আহমেদাবাদ, ২২ মে’ (হি.স.)। ইণ্ডিয়ান প্ৰিমিয়াৰ লীগ (আই পি এল) ২০২৬ লীগ পৰ্যায়ৰ অন্তিমখন খেলত গুজৰাট টাইটানছে চেন্নাই ছুপাৰ কিংছক ৮৯ ৰানত পৰাস্ত কৰি গুঞ্জৰিত প্ৰদৰ্শন আগবঢ়ায়। এই পৰাজয়ৰ লগে লগে চেন্নাই ছুপাৰ কিংছৰ প্লে অফত প্ৰৱেশৰ আশা ছিন্নভিন্ন হৈ পৰিল, আৰু দলটোৱে প্ৰতিযোগিতাখনৰ পৰা বাহিৰ হ’ল। ৰানৰ পাৰ্থক্যৰ ক্ষেত্ৰত এইটোৱেই আই পি এলৰ ইতিহাসত চেন্নাইৰ সৰ্ববৃহৎ পৰাজয় বুলি বিবেচিত হৈছে।

আহমেদাবাদৰ নৰেন্দ্ৰ মোডী ষ্টেডিয়ামত খেলা খেলখনত প্ৰথমে বেটিং কৰি গুজৰাট টাইটানছে ২০ অভাৰত ৪ উইকেটত ২২৯ ৰান সংগ্ৰহ কৰে। দলটোৰ টপ অৰ্ডাৰে উজ্জ্বল প্ৰদৰ্শন আগবঢ়াই ডাঙৰ স্ক’ৰৰ ভেটি স্থাপন কৰে।

গুজৰাটৰ হৈ ছাই সুদৰ্শনে সৰ্বাধিক আকৰ্ষণীয় ইনিংছ খেলি ৫৩টা বলত ৮৪ ৰান সংগ্ৰহ কৰে। তেওঁৰ ইনিংছত আছিল ৭টা চাৰি আৰু ৪টা ছয়। অধিনায়ক শ্বুবমেন গিলে ৩৭ বলত ৬৪ ৰানৰ কুইকফায়াৰ ইনিংছ খেলাৰ বিপৰীতে জোছ বাটলাৰে ২৭ বলত ৫৭ ৰান সংগ্ৰহ কৰি দলটোক শক্তিশালী স্থানত ৰাখিলে।

বলিংতো গুজৰাটে আধিপত্য বিস্তাৰ কৰিছিল। মহম্মদ চিৰাজ, কাগিছ’ ৰাবাদা, আৰু ৰছিদ খানে উজ্জ্বল প্ৰদৰ্শন আগবঢ়াই বিপক্ষৰ বেটিং ক্ৰম অহৰহ হেঁচাত ৰাখি তিনিটাকৈ উইকেট দখল কৰে।

লক্ষ্য খেদি খেদি চেন্নাই ছুপাৰ কিংছৰ আৰম্ভণি দুৰ্বল আছিল, ১৩.৪ অভাৰত মাত্ৰ ১৪০ ৰান সংগ্ৰহ কৰি অল আউট হৈছিল। শিৱম ডুবেই ১৭টা বলত ৪৭ ৰানৰ আগ্ৰাসী ইনিংছ খেলিলেও আনটো মূৰৰ পৰা বিশেষ সমৰ্থন নাপালে।

চেন্নাইৰ আন বেটছমেনসকলে নিয়মীয়া ব্যৱধানত উইকেট হেৰুৱাই সম্পূৰ্ণ অসফল হ’ল। অধিনায়ক ৰুতুৰাজ গাইকৱাদ, দেৱাল্ড ব্ৰেভিছ, আৰু অন্যান্য গুৰুত্বপূৰ্ণ বেটছমেনে ডাঙৰ ইনিংছ কৰিব নোৱাৰিলে।

এই পৰাজয়ে চেন্নাই ছুপাৰ কিংছক প্লে অফৰ দৌৰৰ পৰা বাহিৰ কৰি দিয়াৰ বিপৰীতে ৰাজস্থান ৰয়েলছ, পঞ্জাব কিংছ, কলকাতা নাইট ৰাইডাৰ্ছ, আৰু দিল্লী কেপিটেলছৰ মাজত চূড়ান্ত স্থানৰ প্ৰতিযোগিতা আৰু অধিক ৰোমাঞ্চকৰ হৈ পৰিছে।

হিন্দুস্থান সমাচাৰ / অৰৱিন্দ