নতুন দিল্লী, ০৬ মে’ (হি.স.)। সংগীতজ্ঞ তথা দিল্লী বিশ্ববিদ্যালয়ৰ প্ৰাক্তন অধ্যাপক ড০ মধুৰ লতা ভাটনগৰে যুৱক-যুৱতীসকলক অহংকাৰৰ পৰা আঁতৰি থাকিবলৈ আৰু নিজৰ শিপাৰ সৈতে সংযোগ স্থাপন কৰি সমাজৰ উপকাৰিতাৰ কাম কৰিবলৈ আহ্বান জনায়।

ড০ ভাটনগৰে মঙলবাৰে হিন্দুস্থান সমাচাৰৰ সৈতে হোৱা এক সাক্ষাৎকাৰত কয় যে দিল্লীৰ ইন্দিৰা গান্ধী ৰাষ্ট্ৰীয় কলা কেন্দ্ৰ (আই জি এন চি এ)ত অনুষ্ঠিত হ’বলগীয়া দিল্লী আন্তঃৰাষ্ট্ৰীয় চলচ্চিত্ৰ মহোৎসৱ (ডি আই এফ এফ) ২০২৬ৰ সময়ত ৭ মে’ত তেওঁৰ চুটি ছবি “মিউজিক এণ্ড নেচাৰ” প্ৰদৰ্শন কৰা হ’ব। ৮ মিনিটৰ এই ছবিখন মানৱ চৰিত্ৰৰ পৰা বঞ্চিত। ইয়াত কেৱল গছ, উদ্ভিদ, জলপ্ৰপাত, পাহাৰ, ডাৱৰ, চন্দ্ৰ আৰু তৰাক কলাকুশলী হিচাপে দেখুওৱা হৈছে।

তেওঁ কয়, ফুল আৰু গছ-গছনিয়ে দোল খায় আৰু গান গায়, জলপ্ৰপাতৰ প্ৰবাহত এটা ছন্দ আছে। মই এই প্ৰাকৃতিক সংগীতক এনেদৰে সংৰক্ষণ কৰিছো যাতে সমগ্ৰ বিশ্বতে গছ কটা বন্ধ কৰিব পৰা যায় আৰু মানুহে প্ৰকৃতিৰ গুৰুত্ব বুজিব পাৰে। ছবিখনত বাঁহী আৰু অন্যান্য বাদ্যযন্ত্ৰৰ লগতে বাস্তৱ জীৱনৰ কোকিল আৰু ময়ুৰৰ শব্দও ব্যৱহাৰ কৰা হৈছে।

সাক্ষাৎকাৰৰ সময়ত ড০ ভাটনগৰে তেওঁৰ গল্পময় অতীতৰ সোঁৱৰণ কৰি প্রকাশ কৰে যে তেওঁ প্রাক্তন প্রধানমন্ত্রী অটল বিহাৰী বাজপেয়ীৰ কবিতা বাণীবদ্ধ কৰা প্রথম সংগীতজ্ঞ ৷

তেওঁ কয় যে স্বাধীনতাৰ ৫০ বছৰীয়া জয়ন্তী উপলক্ষে অটল বিহাৰী বাজপেয়ীৰ উপস্থিতিত মাণ্ডী হাউছৰ ৰাছিয়ান সাংস্কৃতিক কেন্দ্ৰত তেওঁৰ গীতৰ কেছেট মুকলি কৰা হয়। অটলৰ বিখ্যাত ৰচনা, যেনে বিশ্ব শান্তি কে হম সাধক হেয়, জং না হোনে ডেংগে, উনকি যাদ কৰে, ভাৰত কা মস্তক কভি নেহী ঝুকেগা আদি ৰচনাক তেওঁ নিজৰ সুৰত সজাইছে।

মূলতঃ মোৰাদাবাদৰ পৰা দিল্লীক নিজৰ কৰ্মস্থলী হিচাপে গঢ়ি তোলা ড০ ভাটনাগৰে সংগীত বিষয়ত পি এইচ ডি ডিগ্ৰী লাভ কৰিছে। তেওঁৰ গৱেষণা পত্ৰবোৰ এতিয়াও বিশ্ববিদ্যালয়ত পঢ়োৱা হয়। শেহতীয়াকৈ ২৬ জানুৱাৰী, গণৰাজ্য দিৱস আৰু সংবিধানৰ ৭৫ বছৰীয়া জয়ন্তীত তেওঁৰ পাঁচটা গীত দূৰদৰ্শনত সম্প্ৰচাৰিত হৈছিল।

আজিৰ 'ৰিল' আৰু ছ'চিয়েল মিডিয়া প্ৰজন্মলৈ প্ৰেৰণ কৰা বাৰ্তাত ড° ভাটনগৰে শিল্পত সামাজিক উদ্দেশ্যৰ গুৰুত্বৰ ওপৰত গুৰুত্ব আৰোপ কৰে। তেওঁ কয়–‘‘যিকোনো শিল্পকৰ্মৰ সামাজিক বাৰ্তা থাকিব লাগে । যুৱসকলে কেৱল বস্তুবাদী তথা ভোগবাদৰ পিছত দৌৰা উচিত নহয় বৰঞ্চ নিজৰ শিপাৰ সৈতে সংযোগ স্থাপন কৰা উচিত।

বৰ্তমান ডঃ ভাটনগৰে ধ্ৰুপদ আৰু ধমাৰৰ দৰে বিলুপ্তপ্ৰায় ধ্ৰুপদী ৰূপ সংৰক্ষণৰ বাবে কাম কৰি আছে। তেওঁৰ ইউটিউব চেনেল মধুৰ লতা তেওঁৰ ভজন, গজল, শাস্ত্ৰীয় সংগীতৰ প্ৰেমীসকলৰ বাবে এক প্ৰধান মঞ্চত পৰিণত হৈছে ।

हिन्दुस्थान समाचार / মনোজ কুমাৰ শইকীয়া