নতুন দিল্লী, ১২ জুন (হি.স.)। বৈদেশিক পৰিক্ৰমা মন্ত্ৰালয়লে ওমান উপসাগৰত ভাৰতীয় নাৱিক কঢ়িয়াই অনা বাণিজ্যিক জাহাজত আমেৰিকাৰ নৌসেনাৰ আক্ৰমণ অব্যাহত থকাৰ সন্দৰ্ভত শুকুৰবাৰে আমেৰিকাৰ দূতাবাসৰ ভাৰপ্ৰাপ্ত জেছন মিক্সক লৈ মাতি অনা হয়। অসামৰিক জাহাজৰ বিৰুদ্ধে মাৰাত্মক শক্তিৰ ব্যৱহাৰক লৈ মন্ত্ৰালয়ে গভীৰ উদ্বেগ প্ৰকাশ কৰি এনে কাৰ্য গ্ৰহণযোগ্য নহয় বুলি স্পষ্টভাৱে উল্লেখ কৰে।

ইয়াৰ এদিন পূৰ্বে ভাৰতীয় ক্ৰু থকা এখন জাহাজ পুনৰবাৰ আমেৰিকাৰ নৌসেনাৰ লক্ষ্য হৈ পৰিছিল। এই সন্দৰ্ভত আজি আমেৰিকাৰ দূতাবাসৰ ভাৰপ্ৰাপ্ত কূটনৈতিজ্ঞগৰাকীক মাতি অনা হয়। কূটনীতিবিদগৰাকীয়ে বৈদেশিক পৰিক্ৰমা মন্ত্ৰালয়ত প্ৰায় ৪৫ মিনিট সময় কটায়।

ইয়াৰ পিছতে বৈদেশিক পৰিক্ৰমা মন্ত্ৰালয়ে এক বিবৃতি প্ৰকাশ কৰি কয় যে মন্ত্ৰালয়ে পুনৰবাৰ অসামৰিক জাহাজৰ বিৰুদ্ধে মাৰাত্মক শক্তিৰ ব্যৱহাৰক লৈ গভীৰ উদ্বেগ প্ৰকাশ কৰিছে। তেওঁক কোৱা হৈছিল যে এনে কাৰ্য্য গ্ৰহণযোগ্য নহয় আৰু ই স্পৰ্শকাতৰ অঞ্চলৰ কঠিন সময়ত আন্তঃৰাষ্ট্ৰীয় সামুদ্ৰিক বাণিজ্যৰ সুৰক্ষা, নিৰাপত্তা আৰু স্থিতিশীলতাক ক্ষতিগ্ৰস্ত কৰে।

মন্ত্ৰালয়ৰ মতে, আমেৰিকাৰ বিদেশ মন্ত্ৰালয়ৰ চাৰ্জ ডি এফেয়াৰ্ছক ভাৰতৰ গুৰুতৰ উদ্বেগ তেওঁৰ বিষয়াসকলৰ আগত অৱগত কৰিবলৈ কোৱা হৈছিল আৰু এই অঞ্চলত নিয়োজিত আমেৰিকান বাহিনীয়ে যাতে অসামৰিক লোকৰ প্ৰাণ হেৰুৱাব নোৱাৰে তাৰ বাবে প্ৰয়োজনীয় সকলো ব্যৱস্থা গ্ৰহণ কৰাটো নিশ্চিত কৰিবলৈ কোৱা হৈছিল।

উল্লেখযোগ্য যে বিগত চাৰিদিনত তিনিবাৰকৈ লোহিত সাগৰ অঞ্চলত ভাৰতীয় ক্ৰুসহ তিনিখন জাহাজ আমেৰিকাৰ নৌসেনাই লক্ষ্য কৰি লৈছে। পালাউৰ পতাকা থকা টেংকাৰ মেৰিভেক্স আৰু চেটেবেলোক আক্ৰমণ কৰা হয়। ছেটেবেলোৰ আক্ৰমণত তিনিজন ভাৰতীয় নাৱিক—ডেক কেডেট আদিত্য শৰ্মা, ফিটাৰ শিৱানন্দ চৌৰসিয়া, আৰু মুখ্য অভিযন্তা পাটনালা সুৰেশ—নিহত হয়। বৃহস্পতিবাৰে আন এখন জাহাজ এম টি জালভিৰক আক্ৰমণ কৰা হয়।

ইয়াৰ পূৰ্বে বুধবাৰে বৈদেশিক পৰিক্ৰমা মন্ত্ৰালয়ে চাৰ্জ ডি এফেয়াৰ্ছ জেছন মিক্সক মাতি আনি “মেৰিভেক্স” কাণ্ডক লৈ প্ৰতিবাদ দাখিল কৰে।

হিন্দুস্থান সমাচাৰ / মনোজ কুমাৰ শইকীয়া