নতুন দিল্লী, ১০ জুন (হি.স.)। দেশৰ প্ৰাথমিক বজাৰখনে আকৌ এবাৰ গতি লাভ কৰা যেন দেখা গৈছে। বজাৰ নিয়ন্ত্ৰক ছিকিউৰিটিজ এণ্ড এক্সচেঞ্জ ব’ৰ্ড অৱ ইণ্ডিয়াই আই পি অ’ আৰম্ভ কৰিবলৈ বিভিন্ন খণ্ডৰ ৫টা কোম্পানীলৈ পৰ্যবেক্ষণ পত্ৰ জাৰি কৰিছে। অৰ্থাৎ এই কোম্পানীসমূহে আই পি অ’ আৰম্ভ কৰিবলৈ ছেবিৰ অনুমোদন লাভ কৰিছে।

ছেবিয়ে ঔদ্যোগিক সঁজুলি, কৃষি, আতিথ্য, ৰিয়েল এষ্টেট, আৰু গৃহ নিৰ্মাণ বিত্তীয় খণ্ডৰ কোম্পানীসমূহক আই পি অ’ আৰম্ভ কৰিবলৈ অনুমোদন জনাইছে। এই কোম্পানীসমূহৰ ভিতৰত আছে অয়’ৰ মূল কোম্পানী অৰৱেল ষ্টেজ, যিয়ে আতিথ্য খণ্ডত কাম কৰে; ভিগালেণ্ড ডেভেলপাৰ্ছ, এটা ৰিয়েল এষ্টেট কোম্পানী; ট্ৰু হোম ফাইনেন্স, এটা সুলভ মূল্যৰ হাউছিং ফাইনেন্স কোম্পানী; এডভান্টা এণ্টাৰপ্ৰাইজ, এটা কৃষি কোম্পানী; আৰু ঔদ্যোগিক সঁজুলি নিৰ্মাতা মেহতা হাইটেক ইণ্ডাষ্ট্ৰীজ।

প্ৰথমে অয়’ৰ মূল কোম্পানী অৰৱেল ষ্টেজৰ কথা কওঁ। এই কোম্পানীটোৱে আতিথ্য খণ্ডত প্ৰযুক্তিভিত্তিক মঞ্চ পৰিচালনা কৰে। হোটেল, ছুটীৰ ঘৰ, আৰু অন্যান্য আৱাসিক সেৱাত ই এক নিৰ্দিষ্ট স্থান স্থাপন কৰিছে। ছেবিয়ে কোম্পানীটোক ৬,৬৫০ কোটি ₹ৰ আই পি অ’ৰ বাবে পৰ্যবেক্ষণ পত্ৰ জাৰি কৰিছে। কোম্পানীটোৱে আই পি অ’ৰ জৰিয়তে ব্যৱসায় সম্প্ৰসাৰণৰ বাবে ধন সংগ্ৰহৰ পৰিকল্পনা কৰিছে। এই আই পি অ’ৰ জৰিয়তে কোম্পানীটোৱে নিজৰ মূল্য ৬৬,০০০ কোটি ₹লৈ বৃদ্ধি কৰাৰ লক্ষ্য লৈছে। কেইবছৰমানৰ আগলৈকে ধাৰাবাহিকভাৱে ধন হেৰুৱাই অহা এই কোম্পানীটোৱে বিগত কেইবছৰমানৰ পৰা লাভজনক পথত আগবাঢ়িছে, যাৰ ফলত আই পি অ’ৰ সন্দৰ্ভত প্ৰাথমিক বজাৰত যথেষ্ট উত্তেজনা দেখা গৈছে।

একেদৰে বজাৰ নিয়ন্ত্ৰক ছেবিয়ে কেৰালাৰ ৰিয়েল এষ্টেট কোম্পানী ভেগালেণ্ড ডেভেলপাৰ্ছলৈ আই পি অ’ৰ বাবে পৰ্যবেক্ষণ পত্ৰ জাৰি কৰিছে। কোম্পানীটোৱে আই পি অ’ৰ জৰিয়তে ২৫০ কোটি টকা সংগ্ৰহ কৰাৰ লক্ষ্য লৈছে। এই আই পি অ’ত নতুন শ্বেয়াৰহে জাৰি কৰা হ’ব আৰু বিক্ৰীৰ বাবে অফাৰ নহ’ব। আই পি অ’ৰ পৰা পোৱা ধন কোম্পানীটোৱে নিজৰ আৱাসিক প্ৰকল্পসমূহ আগুৱাই নিব, নতুন মাটি ক্ৰয় কৰিব, আৰু সাধাৰণ কৰ্পৰেট উদ্দেশ্য সাধন কৰিব।

