ভূপাল, ১০ জুন (হি.স.)। মধ্যপ্ৰদেশৰ পৰা খালী হৈ থকা তিনিখন ৰাজ্যসভাৰ আসনৰ দ্বিবাৰ্ষিক নিৰ্বাচনৰ প্ৰাৰ্থীৰ চূড়ান্ত তালিকা বুধবাৰে তদন্তৰ অন্তত প্ৰকাশ পায়। এই তালিকাত ভাৰতীয় জনতা পাৰ্টিৰ তিনিজন প্ৰাৰ্থী তৰুণ চুঘ, মহেশ কেৱাট, আৰু ৰজনীশ আগৰৱালাৰ নাম সন্নিবিষ্ট কৰা হৈছে।

মধ্য প্ৰদেশৰ পৰা ৰাজ্যসভাৰ তিনিখন আসনৰ কাৰ্যকাল ২১ জুনত শেষ হ’ব।ইয়াৰে দুখন আসন বিজেপি আৰু এখন কংগ্ৰেছৰ হাতত। এই তিনিখন আসনৰ বাবে বিজেপিৰ তিনিজন প্ৰাৰ্থী— তৰুণ চুঘ, মহেশ কেৱাট, আৰু ৰজনীশ আগৰৱালা আৰু কংগ্ৰেছৰ মীনাক্ষী নটৰাজনে মনোনয়ন দাখিল কৰিছিল। কিন্তু বিজেপিৰ আপত্তিৰ পিছত মীনাক্ষী নটৰাজনৰ শপতনামাত পোৱা বিসংগতিৰ ভিত্তিত মঙলবাৰে মীনাক্ষী নটৰাজনৰ মনোনয়ন নাকচ কৰা হয়।

বুধবাৰে মধ্যপ্ৰদেশ বিধানসভাত বাকী তিনিখন মনোনয়ন পত্ৰৰ পৰীক্ষা-নিৰীক্ষা কৰি পৰৱৰ্তী সময়ত প্ৰাৰ্থীৰ চূড়ান্ত তালিকা প্ৰকাশ কৰে ৰিটাৰ্নিং অফিচাৰ অৰবিন্দ শৰ্মাই।

মীনাক্ষী নটৰাজনৰ মনোনয়নৰ বিৰুদ্ধে আনুষ্ঠানিক আপত্তি দাখিল কৰিছিল বিজেপিয়ে। তেলেংগানাৰ হায়দৰাবাদৰ আদালতত বিচাৰাধীন হৈ থকা এটা গোচৰৰ তথ্য লুকুৱাই ৰখাৰ অভিযোগ বিজেপিয়ে।

ইফালে, কংগ্ৰেছ প্ৰাৰ্থী মীনাক্ষী নটৰাজনৰ মনোনয়ন নাকচ কৰাৰ পিছত ৰাজ্যজুৰি কংগ্ৰেছে প্ৰতিবাদ সাব্যস্ত কৰে। বুধবাৰে দিল্লীত নিৰ্বাচন আয়োগৰ সৈতে ১০ জনীয়া কংগ্ৰেছৰ প্ৰতিনিধি দলে বৈঠকত মিলিত হয়। প্ৰতিনিধি দলটোত আছিল অভিষেক মনু সিংৱী, কে চি ভেনুগোপাল, জয়ৰাম ৰমেশ, ৰনদীপ সুৰজেৱালা, শচীন পাইলট, ভূপেশ বাঘেল আৰু বিবেক তংখা।

হিন্দুস্থান সমাচাৰ / মনোজ কুমাৰ শইকীয়া