩১৭টা নতুন আৰু আধুনিকীকৃত ৰে’ল ষ্টেচন গঢ়ি তোলা হৈছে। তদুপৰি দেশৰ বিভিন্ন প্ৰান্তত ১৬৪খনতকৈও অধিক বন্দে ভাৰত ৰে’ল চলি আছে। মুখ্যমন্ত্রী সোণোৱালে কয় যে এসময়ত ৰাজধানী এক্সপ্ৰেছ আৰু শতাব্দী এক্সপ্ৰেছ আধুনিক ৰে’ল সেৱাৰ চিত্র আছিল যদিও আজি বন্দে ভাৰত ৰে’ল এখন নতুন ভাৰতৰ আকাংক্ষাৰ প্রতীক হৈ পৰিছে৷ প্ৰধানমন্ত্ৰী নৰেন্দ্ৰ মোদীৰ নেতৃত্বত দেশৰ এটা মূৰৰ পৰা আন এটা মূৰলৈ দূৰত্ব আৰু যাত্ৰাৰ সময় হ্ৰাস পোৱাৰ ফলত অৰ্থনৈতিক কাৰ্যকলাপ ত্বৰান্বিত হৈছে।

অসামৰিক বিমান পৰিবহণ খণ্ডত হোৱা অগ্ৰগতিৰ কথা উল্লেখ কৰি মুখ্যমন্ত্ৰীয়ে কয় যে ২০১৪ চনত দেশত ৭৪টা বিমানবন্দৰ আছিল, আনহাতে আজি ইয়াৰ সংখ্যা দুগুণতকৈও অধিক হৈছে। তেওঁ দাবী কৰে যে বিগত ১২ বছৰত দেশত ৯০টাতকৈও অধিক নতুন বিমানবন্দৰ নিৰ্মাণ কৰা হৈছে।

পথ আৰু পৰিবহণ খণ্ডৰ কথা উল্লেখ কৰি মুখ্যমন্ত্ৰীয়ে কয় যে এই সময়ছোৱাত প্ৰায় চাৰি লাখ কিলোমিটাৰ পথ নিৰ্মাণ কৰা হৈছে। ৰাষ্ট্ৰীয় ঘাইপথ সম্প্ৰসাৰণ কৰা হৈছে, আৰু সীমান্ত আৰু দুৰ্গম অঞ্চলত সংযোগ শক্তিশালী কৰা হৈছে।

তেওঁ কয় যে এই উন্নয়নে দেশৰ অৰ্থনৈতিক গাঁথনি ইতিবাচকভাৱে ৰূপান্তৰিত কৰিছে। উন্নয়ন এতিয়া মহানগৰত সীমাবদ্ধ হৈ থকা নাই বৰঞ্চ গাঁও আৰু দুৰ্গম অঞ্চলতো গৈছে।

পশ্চিম বংগৰ কথা উল্লেখ কৰি মুখ্যমন্ত্ৰীয়ে কয় যে ৰাজ্যত নতুন চৰকাৰ গঠন হোৱাৰ মাত্ৰ এমাহৰ ভিতৰতে কেন্দ্ৰ আৰু ৰাজ্য চৰকাৰৰ মাজত উন্নত সমন্বয়ৰ বাবে উন্নয়নৰ কাম ত্বৰান্বিত হৈছে।

তেওঁ কয় যে কেন্দ্ৰীয় মন্ত্ৰীসকলে নিয়মিতভাৱে পশ্চিমবংগ ভ্ৰমণ কৰি আছে, আৰু ৰাজ্য চৰকাৰৰ প্ৰতিনিধিসকলো নিয়মিতভাৱে দিল্লীলৈ যাত্ৰা কৰি আছে। ইয়াৰ ফলত বিভিন্ন প্ৰকল্পৰ অনুমোদন আৰু ৰূপায়ণ প্ৰক্ৰিয়া ক্ষিপ্ৰ হৈছে।

এই মাহৰ শেষৰ ফালে প্ৰধানমন্ত্ৰী নৰেন্দ্ৰ মোদীয়ে দুদিনীয়া ভ্ৰমণৰ বাবে পশ্চিমবংগ ভ্ৰমণ কৰিব বুলিও মুখ্যমন্ত্ৰীয়ে নিশ্চিত কৰে। তেওঁ উল্লেখ কৰে যে ২০ জুনত প্ৰধানমন্ত্ৰীয়ে প্ৰথমবাৰৰ বাবে বংগ প্ৰতিষ্ঠা দিৱস উপলক্ষে হুগলী জিলাৰ তাৰাকেশ্বৰত এক কাৰ্যসূচীত ভাষণ দিব। তেওঁ ৰাজ্যখনৰ বাবে কেইবাটাও উন্নয়নমূলক প্ৰকল্পৰ কথা ঘোষণা কৰাৰ সম্ভাৱনা আছে।

তেওঁ লগতে কয় যে ২১ জুনত প্ৰধানমন্ত্ৰীয়ে আন্তঃৰাষ্ট্ৰীয় যোগ দিৱস উপলক্ষে কলকাতাত এক বিশেষ কাৰ্যসূচীত অংশগ্ৰহণ কৰিব। মুখ্যমন্ত্ৰীৰ মতে, এই ভ্ৰমণে ৰাজ্যখনৰ উন্নয়ন আৰু কেন্দ্ৰ-ৰাজ্যৰ সহযোগিতাৰ ক্ষেত্ৰত নতুন গতি প্ৰদান কৰিব।

হিন্দুস্থান সমাচাৰ / মনোজ কুমাৰ শইকীয়া