ইম্ফল, ২৭ মে’ (হি.স.)। মণিপুৰ আৰক্ষীয়ে বিগত দুদিন ধৰি সমগ্ৰ মণিপুৰত নিষিদ্ধ উগ্ৰপন্থী সংগঠনৰ কেইবাজনো কথিত আণ্ডাৰগ্ৰাউণ্ড সদস্যক গ্ৰেপ্তাৰ কৰিছে। পাহাৰীয়া জিলাসমূহত পৃথক পৃথক অভিযানৰ সময়ত অস্ত্ৰ-শস্ত্ৰ, বিস্ফোৰক, যোগাযোগৰ সঁজুলিও উদ্ধাৰ কৰা হয়।
মণিপুৰ আৰক্ষী মুখ্য কাৰ্যালয়ৰ তথ্য অনুসৰি ইম্ফল পূৱ জিলাৰ নিংগোমথং চাইৰোম লেইৰাকৰ বাসিন্দা থিংগুজাম গুলাপি সিং (৪৫) নামৰ নিষিদ্ধ সংগঠন প্ৰিপাক নামৰ এজন সক্ৰিয় সদস্যক যোৱা ২৬ মে’ত ইম্ফল পশ্চিম জিলাৰ সিংজামেই থানা এলেকাৰ অন্তৰ্গত কাকোৱা লিলাণ্ডো লম্পকৰ পৰা গ্ৰেপ্তাৰ কৰা হৈছিল। নিৰাপত্তাৰক্ষীয়ে তেওঁৰ হাতৰ পৰা এটা মোবাইল ফোন, এখন আধাৰ কাৰ্ড আৰু এখন স্কুটাৰ জব্দ কৰে।
ইয়াৰ উপৰিও নিৰাপত্তা বাহিনীয়ে গ্ৰেপ্তাৰ কৰে ৱাইখম শান্ত সিং ওৰফে টৰবট (৩২) নামৰ এজন কথিত সক্ৰিয় পিএলএ সদস্য। ইম্ফল পূৱ জিলাৰ লামলাই থানাৰ অন্তৰ্গত নোংদা কামেং অঞ্চলৰ পৰা গ্ৰেপ্তাৰ কৰে ছাবুংখোক মামাং লেইকাই।
আন এক অভিযানত আৰ পি এফ/পি এল এৰ স্বয়ম্ভু কেপ্তেইন আয়েকপাম ধৰ্মেন্দ্ৰ সিং (৪৮)ক ইৰিলবুং থানাৰ অন্তৰ্গত বৰ্তমানৰ বাসগৃহৰ পৰা গ্ৰেপ্তাৰ কৰা হয়। ধমেন, থাৱন্তবা, কুঞ্জো, ব্ৰজেন, থাৱাইলকাপাকে ধৰি আন কেইবাটাও নামেৰেও তেওঁ যায়। তেওঁৰ পৰা উদ্ধাৰ হৈছে এটা মোবাইল ফোন আৰু এখন আধাৰ কাৰ্ড।
ইয়াৰ পূৰ্বে মঙলবাৰে থৌবাল জিলাৰ নংপক ছেকমাই থানাৰ অন্তৰ্গত ফৰেষ্ট গেটৰ সমীপৰ মায়াই কেইথেলৰ পৰা বিভিন্ন ভূগৰ্ভস্থ সংগঠনৰ দুজন কথিত সদস্যক নিৰাপত্তা বাহিনীয়ে গ্ৰেপ্তাৰ কৰে । আটকাধীন দুজন আৰ পি এফ/পি এল এৰ সৈতে জড়িত চাংগুবাম নাংবা মেইটেই ওৰফে মেইৰাবা ওৰফে থৌবা (২১) আৰু এন আৰ এফ এমৰ সৈতে জড়িত বুলি অভিযোগ উত্থাপন হোৱা এজন নাবালক।
ইফালে উখৰুল জিলাৰ লিটান আৰক্ষী থানাৰ অন্তৰ্গত অভিযানত নিৰাপত্তাৰক্ষীয়ে তিনিটা অবৈধ বাংকাৰ ধ্বংস কৰে। এটা বাংকাৰ পাটলেইজাং গাঁৱত থকাৰ বিপৰীতে বাকী দুটা টি এম কাছাম অঞ্চলৰ ৰাউডেই গাঁৱত ধ্বংস হয়। নিৰাপত্তাৰক্ষীয়ে প্ৰায় পাঁচ কিলোগ্ৰাম ওজনৰ এটা ইম্প্ৰভাইজড এক্সপ্ল’ছিভ ডিভাইচ (আই ই ডি), দুটা পম্পি গান, চাৰ্জাৰৰ সৈতে দুটা বাওফেং ৰেডিঅ’ চেট, তিনিটা সজীৱ ১২ ব’ৰ কাৰ্টিজ আৰু বিভিন্ন কেলিবাৰৰ ১২টা খালী গোলা উদ্ধাৰ কৰে।
চুৰাচান্দপুৰ আৰক্ষী থানাৰ অন্তৰ্গত হেংকোট গাঁৱৰ বনাঞ্চলত চলোৱা এক সুকীয়া তালাচী অভিযানত নিৰাপত্তা বাহিনীয়ে বৃহৎ পৰিমাণৰ অস্ত্ৰ-শস্ত্ৰ আৰু বিস্ফোৰক উদ্ধাৰ কৰে। উদ্ধাৰ হোৱা সামগ্ৰীসমূহৰ ভিতৰত আছে এটা এম কে-আই আই ৰাইফল, দুটা মেগজিনযুক্ত এ কে-৪৭ ৰাইফল, এটা .৩০৩ ৰাইফল, এটা ১২ ব’ৰ ৰাইফল, কেইবাটাও ঘৰতে বনোৱা অস্ত্ৰ-শস্ত্ৰ, দুটা এছ বি এম এল বন্দুক, এটা এছ বি বি এল বন্দুক আৰু ৫টা আই ই ডি।
ইয়াৰ উপৰিও বিষয়াসকলে ঘটনাস্থলীৰ পৰা এটা বেতাঁৰ হেণ্ডছেট, এটা ঘৰতে বনোৱা লঞ্চাৰ, মেগাজিনৰ পাউচ, ছদ্মবেশ জংগল বুট, এটা কেমফ্লেজ কেপ, লাইভ কাৰ্টিজ আৰু খালী কাৰ্টিজ উদ্ধাৰ কৰে।
-----------------
হিন্দুস্থান সমাচাৰ / অৰৱিন্দ
