কলকাতা, ২৯ মে’ (হি.স.)। পশ্চিম বংগ চৰকাৰে বাংলাদেশী বা ৰোহিংগীয়া বুলি সন্দেহ কৰা লোকক ৰখাৰ বাবে ৰাজ্যৰ বিভিন্ন প্ৰান্তত হোল্ডিং চেণ্টাৰ মুকলি কৰিছে। ৰাজ্য প্ৰশাসনে এই শিবিৰসমূহৰ সংখ্যা আৰু তাত ৰখা লোকৰ সংখ্যাৰ বিশদ বিৱৰণ প্ৰকাশ কৰে।

শুকুৰবাৰে পুৱা প্ৰশাসনে জাৰি কৰা এক বিবৃতি অনুসৰি ৰাজ্যত এই পৰ্যন্ত মুঠ ১১টা হোল্ডিং চেণ্টাৰ স্থাপন কৰা হৈছে। ইয়াৰে কিছুমান শিবিৰ আৰক্ষী জিলা পর্যায়ত আৰু কিছুমান প্রশাসনিক জিলা পর্যায়ত চলাই আছে৷ বৰ্তমান বাৰুইপুৰ, সুন্দৰবন, বাছিৰহাট, বঙাইগাঁও, বৰাছাট, মুৰ্ছিদাবাদ, জংগীপুৰ আৰু কৃষ্ণনগৰ আৰক্ষী জিলাত এনে কেন্দ্ৰ মুকলি কৰা হৈছে। ইয়াৰ উপৰিও মালদা, কুচবিহাৰ, আৰু দক্ষিণ দিনাজপুৰ জিলাত হোল্ডিং চেণ্টাৰ স্থাপন কৰা হৈছে।

সৰ্বাধিক সংখ্যক হোল্ডিং চেণ্টাৰ স্থাপন কৰা হৈছে বাচিৰহাট আৰক্ষী জিলাত, য’ত মুঠ তিনিটা শিবিৰ চলি আছে। প্ৰশাসনে কয় যে এই অঞ্চলত বাংলাদেশী বা ৰোহিংগীয়া বুলি সন্দেহত গ্ৰেপ্তাৰ হোৱা লোকৰ সংখ্যা সৰ্বাধিক। বাকী থকা প্ৰতিখন জিলাতে এটাকৈ কেন্দ্ৰ স্থাপন কৰা হৈছে।

চৰকাৰী তথ্য অনুসৰি সমগ্ৰ ৰাজ্যৰ মুঠ ৩৩৫ জন লোকক বৰ্তমান হোল্ডিং চেণ্টাৰত ৰখা হৈছে। ইয়াৰ ভিতৰত আছে ১৪৮ জন পুৰুষ, ৯৯ জন মহিলা, আৰু ৮৮ জন শিশু। ইফালে মুৰ্ছিদাবাদ আৰক্ষী জিলাৰ হোল্ডিং চেণ্টাৰত ১৯ জন লোকক আবদ্ধ কৰি ৰখা হৈছে। বাকী সকলো কেন্দ্ৰতে ১০ জনতকৈ কম বন্দী আছে।

ইফালে দক্ষিণ দিনাজপুৰ জিলাৰ তপন অঞ্চলত অৱস্থিত ৰামপুৰত প্ৰশাসনিক ব্যৱহাৰৰ বাবে নিৰ্মাণ কৰা কৰ্মতীৰ্থ ভৱনটোক হোল্ডিং চেণ্টাৰলৈ ৰূপান্তৰিত কৰা হৈছে, য’ত কাম দ্ৰুতগতিত আগবাঢ়িছে।

লক্ষণীয় যে পশ্চিমবংগৰ মুখ্যমন্ত্রী সুৱেন্দু অধিকাৰীয়ে নির্দেশ দিছে যে পশ্চিমবংগত আটক হোৱা বাংলাদেশী বা আন জাতি-জনগোষ্ঠীক গ্ৰেপ্তাৰ কৰা নহ’ব, বৰঞ্চ পোনপটীয়াকৈ এটা হোল্ডিং চেণ্টাৰত ৰখা হ’ব আৰু তেওঁলোকৰ দেশলৈ বিতাড়নৰ বাবে বি এছ এফক গতাই দিয়া হ’ব ৷

হিন্দুস্থান সমাচাৰ / মনোজ কুমাৰ শইকীয়া