মৰিগাঁও, ০১ জুন (হি.স.)। পথ দুৰ্ঘটনাত এজন লোক নিহত হোৱাৰ পিছতে জাগীৰোডৰ শিলভঙাত সৃষ্টি হয় উত্তপ্ত পৰিস্থিতিৰ ৷ ২৭ নং ৰাষ্ট্ৰীয় ঘাইপথত দুৰ্ঘটনা ৰোধৰ কোনো ব্যৱস্থা নথকাৰ বাবেই দৈনিক পথ দুৰ্ঘটনা সংঘটিত হোৱাৰ অভিযোগ স্থানীয় ৰাইজৰ ৷ পথত কোনো ডিভাইডাৰ নথকাৰ বাবেই যধেমধে পথ অতিক্ৰম কৰিবলৈ গৈ মৃত্যুমুখত পৰে বহু লোক ৷
আনহাতে দুখনকৈ উৰণ সেতুৰ পৰা তীব্ৰবেগত নামি অহা বাহন সমূহে প্ৰায়ে উক্ত স্থানত সংঘটিত কৰে দুৰ্ঘটনা ৷ সোমবাৰে পুৱাৰ ভাগতো বিষ্ণু দেউৰী নামৰ টাটা ছেমিকণ্ডাক্টৰ প্ৰকল্পত কৰ্মৰত এজন লোকে তীব্ৰবেগী বাহনৰ খুন্দাত থিতাতে নিহত হোৱাৰ পিছতে ৰাজপথলৈ ওলাই আহিছে স্থানীয় লোক ৷ পৰৱৰ্তী সময়ত জাগীৰোড সমজিলাৰ আৰক্ষী অধীক্ষক, জাগীৰোড আৰক্ষী আৰু নাগৰিক সমিতিৰ বিষয়ববীয়া সকল উপস্থিত হৈ পৰিস্থিতি নিয়ন্ত্ৰণলৈ আনে ৷ যিকোনো প্ৰকাৰে ৰাষ্ট্ৰীয় ঘাইপথত সংঘটিত হৈ থকা পথ দুৰ্ঘটনা ৰোধ কৰিবলৈ আৰক্ষী প্ৰশাসনক দাবী জনায় স্থানীয় লোকে ৷
হিন্দুস্থান সমাচাৰ / নিৰ্মলেন্দু