নতুন দিল্লী, ২৯ মে’ (হি.স.)। কেন্দ্ৰীয় জল শক্তি মন্ত্ৰী চি আৰ পাটিলে প্ৰচণ্ড গৰম আৰু উত্তাপৰ মাজত অনাময় কৰ্মীসকলৰ সমৰ্থনত জনসাধাৰণৰ অংশগ্ৰহণৰ আহ্বান জনোৱাৰ সময়তে নাগৰিকসকলক তেওঁলোকৰ প্ৰতি সংবেদনশীলতা, সন্মান, আৰু সহযোগিতা প্ৰদৰ্শন কৰিবলৈ আহ্বান জনায়। তেওঁ কয় যে পানী, ছাঁ, আৰু সন্মানৰ দৰে সৰু সৰু পদক্ষেপেও অনাময় কৰ্মীসকলৰ বাবে এক বৃহৎ সমৰ্থন হ'ব পাৰে।

কেন্দ্ৰীয় মন্ত্ৰী পাটিলে শুকুৰবাৰে সংবাদ মাধ্যমৰ আগত কয় যে দেশৰ বিভিন্ন প্ৰান্তত তীব্ৰ গৰমৰ মাজতো অনাময় কৰ্মীসকলে গাঁও, ৰাজপথ, ৰাজহুৱা স্থানসমূহ পৰিষ্কাৰ, সুৰক্ষিত আৰু সুস্থ কৰি ৰখাৰ বাবে অক্লান্তভাৱে কাম কৰি আছে। গৰম ৰ’দ আৰু কঠিন পৰিস্থিতিতো তেওঁলোকৰ নিষ্ঠা আৰু সেৱাৰ মনোভাৱ প্ৰেৰণাদায়ক।

তেওঁ কয় যে প্ৰধানমন্ত্ৰী নৰেন্দ্ৰ মোদীয়েও দেশবাসীক এই কঠিন সময়ত পৰম সংবেদনশীলতা আৰু মমতাৰে ইজনে সিজনৰ যত্ন ল’বলৈ আহ্বান জনাইছে। এই বাৰ্তাক আগুৱাই লৈ তেওঁ নাগৰিকসকলক ওচৰৰ অনাময় কৰ্মীসকলক খোৱাপানীৰ ব্যৱস্থা কৰিবলৈ, ছাঁত কিছু সময় জিৰণি ল’বলৈ উৎসাহিত কৰিবলৈ আৰু তেওঁলোকৰ লগত সন্মানজনক ব্যৱহাৰ কৰিবলৈ আহ্বান জনায়।

পাটিলে উল্লেখ কৰে যে পৰিষ্কাৰ-পৰিচ্ছন্নতা কেৱল চৰকাৰ বা ব্যক্তিগত শ্ৰমিকৰ দায়িত্ব নহয়, বৰঞ্চ সমাজৰ সামূহিক দায়িত্ব। স্বচ্ছ ভাৰত মিছনে (গ্ৰাম্য) নাগৰিকসকলক অনাময় কৰ্মীসকলৰ বাবে পানী, ছাঁ, আৰু মানৱীয় ব্যৱহাৰ নিশ্চিত কৰিবলৈও আহ্বান জনায়।

তেওঁ উল্লেখ কৰে যে অনাময় কৰ্মীসকলক মানৱতা, মমতা আৰু সংবেদনশীলতাৰে সহায় কৰি স্বচ্ছ, সুস্থ আৰু সংবেদনশীল ভাৰত গঢ়ি তোলাত অংশগ্ৰহণ কৰিব পাৰি।

হিন্দুস্থান সমাচাৰ / মনোজ কুমাৰ শইকীয়া