কাজিৰঙা, ১১ জুন (হি.স.)। বান পৰিস্থিতিৰ প্ৰতি লক্ষ্য ৰাখি কাজিৰঙাত বৃদ্ধি পাইছে তৎপৰতা। সষ্টম হৈ উঠিছে প্ৰতিটো বিভাগ ৷ বান পৰিস্থিতিৰ বাবে সাজু হৈ পৰিছে কহঁৰাস্থিত ৰাজ্যিক পশু চিকিৎসালয় ৷ বান পৰিস্থিতিৰ প্ৰতি লক্ষ্য ৰাখি আজি চিকিৎসালয়খনে মুকলি কৰে হেল্পলাইন নম্বৰ,সাজু কৰি ৰাখিছে বিশেষ বাহন ৷ বিপদত পৰা বন্যপ্ৰাণী দেখিলেই মুকলি কৰা ১৯৬২ হেল্পলাইন নম্বৰত ফোন কৰিলেই আৰ্ত জীৱকুলৰ ওচৰত থিয় হব পশুধন সাৰথি ৷
এইক্ষেত্ৰত চিকিৎসক, বিশ্বজিৎ বৰুৱাই আশা কৰিছে ৰাইজৰ সহযোগিতা ৷ পশুপালন আৰু পশু চিকিৎসা বিভাগৰ নৱতম সংযোজন পশুধন সাৰথিয়ে বানৰ সময়ছোৱাত আগবঢ়াব সেৱা ৷ বাহনখনত নিয়োজিত কৰা হৈছে এজন চিকিৎসক ৷ যিগৰাকী চিকিৎসকে আৰ্তজীৱকুলক ঠাইতে চিকিৎসা আগবঢ়াব পৰাকে সম্পুৰ্ণ সাজু হৈ পৰিছে ৷ সমান্তৰালকৈ বিপদত পৰা বন্যপ্ৰাণী দেখিলেই উদ্ধাৰৰ ক্ষেত্ৰত ৰাইজে নিজে চেষ্টা নকৰি বন বিভাগ,পশু চিকিৎসা বিভাগক খৱৰ দিয়াৰ আহ্বান চিকিৎসকগৰাকীৰ ৷
হিন্দুস্থান সমাচাৰ / প্ৰকাশ ডেকা