তিৰুৱনন্তপুৰম, ২৭ মে’ (হি.স.)। প্ৰৱৰ্তন সঞ্চালকালয়ে কোচিন মিনাৰেলছ এণ্ড ৰুটাইল লিমিটেড (চিএমআৰএল)-এক্সাল’জিক বিত্তীয় লেনদেনৰ সৈতে জড়িত ধন সৰবৰাহৰ গোচৰত কেৰালাৰ প্ৰাক্তন মুখ্যমন্ত্ৰী তথা বিধানসভাৰ বিৰোধী দলৰ নেতা পিনাৰায় বিজয়ন, তেওঁৰ কন্যা বীনা বিজয়ন আৰু জোঁৱাই পি.এ. মহম্মদ ৰিয়াছৰ সৈতে জড়িত কেইবাটাও ঘাটিত অভিযান চলায়। ইডিৰ তদন্ত আৰু চমনক প্ৰত্যাহ্বান জনাই কেৰালা উচ্চ ন্যায়ালয়ে আবেদন খাৰিজ কৰাৰ মাত্ৰ এদিন পিছতে এই অভিযান সংঘটিত হয়।
থিৰুৱনন্তপুৰমৰ বেকাৰী জংচনৰ সমীপৰ বিজয়নৰ ভাড়াঘৰ আৰু কান্নুৰত থকা তেওঁৰ পূৰ্বপুৰুষৰ ঘৰত ইডিৰ বিষয়াসকলে তালাচী চলায়। চিএমআৰএলৰ পৰিচালন সঞ্চালক সচিধৰণ কৰ্থৰ বাসগৃহ, বিজয়নৰ জোঁৱাই ৰিয়াছৰ কোঝিকোড বাসগৃহ আৰু তেওঁৰ কন্যা বীনা বিজয়নৰ মালিকানাধীন এক্সাল’জিক ছলিউচনৰ বেংগালুৰু কাৰ্যালয়তো একেলগে অভিযান চলোৱা হয়। সূত্ৰই জনোৱা মতে, ইডিয়ে কেৰালা আৰু কৰ্ণাটকৰ মুঠ ১২টা স্থানত অনুসন্ধান চলাইছিল।
চৰকাৰী সূত্ৰৰ পৰা জানিব পৰা মতে, আজি পুৱাৰ ভাগত প্ৰচণ্ড নিৰাপত্তাৰ মাজত ইডিৰ দল আহি পোৱাৰ সময়ত পিনাৰায়ী বিজয়ন, তেওঁৰ কন্যা বীনা বিজয়নকে ধৰি পৰিয়ালৰ অন্যান্য সদস্য তিৰুৱনন্তপুৰম বাসগৃহত উপস্থিত আছিল। বিষয়াসকলে বিত্তীয় লেনদেনৰ সৈতে জড়িত কেইবাটাও নথি-পত্ৰ, ডিজিটেল ৰেকৰ্ড, ইলেক্ট্ৰনিক ডিভাইচ পৰীক্ষা কৰে। অৱশ্যে জব্দ কৰা সামগ্ৰী বা তদন্তৰ সবিশেষ এতিয়াও আনুষ্ঠানিকভাৱে শ্বেয়াৰ কৰা নাই ইডিয়ে।
এই গোচৰটোত চিএমআৰএল আৰু এক্সাল’জিক ছলিউচনৰ মাজত হোৱা বিত্তীয় লেনদেনৰ সৈতে জড়িত ধন সৰবৰাহ জড়িত হৈ আছে। আয়কৰ অন্তৱৰ্তীকালীন নিষ্পত্তি ব’ৰ্ডৰ প্ৰতিবেদনত দাবী কৰা হৈছে যে চিএমআৰএলে এক্সাল’জিক ছলিউচনক “পৰামৰ্শ সেৱা”ৰ নামত প্ৰায় ১.৭২ কোটি টকা দিছিল, যদিও এনে কোনো সেৱা প্ৰদান কৰা হোৱা নাছিল বুলি অভিযোগ উঠিছে। বিৰোধী দলসমূহে এই অভিযোগত দুৰ্নীতি আৰু প্ৰভাৱৰ অপব্যৱহাৰৰ অভিযোগ উত্থাপন কৰিছিল আৰু ইয়াক “মাহেকীয়া ধন” বুলি অভিহিত কৰিছিল।
