নতুন দিল্লী, ২২ মে’(হি.স.)। প্ৰধানমন্ত্ৰী নৰেন্দ্ৰ মোদীয়ে চাইপ্ৰাছৰ ৰাষ্ট্ৰপতি নিকোছ ক্রিষ্টোডুলিডেছৰ সৈতে দুয়োখন দেশৰ ব্যাপক আৰু বিশ্বাসযোগ্য অংশীদাৰিত্ব আৰু অধিক শক্তিশালী কৰাৰ বাবে শুকুৰবাৰে বিস্তৃত আলোচনাত মিলিত হয় ৷ এক উল্লেখযোগ্য পদক্ষেপত ভাৰত আৰু চাইপ্ৰাছে তেওঁলোকৰ দ্বিপাক্ষিক সম্পৰ্কক কৌশলগত অংশীদাৰিত্বৰ স্তৰলৈ উন্নীত কৰিলে। দুয়োগৰাকী নেতাই সন্ত্ৰাসবাদ বিৰোধী, সামুদ্ৰিক নিৰাপত্তা, কূটনৈতিক প্ৰশিক্ষণ, উদ্ভাৱন, শিক্ষা, সংস্কৃতিকে ধৰি কেইবাখনো চুক্তিত স্বাক্ষৰ কৰে ।

বৈদেশিক পৰিক্ৰমা মন্ত্ৰালয়ৰ এগৰাকী মুখপাত্ৰই কয় যে এই চৰ্চাত বাণিজ্য আৰু বিনিয়োগ, প্ৰতিৰক্ষা আৰু নিৰাপত্তা, সামুদ্ৰিক আৰু বিত্তীয় সংযোগ, প্ৰযুক্তি আৰু উদ্ভাৱন, গতিশীলতা, শিক্ষা, সংস্কৃতি আৰু ভাৰত-ইউৰোপীয় ইউনিয়নৰ সম্পৰ্ক আদি বিষয় সামৰি লোৱা হৈছিল। আঞ্চলিক আৰু বিশ্বজনীন বিষয়ত মতামতও ভাগ-বতৰা কৰে। দুয়োগৰাকী নেতাই সীমা অতিক্ৰম কৰি সন্ত্ৰাসবাদকে ধৰি সকলো ধৰণৰ আৰু প্ৰকাশভংগীৰে সন্ত্ৰাসবাদৰ বিৰুদ্ধে যুঁজ দিয়াৰ প্ৰতিশ্ৰুতি পুনৰ প্ৰকাশ কৰে।

বৈদেশিক পৰিক্ৰমা মন্ত্ৰালয়ৰ তথ্য অনুসৰি ভাৰত আৰু চাইপ্ৰাছ ১৪টা বিষয়ত সহমতত উপনীত হয়। দুয়োখন দেশে নিজৰ সম্পৰ্কক কৌশলগত অংশীদাৰিত্বলৈ উন্নীত কৰিবলৈ সন্মত হয়। ইয়াৰ দ্বাৰা দুয়োখন দেশৰ মাজত বাণিজ্য শক্তিশালী হোৱাৰ লগতে নিৰাপত্তা খণ্ডত সহযোগিতা বৃদ্ধি পাব।

দুয়োখন দেশে সন্ত্ৰাসবাদৰ বিৰুদ্ধে যৌথ কৰ্মগোট গঠন কৰিব। ভাৰতৰ ইণ্ডো-পেচিফিক অ’চেনছ ইনিচিয়েটিভত যোগদানৰ সিদ্ধান্ত চাইপ্ৰাছে। ভাৰতে চাইপ্ৰাছক উপহাৰ দিব অত্যাধুনিক থলুৱা ভ্ৰাম্যমাণ চিকিৎসালয় ভীষ্ম কিউব। আগন্তুক পাঁচ বছৰৰ বাবে প্ৰতিৰক্ষা সহযোগিতাৰ বাবে দুয়োখন দেশে এক ৰোডমেপ প্ৰস্তুত কৰিছে।

কূটনৈতিক প্ৰশিক্ষণ, উচ্চ শিক্ষা আৰু গৱেষণা, সাংস্কৃতিক বিনিময় আৰু সহযোগিতা, উদ্ভাৱন আৰু প্ৰযুক্তিৰ ওপৰত দুয়োখন দেশৰ মাজত বুজাবুজি চুক্তি স্বাক্ষৰিত হৈছে। অনুসন্ধান আৰু উদ্ধাৰৰ ক্ষেত্ৰতো দুয়োখন দেশে সহযোগিতা আগবঢ়াব। দুয়োখন দেশৰ মাজত চাইবাৰ সুৰক্ষা আৰু কূটনৈতিক আলোচনাও স্থাপন কৰা হ’ব। ১৮ মে’ত দুয়োখন দেশে ভাৰত-চাইপ্ৰাছ মহাকাশ দিৱস উদযাপন কৰাৰ লগতে মুম্বাইত চাইপ্ৰাছ বাণিজ্য কেন্দ্ৰও উদ্বোধন কৰে।

