নতুন দিল্লী, ০৬ মে’ (হি.স.)। আমেৰিকাই অপাৰেচন এপিক ফিউৰিৰ অন্ত পেলোৱা আৰু নৌসেনাৰ অপাৰেচন প্ৰজেক্ট ফ্ৰিডম সাময়িকভাৱে স্থগিত ৰখাৰ কথা ঘোষণা কৰাৰ পিছত আন্তঃৰাষ্ট্ৰীয় খাৰুৱা তেলৰ মূল্য তীব্ৰভাৱে হ্ৰাস পায়। আজি ব্ৰেণ্ট খাৰুৱা তেলৰ মূল্য ১১ শতাংশ হ্ৰাস পাই ৯৭.০৮ ডলাৰ হয়। একেদৰে পশ্চিম টেক্সাছ ইণ্টাৰমিডিয়েট (ডব্লিউ টি আই) খাৰুৱা তেলৰ মূল্যও ১৩.৩১ শতাংশ হ্ৰাস পাই প্ৰতি বেৰেলত ৮৮.৬৬ ডলাৰ হয়।
হোয়াইট হাউছত সাংবাদিকৰ আগত আমেৰিকাৰ বিদেশ মন্ত্ৰী মাৰ্কো ৰুবিঅ’ই কয় যে আমেৰিকা আৰু ইজৰাইলে ইৰাণত বোমা বিস্ফোৰণ আৰম্ভ কৰাৰ ৬৬ দিনৰ পাছত অপাৰেচন এপিক ফিউৰিৰ অন্ত পৰিছে, কিয়নো আমেৰিকাই নিজৰ লক্ষ্যত উপনীত হৈছে। পশ্চিম এছিয়াত পুনৰ সক্ৰিয় যুদ্ধৰ সূচনা হোৱাৰ আশাও আমেৰিকাই কম বুলি প্ৰকাশ কৰে। একেদৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে ট্ৰুথত সামাজিক পোষ্টযোগে ঘোষণা কৰে যে হৰমুজ জলদ্বীপৰ পৰা জাহাজখন আঁতৰোৱাৰ বাবে আমেৰিকাৰ প্ৰচেষ্টা বন্ধ কৰা হ’ব। অৱশ্যে একেটা পোষ্টতে ট্ৰাম্পে উল্লেখ কৰে যে হৰমুজ জলদ্বীপত নৌসেনাৰ অৱৰোধ অব্যাহত থাকিব।
পশ্চিম এছিয়াত শান্তিৰ আশাৰ ফলত আন্তঃৰাষ্ট্ৰীয় বজাৰত খাৰুৱা তেলৰ মূল্য কোমল হৈ পৰে। আজি ব্ৰেণ্ট খাৰুৱা তেলৰ প্ৰতি বেৰেলত ২.১২ ডলাৰ হ্ৰাস পাই ১০৭.৭৫ ডলাৰ হয়। কিন্তু কম সময়ৰ ভিতৰতে ব্ৰেণ্ট খাৰুৱা তেলৰ মূল্য প্ৰতি বেৰেলত ১০৮.৯১ ডলাৰলৈ বৃদ্ধি পালে। ইয়াৰ পিছতে আমেৰিকাৰ ৰাষ্ট্ৰপতি ড’নাল্ড ট্ৰাম্পে হৰমুজ জলদ্বীপত মালবাহী জাহাজসমূহক সুৰক্ষা প্ৰদান কৰা নৌসেনাৰ অভিযান প্ৰজেক্ট ফ্ৰিডম সাময়িকভাৱে স্থগিত ৰখাৰ কথা ঘোষণা কৰে, যাৰ ফলত খাৰুৱা তেলৰ মূল্য আৰু অধিক কোমল হয়। এই কোমল হোৱাৰ ফলত ব্ৰেণ্ট খাৰুৱা তেলৰ মূল্য প্ৰতি বেৰেলত ৯৭.০৮ ডলাৰলৈ হ্ৰাস পায়। অৱশ্যে ইয়াৰ দাম পৰৱৰ্তী সময়ত কিছু বৃদ্ধি পালে। বিয়লি ৬:০০ বজালৈকে প্ৰতি বেৰেলত ব্ৰেণ্ট খাৰুৱা তেলৰ মূল্য আছিল ১০২.৬০ ডলাৰ।
