নতুন দিল্লী, ২৮ মে’ (হি.স.)। লোকসভাৰ অধ্যক্ষ ওম বিৰলাই বৃহস্পতিবাৰে স্বতন্ত্ৰবীৰ বিনায়ক দামোদৰ সাৱৰকাৰৰ জন্ম বাৰ্ষিকী উপলক্ষে সংবিধান সদনৰ কেন্দ্ৰীয় প্ৰেক্ষাগৃহত তেওঁৰ প্ৰতিকৃতিত মাল্যাৰ্পণ কৰি শ্ৰদ্ধাঞ্জলি জ্ঞাপন কৰে। কেইবাগৰাকীও কেন্দ্ৰীয় মন্ত্ৰী, সাংসদ, প্ৰাক্তন সাংসদেও এই উপলক্ষে বীৰ সাৱৰকাৰক শ্ৰদ্ধাঞ্জলি জ্ঞাপন কৰে।
এই শ্ৰদ্ধাঞ্জলি অনুষ্ঠানত উপস্থিত থকা বিশিষ্ট ব্যক্তিসকলৰ ভিতৰত কেন্দ্ৰীয় স্বাস্থ্য আৰু পৰিয়াল কল্যাণ আৰু ৰাসায়নিক আৰু সাৰ মন্ত্ৰী জে পি নাড্ডা, সংসদীয় পৰিক্ৰমা আৰু সংখ্যালঘু পৰিক্ৰমা মন্ত্ৰী কিৰেণ ৰিজিজু, আইন আৰু ন্যায় আৰু সংসদীয় পৰিক্ৰমা বিভাগৰ ৰাজ্যিক মন্ত্ৰী (স্বতন্ত্ৰ দায়িত্ব) অৰ্জুন ৰাম মেঘৱাল, ভাৰতীয় জনতা পাৰ্টিৰ ৰাষ্ট্ৰীয় সভাপতি নীতিন নবীন আদিয়ে অংশগ্ৰহণ কৰে।
সংবিধান গৃহৰ কেন্দ্ৰীয় প্ৰেক্ষাগৃহত স্থাপন কৰা স্বতন্ত্ৰবীৰ ভি.ডি.সাৱৰকাৰ ৰ প্ৰতিকৃতি সৃষ্টি কৰিছিল প্ৰখ্যাত শিল্পী চন্দ্ৰকলা কুমাৰ কদমে। ২০০৩ চনৰ ২৬ ফেব্ৰুৱাৰীত এই প্ৰতিকৃতি আনুষ্ঠানিকভাৱে উন্মোচন কৰে তেতিয়াৰ ৰাষ্ট্ৰপতি ড০ এ পি জে আব্দুল কালামে।
উল্লেখযোগ্য যে ভাৰতৰ স্বাধীনতা আন্দোলনৰ এজন বিশিষ্ট বিপ্লৱী, কবি, সাহিত্যিক, সমাজ সংস্কাৰক হিচাপে জনাজাত স্বতন্ত্ৰবীৰ বিনায়ক দামোদৰ সাৱৰকাৰৰ ১৮৮৩ চনৰ ২৮ মে’ত জন্ম হৈছিল । ব্ৰিটিছ শাসনৰ বিৰুদ্ধে স্বাধীনতা সংগ্ৰামত তেওঁ গুৰুত্বপূৰ্ণ ভূমিকা পালন কৰিছিল আৰু যুৱক-যুৱতীসকলক দেশপ্ৰেমমূলক আৰু বিপ্লৱী কাৰ্যকলাপৰ প্ৰতি অনুপ্ৰাণিত কৰিছিল।
আন্দামান আৰু নিকোবৰ দ্বীপপুঞ্জৰ চেলুলাৰ জেলত কঠোৰ কাৰাবন্দী হৈ থকাৰ সময়ত বীৰ সাৱৰকাৰে অদম্য সাহস আৰু দৃঢ়তা প্ৰদৰ্শন কৰিছিল। সমাজ সংস্কাৰ আৰু আধুনিক ভাৰতৰ সৃষ্টিৰ সমৰ্থক সাৱৰকাৰে যুক্তিবাদ, সামাজিক দুষ্টতা নিৰ্মূল, আত্মনিৰ্ভৰ ভাৰতৰ দৃষ্টিভংগীক প্ৰচাৰ কৰিছিল।
তেওঁৰ জীৱন আৰু চিন্তাধাৰাই দেশপ্ৰেম, সাহস, সমাজ সংস্কাৰৰ প্ৰেৰণা অব্যাহত ৰাখিছে।
-----------------
হিন্দুস্থান সমাচাৰ / অৰৱিন্দ
