নতুন দিল্লী, ৩০ মে’(হি.স.)। ম্যানমাৰৰ ৰাষ্ট্ৰপতি উ মিন আউং হ্লেইং আজি ৩০ মে’ৰ পৰা ৩ জুনলৈ ভাৰত ভ্ৰমণৰ বাবে বিহাৰৰ বোধগয়াত উপস্থিত হ’বহি । তেওঁ প্ৰধানমন্ত্ৰী মোদীৰ সৈতে ১ জুনত নতুন দিল্লীত দ্বিপাক্ষিক আলোচনাত মিলিত হ’ব। বিতৰ্কিত নিৰ্বাচনী জয়ৰ পিছত এপ্ৰিল মাহত ৰাষ্ট্ৰপতি হোৱা ইউ মিন আউং হ্লাইঙৰ এইটোৱেই প্ৰথম বিদেশ ভ্ৰমণ।

আজি বোধগয়া ভ্ৰমণ কৰিব ম্যানমাৰৰ ৰাষ্ট্ৰপতিগৰাকীয়ে। তেওঁ পুৱা বিহাৰৰ গয়াজী বিমানবন্দৰত উপস্থিত হ’ব, তাৰ পৰা তেওঁক কটকটীয়া নিৰাপত্তাৰ অধীনত তেওঁৰ হোটেললৈ লৈ যোৱা হ’ব। পুৱা প্ৰায় ১১ বজাত তেওঁ মহাবোধি মন্দিৰ পৰিদৰ্শন কৰিব, য’ত তেওঁ পূজা কৰিব আৰু প্ৰতিনিধি দলৰ সৈতে প্ৰদক্ষিণ কৰিব। মহাবোধী মন্দিৰৰ উপৰিও তেওঁ বাৰ্মিজ মঠ, মহাবোধি ধম্মা একতা মঠ, মাটাংগৱাপিৰ সুজাতা মন্দিৰ আদিও দৰ্শন কৰিব।

ম্যানমাৰৰ ৰাষ্ট্ৰপতিগৰাকীয়ে ১ জুনত আন্তঃৰাষ্ট্ৰীয় বিগ কেট এলায়েন্স (আই বি চি এ) শীৰ্ষ সন্মিলনত অংশগ্ৰহণ কৰাৰ কথা আছিল। কিন্তু আফ্ৰিকাৰ কিছুমান দেশত ইব’লা ভাইৰাছৰ প্ৰাদুৰ্ভাৱৰ বাবে চতুৰ্থ ভাৰত-আফ্ৰিকা ফ’ৰাম সন্মিলন স্থগিত ৰখা হয়। এই সন্মিলনৰ লগত সংগতি ৰাখি আইবিচিএ সন্মিলন অনুষ্ঠিত হোৱাৰ কথা আছিল, সেয়েহে ইয়াকো পিছুৱাই দিয়া হ’ল। ইয়াৰ পিছতো ম্যানমাৰৰ ৰাষ্ট্ৰপতিগৰাকীয়ে আনুষ্ঠানিকভাৱে ভাৰত ভ্ৰমণলৈ আহি আছে।

এই ভ্ৰমণৰ সময়ত তেওঁ প্ৰধানমন্ত্ৰী মোদীৰ সৈতে ১ জুনত নতুন দিল্লীত দ্বিপাক্ষিক আলোচনাত মিলিত হ’ব। ভাৰত আৰু ম্যানমাৰৰ মাজত ঐতিহাসিক আৰু সাংস্কৃতিক সম্পৰ্ক আৰু অধিক শক্তিশালী কৰাৰ ক্ষেত্ৰত দুয়োগৰাকী নেতাই আলোচনা কৰিব। ২ জুনত তেওঁ মুম্বাইত উপস্থিত হ’ব, য’ত তেওঁ উদ্যোগ আৰু ব্যৱসায়ৰ সৈতে জড়িত অনুষ্ঠানসমূহত অংশগ্ৰহণ কৰাৰ লগতে বিভিন্ন উদ্যোগিক স্থান পৰিদৰ্শন কৰিব।

ম্যানমাৰৰ একাদশ ৰাষ্ট্ৰপতি আৰু প্ৰাক্তন সামৰিক সেনাধ্যক্ষ উ মিন আউং হ্লেইং। ২০২৬ চনৰ এপ্ৰিল মাহত ম্যানমাৰৰ আনুষ্ঠানিক ৰাষ্ট্ৰপতি হয়। ইয়াৰ পূৰ্বে ২০২১ চনৰ ফেব্ৰুৱাৰী মাহত তেওঁ সামৰিক অভ্যুত্থানৰ জৰিয়তে ক্ষমতা দখল কৰিছিল, ম্যানমাৰৰ নিৰ্বাচিত নেতা আং ছান ছু কিৰ চৰকাৰক উৎখাত কৰি ক্ষমতা দখল কৰিছিল।

হিন্দুস্থান সমাচাৰ / মনোজ কুমাৰ শইকীয়া