ইম্ফল, ৩১ মে’ (হি.স.)। মণিপুৰৰ নিৰাপত্তা বাহিনীয়ে নিষিদ্ধ ৰিভল্যুচনেৰী পিপলছ ফ্ৰণ্ট (আৰ পি এফ)/পিপলছ লিবাৰেচন আৰ্মী (পি এল এ)ৰ সৈতে জড়িত এজন সক্ৰিয় ধনদাবী কেডাৰক গ্ৰেপ্তাৰ কৰিছে । দেওবাৰে আনুষ্ঠানিকভাৱে এই কথা নিশ্চিত কৰে আৰক্ষীয়ে।
ইম্ফল পশ্চিম জিলাৰ ৱাংগোই লাইফ্ৰাকপাম মানিং লেইকাইৰ নিবাসী আহাইবাম মংগলসনা সিং (২৭) বুলি জানিব পৰা গৈছে। ইম্ফল পূৱ জিলাৰ পোৰমপাট থানাৰ সীমাৰ অন্তৰ্গত নিউ চেকন এলেকাৰ পৰা নিৰাপত্তা বাহিনীয়ে তেওঁক আটক কৰে।
আৰক্ষীয়ে জনোৱা মতে, অভিযুক্তই অঞ্চলটোত ধন দাবীৰ কামত সক্ৰিয়ভাৱে জড়িত হৈ আছিল আৰু দীৰ্ঘদিন ধৰি নিৰীক্ষণ কৰি থকা হৈছিল।
ইফালে মণিপুৰ আৰক্ষীয়ে এক সুকীয়া অভিযানত ইম্ফল পূৱ জিলাৰ খোংমান মাংজিন অঞ্চলৰ পৰা থৌবাল জিলাৰ টেকচাম মায়াই লেইকাই নিবাসী ছাইৰোম আলৱিছান (২৬) নামৰ এজন লোকক আটক কৰে।
তালাচীৰ সময়ত তেওঁৰ হাতৰ পৰা মুঠ ৫৫১টা ৫০০ মিলিলিটাৰৰ বিভিন্ন ব্ৰেণ্ডৰ বিয়েৰৰ কেন আৰু এখন মাৰুতি চুজুকি আলটো কে-১০ গাড়ী উদ্ধাৰ কৰা হয়। আৰক্ষীয়ে জনোৱা মতে, জব্দ কৰা সামগ্ৰীসমূহৰ উৎস আৰু গন্তব্যস্থানৰ তদন্ত অব্যাহত আছে।
আৰক্ষী বিষয়াৰ মতে, দুয়োটা গোচৰৰ অধিক তদন্ত চলি আছে আৰু নেটৱৰ্কৰ সৈতে জড়িত আন লোকসকলক চিনাক্ত কৰাৰ প্ৰচেষ্টা চলোৱা হৈছে।
হিন্দুস্থান সমাচাৰ / অৰৱিন্দ
