নতুন দিল্লী, ২৫ মে’ (হি.স.)। পশ্চিম এছিয়াৰ সংকটৰ মাজতে ৰাজহুৱা খণ্ডৰ তেল আৰু গেছ বিপণন কোম্পানীসমূহে আজি পুনৰবাৰ পেট্ৰ’ল-ডিজেলৰ মূল্য বৃদ্ধি কৰিছে। প্ৰতি লিটাৰ পেট্ৰ’লৰ মূল্য ২.৬১ টকা আৰু প্ৰতি লিটাৰ ডিজেলৰ মূল্য ২.৭১ টকা বৃদ্ধি কৰা হৈছে । যোৱা ১০ দিনত এয়া চতুৰ্থটো বৃদ্ধি। নতুন হাৰ কাৰ্যকৰী হৈছে।

ইণ্ডিয়ান অইলৰ ৱেবছাইটৰ তথ্য অনুসৰি ৰাষ্ট্ৰীয় ৰাজধানী দিল্লীত পেট্ৰ’লৰ মূল্য ২.৬১ টকা বৃদ্ধি পাই ১০২.১২ টকা হৈছে, যিটো পূর্বৰ ৯৯.৫১ টকা আছিল। ডিজেলৰ মূল্য ২.৭১ টকা বৃদ্ধি পাই ৯৫.২০ টকা হৈছে, যিটো পূর্বৰ ৯২.৪৯ টকা আছিল।

ইয়াৰ উপৰিও কলকাতাত পেট্ৰ’ল প্ৰতি লিটাৰত ১১৩.৫১ ₹ হৈছেগৈ, যিটো ২.৮৭ ₹ বৃদ্ধি কৰা হৈছে । মুম্বাইত প্ৰতি লিটাৰৰ মূল্য ১১১.২১ ₹ হোৱাৰ বিপৰীতে চেন্নাইত প্ৰতি লিটাৰৰ মূল্য ১০৭.৭৭ ₹ হৈছেগৈ। একেদৰে কলকাতাত ডিজেলৰ মূল্য প্ৰতি লিটাৰত ₹৯৯.৮২ হৈছেগৈ। মুম্বাইত প্ৰতি লিটাৰ ডিজেলৰ মূল্য ₹৯৭.৮৩ হৈছেগৈ।

বিশেষজ্ঞসকলে কয় যে বিশ্বব্যাপী খাৰুৱা তেলৰ উচ্চ মূল্য আৰু টকা দুৰ্বল হোৱাৰ মাজতে পেট্ৰ’ল-ডিজেলৰ এই বৃদ্ধি হৈছে। বিশ্বব্যাপী খাৰুৱা তেলৰ বৰ্ধিত মূল্য আৰু দুৰ্বল হৈ অহা টকাই তেল বিপণন কোম্পানীসমূহৰ আমদানি ব্যয়ৰ ওপৰত হেঁচা বৃদ্ধি কৰিছে। ইয়াৰ পূৰ্বে শনিবাৰে পেট্ৰ’ল আৰু ডিজেলৰ মূল্য ক্ৰমে ৮৭ পইচা আৰু প্ৰতি লিটাৰত ৯১ পইচা বৃদ্ধি কৰা হৈছিল।

পেট্ৰ’ল-ডিজেলৰ মূল্য নবীকৃত বৃদ্ধিৰ সন্দৰ্ভত মন্তব্য কৰি আম আদমি পাৰ্টিৰ ৰাষ্ট্ৰীয় মিডিয়া ইনচাৰ্জ অনুৰাগ ধনদাই কয় যে, কেৱল যোৱা ১০ দিনত পেট্ৰ'ল-ডিজেলৰ মূল্য ₹৭.৫০ বৃদ্ধি পাইছে। দেশৰ কোনো চহৰ বা ৰাজ্য বাকী নাই য'ত পেট্ৰ'ল প্ৰতি লিটাৰ ১০০ টকাতকৈ কম মূল্যত পোৱা যাব। এজন দুখীয়া ব্যক্তিয়ে কেনেকৈ ইন্ধনৰ মূল্য বহন কৰিব পাৰিব?

উল্লেখযোগ্য যে ইন্ধনৰ মূল্য প্ৰথম সংশোধন কৰা হৈছিল ১৫ মে’ত। তেতিয়াৰ পৰা পেট্ৰ’ল আৰু ডিজেলৰ মূল্য মুঠ প্ৰতি লিটাৰত ₹৭.৫০ টকা বৃদ্ধি পাইছে। বৃদ্ধি পোৱা ইন্ধনৰ মূল্যই মধ্যবিত্ত আৰু দৈনিক যান-বাহন সেৱনকাৰীৰ উদ্বেগ বৃদ্ধি কৰিছে।

হিন্দুস্থান সমাচাৰ / মনোজ কুমাৰ শইকীয়া