–১৫ বছৰীয়া বৈভৱ সূৰ্যবংশীৰ বিস্ফোৰক ইনিংছত ছানৰাইজাৰ্ছ হায়দৰাবাদৰ দৌৰৰ অন্ত

নতুন চণ্ডীগড়, ২৮ মে’ (হি.স.)। বুধবাৰে নিশা ইণ্ডিয়ান প্ৰিমিয়াৰ লীগ (আই পি এল) ২০২৬ এলিমিনেটৰত ৰাজস্থান ৰয়েলছৰ যুৱ বেটছমেন বৈভৱ সূৰ্যবংশীৰ বিস্ফোৰক বেটিঙে ছানৰাইজাৰ্ছ হায়দৰাবাদৰ সমগ্ৰ অভিযান কঁপাই তুলিছিল। ১৫ বছৰীয়া বেটছমেনগৰাকীয়ে মাত্ৰ ২৯টা বলত ৯৭ ৰান সংগ্ৰহ কৰি মেচখনৰ গতি সম্পূৰ্ণৰূপে সলনি কৰি দিয়ে।

পাৱাৰপ্লে’ত তেওঁৰ বিস্ফোৰক বেটিঙে হায়দৰাবাদৰ বলাৰসকলক সম্পূৰ্ণৰূপে অসহায় কৰি তুলিছিল। এই উজ্জ্বল ইনিংছৰ পিছতে ৰাজস্থান ৰয়েলছৰ খেলুৱৈ আৰু দল পৰিচালনাই সূৰ্যবংশীৰ আত্মবিশ্বাস আৰু মানসিকতাক মুকলিকৈ প্ৰশংসা কৰিছে।

মেচৰ পিছৰ সংবাদমেলত ৰাজস্থান ৰয়েলছৰ উইকেটকীপাৰ বেটছমেন ধ্ৰুৱ জুৰেলে কয় যে, বৈভৱৰ আটাইতকৈ ডাঙৰ শক্তি হ'ল তেওঁ বেছি পৰিকল্পনা নকৰে । তেওঁ বহুত অনুশীলন কৰে আৰু নিজৰ ওপৰত সম্পূৰ্ণ আস্থা থাকে। তেওঁ কেতিয়াও সন্দেহ নকৰে যে তেওঁ এই কাম কৰিব নোৱাৰে ।

জুৰালে আৰু কয় যে সূৰ্যবংশীৰ খেলখন অতি সহজ পন্থাৰ ওপৰত ভিত্তি কৰি গঢ় লৈ উঠিছে।

তেওঁ কয়, আমি যেতিয়া একাডেমীলৈ যাওঁ তেতিয়া আমাক কোৱা হয় যে বলাৰৰ ফালে নাচাব, কেৱল বলটো চাওক। কিন্তু ১৭-১৮ বছৰ বয়সত আমি প্ৰায়ে বলাৰৰ নামত হেঁচা অনুভৱ কৰো। বৈভৱে তেনেকুৱা একেবাৰেই নকৰে। তেওঁ কেৱল বলটো চায়।

তেওঁ হাঁহি হাঁহি আৰু কয়, তেওঁৰ মন্ত্ৰ স্পষ্ট: মই কোনো বলাৰৰ কথা চিন্তা নকৰো।

হায়দৰাবাদৰ প্ৰশিক্ষকো অভূভূত

ছানৰাইজাৰ্ছ হায়দৰাবাদৰ সহকাৰী প্ৰশিক্ষক জেমছ ফ্ৰেংকলিনে স্বীকাৰ কৰে যে তেওঁৰ দলটোৱে সূৰ্য্যবংশীক ৰখাবলৈ সকলো চেষ্টা কৰিছিল, কিন্তু সফল হ’ব পৰা নাছিল।

ফ্ৰেংকলিনে কয়, তেওঁৰ বিৰুদ্ধে বলিং কৰিবলৈ অতি কম ব্যৱধান আছিল। ভাল পিটচত এনে বেটছমেনক ৰখাটো অত্যন্ত কঠিন। আমি প্ৰথমতে সম্পূৰ্ণ লেংথ আৰু লেগ ষ্টাম্প লাইনৰ চাৰিওফালে বলিং কৰিবলৈ চেষ্টা কৰিছিলো, কিন্তু তেওঁ সোনকালে ইয়াৰ সুযোগ লৈছিল।

তেওঁ লগতে কয় যে হায়দৰাবাদে ফিল্ড চেটিংৰ পৰীক্ষা-নিৰীক্ষা কৰিছিল যদিও সূৰ্যবংশীয়ে সহজেই ডাঙৰ ডাঙৰ শ্বট মাৰিছিল।

ফ্ৰেংকলিনে কয়, মই নাভাবো যে ক্ৰিকেটত এনে প্ৰতিভা আগতে কোনেও দেখা নাই। এই বয়সত তেওঁ যি কৰি আছে সেয়া অবিশ্বাস্য। যদি তেওঁৰ কেৰিয়াৰত এতিয়াও ২৫ বছৰ বাকী আছে, তেন্তে তেওঁ কিমান ভাল হ'ব সেয়া ভাবিলে ভয় লাগে। টি-২০ ক্ৰিকেট এতিয়া নিৰ্ভীক খেলুৱৈৰ খেলত পৰিণত হৈছে ।

ফ্ৰেংকলিনে কয় যে নৱ প্ৰজন্মই টি-২০ ক্ৰিকেট খেলাৰ ধৰণ সম্পূৰ্ণৰূপে সলনি হৈছে।

তেওঁ কয়, আজিৰ যুৱ খেলুৱৈসকলে খেলখনক ভয় নকৰে। তেওঁলোকে সৰুৰে পৰা টি-২০ ক্ৰিকেট টিভিত চাই ডাঙৰ হৈছে। বেটছমেনে যিমান পাৰি সিমান চাৰি আৰু ছয় মাৰিবলৈ বিচাৰিছে আৰু বলাৰসকলে অহৰহ নতুন ভিন্নতাৰ সৈতে পৰীক্ষা-নিৰীক্ষা কৰি আছে।

তেওঁ লগতে কয়, বিগত পাঁচ বছৰত টি-২০ ক্ৰিকেটৰ গতি বহু পৰিমাণে সলনি হৈছে । বিশেষকৈ আই পি এলত খেলৰ গতি বিশ্বৰ অন্যান্য টি-২০ লীগতকৈ বহু বেছি দ্ৰুত ।

-----------------

হিন্দুস্থান সমাচাৰ / অৰৱিন্দ