চিএমআৰএল আৰু ইয়াৰ বিষয়াসকলে ইডিৰ তদন্ত আৰু চমনক আদালতত প্ৰত্যাহ্বান জনাই যুক্তি দিছিল যে তেওঁলোকে ইতিমধ্যে আয়কৰ নিষ্পত্তি ব’ৰ্ডৰ পৰা সকাহ পাইছে, আৰু সেয়েহে ধন সৰবৰাহৰ প্ৰতিৰোধ আইন (পিএমএলএ)ৰ অধীনত অধিক ব্যৱস্থা গ্ৰহণ কৰাটো ন্যায্য নহয়। আবেদনকাৰীসকলে লগতে যুক্তি আগবঢ়ায় যে ইডিৰ চমন জাৰি কৰাৰ আৰু তদন্ত চলাই নিয়াৰ বিধিগত কৰ্তৃত্বৰ অভাৱ।
এই যুক্তিসমূহ নাকচ কৰি কেৰালা উচ্চ ন্যায়ালয়ে স্পষ্ট কৰি দিয়ে যে আয়কৰ গোচৰত প্ৰদান কৰা সকাহৰ অৰ্থ এইটো নহয় যে ইডিয়ে ধন সৰবৰাহৰ অভিযোগৰ তদন্ত কৰিব নোৱাৰে। ন্যায়াধীশ টি.আৰ. ৰবিয়ে উল্লেখ কৰে যে তদন্ত এতিয়াও প্ৰাৰম্ভিক পৰ্যায়ত আছে আৰু এই পৰ্যায়ত চমনক প্ৰত্যাহ্বান জনোৱাটো অকাল হ’ব। আদালতে লগতে উল্লেখ কৰে যে, উচ্চতম ন্যায়ালয়ৰ বিভিন্ন ৰায় অনুসৰি পিএমএলএৰ অধীনত তদন্ত আৰম্ভ বা চলাবলৈ ইডিয়ে পৃথক এফআইআৰৰ প্ৰয়োজন নাই।
উচ্চ ন্যায়ালয়ৰ নিৰ্দেশৰ এদিন পিছতে ইডিয়ে ব্যাপক অনুসন্ধান অভিযান আৰম্ভ কৰে, ইয়াৰ পৰা বুজা যায় যে সংস্থাটোৱে বিত্তীয় লেনদেন আৰু গোচৰৰ সম্ভাৱ্য ধন সৰবৰাহৰ দিশসমূহৰ ওপৰত পুংখানুপুংখ তদন্ত কৰি আছে।
ৰাজনৈতিক বিশ্লেষকসকলৰ মতে অনাগত দিনত এই কাৰ্য কেৰালাৰ ৰাজনীতিত এটা ডাঙৰ বিষয় হৈ পৰিব পাৰে, কিয়নো বিষয়টোত ৰাজ্যখনৰ এটা শীৰ্ষ ৰাজনৈতিক পৰিয়াল পোনপটীয়াকৈ জড়িত হৈ আছে।
বিৰোধী দলসমূহে নিৰপেক্ষ তদন্তৰ দাবী জনোৱাৰ বিপৰীতে বাওঁ ডেম’ক্ৰেটিক ফ্ৰণ্টৰ নেতাসকলে ইয়াক ৰাজনৈতিক প্ৰতিশোধৰ কাৰ্য্য বুলি অভিহিত কৰিছে। ইফালে বিজেপি নেতাসকলে দাবী কৰে যে ইডিয়ে আইন অনুসৰি কাম কৰি আছে আৰু বিষয়টোৰ সত্যতা প্ৰকাশ কৰিব লাগে।
বৰ্তমান সকলোৰে দৃষ্টি অভিযান আৰু নথি-পত্ৰ পৰীক্ষাৰ পিছত ইডিৰ অধিক পদক্ষেপৰ ওপৰত। বিশ্বাস কৰা হয় যে অনাগত দিনত বহুতো গুৰুত্বপূৰ্ণ প্ৰকাশৰ উন্মেষ ঘটিব পাৰে, আৰু ইয়াৰ লগত জড়িত ব্যক্তিসকলকো বিতংভাৱে প্ৰশ্ন কৰা হ’ব পাৰে।
হিন্দুস্থান সমাচাৰ / অৰৱিন্দ