ছেবিয়ে সুলভ মূল্যৰ হাউছিং ফাইনেন্স কোম্পানী ট্ৰু হোম ফাইনেন্সকো আই পি অ’ আৰম্ভ কৰিবলৈ অনুমোদন জনাইছে। কোম্পানীটোৱে প্ৰাথমিক বজাৰৰ পৰা ৩ হাজাৰ কোটি টকা সংগ্ৰহ কৰাৰ লক্ষ্য লৈছে। এই আই পি অ’ত ১৫০০ কোটি টকাৰ নতুন শ্বেয়াৰ জাৰি কৰাৰ বিপৰীতে ১৫০০ কোটি টকাৰ শ্বেয়াৰ অফাৰ ফৰ চেল উইণ্ডোৰ জৰিয়তে বিক্ৰী কৰা হ’ব। বৰ্তমানৰ শ্বেয়াৰহোল্ডাৰ মেংগো ক্ৰেষ্ট ইনভেষ্টমেণ্টে অফাৰ ফৰ চেল উইণ্ড’ৰ জৰিয়তে নিজৰ অংশীদাৰিত্ব হ্ৰাস কৰিব। আই পি অ’ত নতুন শ্বেয়াৰৰ জৰিয়তে সংগ্ৰহ কৰা ধন কোম্পানীটোৱে নিজৰ মূলধনী ভিত্তি শক্তিশালী কৰাৰ লগতে কাৰ্য্যকৰী মূলধনৰ প্ৰয়োজনীয়তা পূৰণৰ বাবে ব্যৱহাৰ কৰিব।

কৃষি সমাধান প্ৰদানকাৰী এডভান্টা এণ্টাৰপ্ৰাইজেও আই পি অ’ৰ বাবে ছেবিৰ অনুমোদন লাভ কৰিছে। কোম্পানীটোৰ আই পি অ’ সম্পূৰ্ণৰূপে বিক্ৰীৰ বাবে অফাৰ হ’ব। এই আই পি অ’ৰ অধীনত বৰ্তমানৰ শ্বেয়াৰহোল্ডাৰসকলে ৩৬.১ মিলিয়ন ইকুইটি শ্বেয়াৰ বিক্ৰী কৰিব। এডভান্টা এণ্টাৰপ্ৰাইজে হাইব্ৰিড বীজ আৰু চপোৱাৰ পিছত প্ৰক্ৰিয়াকৰণৰ সুবিধা প্ৰদান কৰে।

ঔদ্যোগিক সঁজুলি নিৰ্মাতা মেহতা হাই-টেক ইণ্ডাষ্ট্ৰীজেও প্ৰাৰম্ভিক ৰাজহুৱা প্ৰস্তাৱ (আই পি অ’)ৰ বাবে ছেবিৰ অনুমোদন লাভ কৰিছে। আই পি অ’ৰ অধীনত কোম্পানীটোৱে ৬২ লাখ নতুন ইকুইটি শ্বেয়াৰ জাৰি কৰিব। সংগ্ৰহ কৰা ধনৰাশি মূলধনী ব্যয় আৰু কাৰ্য্যকৰী মূলধনৰ প্ৰয়োজনীয়তাৰ লগতে অন্যান্য কৰ্পৰেট উদ্দেশ্যৰ বাবেও ব্যৱহাৰ কৰা হ’ব। কোম্পানীটোৱে ঔদ্যোগিক সঁজুলি যেনে কাৰ্বন ডাই অক্সাইড লেজাৰ চিষ্টেম, চিএনচি ৰাউটাৰ, ফাইবাৰ লেজাৰ মেচিন, ডিজিটেল প্ৰিণ্টাৰ আদি উৎপাদন কৰে।

হিন্দুস্থান সমাচাৰ / মনোজ কুমাৰ শইকীয়া