ৱেলিংটন, ১২ জুন (হি.স.)। নিউজিলেণ্ডৰ কিংবদন্তি বেটছমেন তথা দেশৰ সফল আন্তঃৰাষ্ট্ৰীয় ৰান স্ক’ৰাৰ কেন উইলিয়ামছনে শুকুৰবাৰে আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰে, যিটো তৎক্ষণাত কাৰ্যকৰী হ’ব।

৩৫ বছৰীয়া উইলিয়ামছনে ১৬ বছৰীয়া আন্তঃৰাষ্ট্ৰীয় কেৰিয়াৰত তিনিওটা ফৰ্মেটতে ৩৭৮খন মেচ খেলি ১৯,৩৪৬ ৰান সংগ্ৰহ কৰে। তেওঁৰ নামত ৪৮টা শতক আৰু ছটা দ্বৈত শতক আছে।

২০১০ চনত আন্তঃৰাষ্ট্ৰীয় ক্ৰিকেটত অভিষেক ঘটোৱা উইলিয়ামছনে ইয়াৰ পূৰ্বে টি-২০ আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল আৰু এতিয়া আন্তঃৰাষ্ট্ৰীয় ক্ৰিকেটৰ পৰা সম্পূৰ্ণৰূপে অৱসৰ গ্ৰহণ কৰিছে।

অৱসৰৰ কথা ঘোষণা কৰি উইলিয়ামছনে কয় যে, মই এই বিষয়ে বহুদিনৰ পৰা চিন্তা কৰি আহিছো, কিন্তু যোৱা কেইদিনমানৰ পৰা মোৰ বাবে স্পষ্ট হৈ পৰিছে যে এতিয়াই সঠিক সময়। আন্তঃৰাষ্ট্ৰীয় ক্ৰিকেটৰ প্ৰতি মোৰ সদায় প্ৰবল আকৰ্ষণ আৰু ক্ষুধা আছিল, আৰু নিউজিলেণ্ডৰ হৈ খেলা প্ৰতিখন মেচতে মোৰ সকলোখিনি দিবলৈ পাই মই গৌৰৱান্বিত।

তেওঁ কয়, যদি মই আৰু একে প্ৰতিশ্ৰুতি আৰু শক্তিৰে খেলিব নোৱাৰো তেন্তে আগবাঢ়ি যোৱাটো সঠিক নহ'ব। নিজৰ চৰ্তত অৱসৰ লোৱাৰ সুযোগ পোৱাটো মই নিজকে সৌভাগ্যৱান বুলি গণ্য কৰোঁ। এই দলটো এৰি যোৱাৰ লগে লগে মই আশাবাদী যে এই গোটটোৱে ভৱিষ্যতে বহু দূৰলৈ যাব। এই দলটোৰ অপৰিসীম প্ৰতিভা আৰু বিশেষ কিবা এটা লাভ কৰাৰ প্ৰকৃত ইচ্ছা আছে।

তেওঁ লগতে কয়, এইটো এটা দল মই বহুত ভাল পাওঁ, আৰু ইমান দিনে ইয়াৰ অংশ হোৱাটো এক সৌভাগ্যৰ কথা। ই মোৰ হৃদয়ৰ সদায় অতি ওচৰত থাকিব।

উইলিয়ামছনেও অধিনায়ক হিচাপে অমলিন চিন ৰাখিছিল। তেওঁ নিউজিলেণ্ডক ৪০খন টেষ্ট মেচত ২২খন জয়ৰ নেতৃত্ব দি তেওঁলোকৰ দ্বিতীয় সফল টেষ্ট অধিনায়ক হিচাপে পৰিগণিত হয়। এদিনীয়াত তেওঁ ৯১খন মেচত ৪৬খন জয়ৰ দিশত আগবাঢ়িছিল, আনহাতে টি-২০ আন্তঃৰাষ্ট্ৰীয় মেচত তেওঁ ৭৫খন মেচত ৩৯টা জয়ৰে নিউজিলেণ্ডৰ সফল অধিনায়ক হিচাপে পৰিগণিত হৈছিল।

বৃহৎ কৃতিত্ব

২০১৬ টি-২০ বিশ্বকাপ – ছেমি ফাইনেল ২০১৯ ক্ৰিকেট বিশ্বকাপ – ফাইনেল

২০২১ বিশ্ব টেষ্ট চেম্পিয়নশ্বিপ – খিতাপ ২০২১ টি-২০ বিশ্বকাপ – ফাইনেল

২০২২ টি-২০ বিশ্বকাপ – ছেমি ফাইনেল ২০২৩ ক্ৰিকেট বিশ্বকাপ – ছেমি ফাইনেল

ব্যক্তিগত কৃতিত্ব

২০১৯ বিশ্বকাপৰ বছৰৰ শ্ৰেষ্ঠ খেলুৱৈ

২০১৯ আইচিচিৰ বছৰৰ শ্ৰেষ্ঠ টেষ্ট ক্ৰিকেটাৰ

সকলো মুখ্য টেষ্ট ৰাষ্ট্ৰৰ বিৰুদ্ধে শতক অৰ্জন কৰা আটাইতকৈ দ্ৰুত আৰু কম বয়সীয়া বেটছমেনৰ ভিতৰত চামিল

চাৰিবাৰৰ ছাৰ ৰিচাৰ্ড হেডলী পদক বিজয়ী

২০১০ চনৰ আহমেদাবাদ টেষ্টত ভাৰতৰ বিৰুদ্ধে অভিষেক ঘটাই শতক অৰ্জন কৰে

উইলিয়ামছনৰ অৱসৰৰ লগে লগে নিউজিলেণ্ড ক্ৰিকেটৰ অন্যতম সফল আৰু সন্মানীয় অধ্যায়ৰ অন্ত পৰিল।

হিন্দুস্থান সমাচাৰ / মনোজ কুমাৰ শইকীয়া