একেদৰে পশ্চিম টেক্সাছ ইণ্টাৰমিডিয়েট (ডব্লিউটিআই) খাৰুৱা তেলৰ মূল্য প্ৰতি বেৰেলত ২.৪০ ডলাৰ হ্ৰাস পাই ৯৯.৮৭ ডলাৰ হয়। ইয়াৰ কিছু সময়ৰ পিছতে প্ৰতি বেৰেলত ১০২.৭০ ডলাৰলৈ বৃদ্ধি পায়। ইয়াৰ পাছতে প্ৰজেক্ট ফ্ৰিডম সাময়িকভাৱে স্থগিত ৰখাৰ খবৰৰ পিছত ডব্লিউ টি আই খাৰুৱা তেলৰ মূল্য প্ৰতি বেৰেলত ৮৮.৬৬ ডলাৰলৈ হ্ৰাস পায়। এই হ্ৰাসৰ পিছত ইয়াৰ মূল্য পুনৰ উত্থান ঘটিল। সন্ধিয়া ৬:০০ বজাত প্ৰতি বেৰেলত ডব্লিউটিআই খাৰুৱা তেলৰ মূল্য ৯২.৬৩ ডলাৰ।
বজাৰ বিশেষজ্ঞসকলৰ মতে পশ্চিম এছিয়াৰ যুদ্ধ সম্পূৰ্ণৰূপে শেষ হৈ হৰমুজ জলদ্বীপ সম্পূৰ্ণৰূপে মুকলি হ’লেও আন্তঃৰাষ্ট্ৰীয় বজাৰত খাৰুৱা তেলৰ মূল্য যথেষ্ট হ্ৰাস পোৱাৰ সম্ভাৱনা নাই। টিএনভি ফাইনেন্সিয়েল চাৰ্ভিচেছৰ চিইঅ’ তৰ্কেশ্বৰ নাথ বৈষ্ণৱে কয় যে পশ্চিম এছিয়াত শান্তিৰ ফলত আন্তঃৰাষ্ট্ৰীয় বজাৰত খাৰুৱা তেলৰ মূল্য প্ৰতি বেৰেলত ৮০-৮৫ ডলাৰলৈ হ্ৰাস পাব পাৰে। কিন্তু যুদ্ধৰ পূৰ্বৰ স্তৰলৈ অৰ্থাৎ প্ৰতি বেৰেলত ৬০-৭০ ডলাৰলৈ মূল্য ঘূৰি আহিবলৈ সময় লাগিব পাৰে। ইয়াৰ এটা প্ৰধান কাৰণ হ’ল পশ্চিম এছিয়াৰ যুদ্ধৰ সময়ত বোমা বিস্ফোৰণৰ ফলত তেলৰ আন্তঃগাঁথনিৰ ব্যাপক ধ্বংস।
তৰ্কেশ্বৰ নাথ বৈষ্ণৱৰ মতে, যুদ্ধৰ সময়ত ইজৰাইলৰ ইৰাণৰ তৈল আন্তঃগাঁথনিক তীব্ৰভাৱে লক্ষ্য কৰি লৈছিল। একেদৰে প্ৰতিশোধ হিচাপে ইৰানে আমেৰিকাৰ মিত্ৰ বুলি গণ্য কৰা উপসাগৰীয় কেইবাখনো দেশক আক্ৰমণ কৰি তেওঁলোকৰ তেলৰ আন্তঃগাঁথনিৰ যথেষ্ট ক্ষতিসাধন কৰে। ফলস্বৰূপে উপসাগৰীয় দেশসমূহৰ পৰা খাৰুৱা তেলৰ যোগান অনাগত দিনত যথেষ্ট ব্যাহত হৈ থাকিব। তেলৰ আন্তঃগাঁথনি পুনৰুদ্ধাৰ হ’লেহে বিশ্বৰ খাৰুৱা তেলৰ যোগান স্বাভাৱিক হ’ব, আৰু আন্তঃৰাষ্ট্ৰীয় বজাৰত ইয়াৰ মূল্য যুদ্ধৰ পূৰ্বৰ স্তৰলৈ ঘূৰি আহিব।
हिन्दुस्थान समाचार / মনোজ কুমাৰ শইকীয়া