আলোচনাৰ অন্তত দুয়োগৰাকী নেতাই এক যৌথ বিবৃতি প্ৰকাশ কৰে। ইয়াত প্ৰধানমন্ত্ৰী মোদীয়ে উল্লেখ কৰিছে যে ভাৰত আৰু চাইপ্ৰাছৰ মাজত ক্ৰমবৰ্ধমান বিশ্বাস আৰু ভাৰত-ইউৰোপীয় সংঘৰ মুক্ত বাণিজ্য চুক্তি (এফ টি এ)য়ে নতুন সুযোগ মুকলি কৰিছে, আৰু অহা পাঁচ বছৰত চাইপ্ৰাছৰ পৰা ভাৰতলৈ বিনিয়োগ দুগুণ কৰাৰ লক্ষ্যৰে দুয়োখন দেশ আগবাঢ়ি যাব। তেওঁ এই সম্পৰ্কক কৌশলগত অংশীদাৰিত্বলৈ ৰূপান্তৰিত কৰাৰ কথাও ঘোষণা কৰে।

প্ৰধানমন্ত্ৰীয়ে উল্লেখ কৰে যে বিগত দশকত চাইপ্ৰাছৰ পৰা ভাৰতলৈ বিনিয়োগ প্ৰায় দুগুণ বৃদ্ধি পাইছে, যিয়ে দুয়োখন দেশৰ মাজত বৃদ্ধি পোৱা আস্থাক প্ৰতিফলিত কৰিছে। তেওঁ কয় যে ভাৰত-ইউৰোপীয় সংঘৰ মুক্ত বাণিজ্য চুক্তিয়ে নতুন অৰ্থনৈতিক সুযোগৰ সৃষ্টি কৰিছে, আৰু এই সুযোগসমূহৰ লাভ উঠালে দুয়োখন দেশেই অহা পাঁচ বছৰত পুনৰ বিনিয়োগ দুগুণ কৰাৰ লক্ষ্যৰে আগবাঢ়ি যাব।

তেওঁ কয় যে ভাৰত-চাইপ্ৰাছৰ সম্পৰ্কই বাৰে বাৰে সময়ৰ পৰীক্ষাত থিয় দিছে, আৰু কৌশলগত অংশীদাৰিত্ব গঠনে এই সম্পৰ্কত নতুন উচ্চাকাংক্ষা আৰু গতিবেগৰ সৃষ্টি কৰিব। সম্পৰ্ক আৰু অধিক শক্তিশালী কৰিবলৈ দুয়োখন দেশে প্ৰব্ৰজন আৰু গতিশীলতা চুক্তি আৰু সামাজিক সুৰক্ষা চুক্তিৰ ওপৰত সহমতত উপনীত হৈছে। উচ্চ শিক্ষা আৰু সংস্কৃতিৰ ক্ষেত্ৰতো চুক্তি সম্পাদিত হৈছে।

প্ৰধানমন্ত্ৰীয়ে কয় যে ভাৰত-ইউৰোপৰ সম্পৰ্কই নতুন সোণালী যুগত প্ৰৱেশ কৰিছে। এই সময়ত ইউৰোপীয় সংঘ পৰিষদৰ সভাপতিত্বৰে চাইপ্ৰাছ ভাৰত আৰু ইউৰোপৰ বাকী অংশৰ মাজত বিনিয়োগৰ এক গুৰুত্বপূৰ্ণ দ্বাৰ হিচাপে আত্মপ্ৰকাশ কৰিছে।

বিশ্বজনীন বিষয়ৰ আলোচনাৰ কথা উল্লেখ কৰি মোদীয়ে কয় যে ইউক্ৰেইনতেই হওক বা পশ্চিম এছিয়াতেই হওক, ভাৰতে সংঘাতৰ ক্ষিপ্ৰতাৰে অন্ত পেলোৱা আৰু শান্তি প্ৰতিষ্ঠাৰ প্ৰচেষ্টাক সমৰ্থন কৰি যাব। ক্ৰমবৰ্ধমান বিশ্বজনীন প্ৰত্যাহ্বানসমূহৰ সৈতে মোকাবিলা কৰিবলৈ বিশ্ব প্ৰতিষ্ঠানসমূহত দ্ৰুত আৰু উল্লেখযোগ্য সংস্কাৰো অতি প্ৰয়োজনীয়।

যৌথ বিবৃতিত চাইপ্ৰাছৰ ৰাষ্ট্ৰপতি নিকোছ ক্রিষ্টোডুলিডেছে কয় যে চাইপ্ৰাছে ভাৰতৰ ক্ৰমবৰ্ধমান বিশ্বব্যাপী ভূমিকাক সমৰ্থন কৰে। নিৰাপত্তা পৰিষদত ভাৰতৰ উচিত স্থানৰ যোগ্য৷ চাইপ্ৰাছৰ স্বাধীনতা, সাৰ্বভৌমত্ব, আৰু ভূখণ্ডৰ অখণ্ডতাৰ প্ৰতি ভাৰতক অদম্য সমৰ্থনৰ বাবে আমি ধন্যবাদ জনাইছো।

তেওঁ কয় যে চাইপ্ৰাছ ভাৰত আৰু ইউৰোপৰ মাজত নিৰ্ভৰযোগ্য, সুস্থিৰ আৰু বিশ্বাসযোগ্য দলং হিচাপে কাম কৰিবলৈ অনন্য অৱস্থাত আছে। এই দলংখনে ইউৰোপীয় সংঘ, পূব ভূমধ্যসাগৰ আৰু বহল মধ্যপ্ৰাচ্যৰ মাজত এখন দলং হিচাপে কাম কৰিব। ভূ-ৰাজনৈতিক অনিশ্চয়তাৰ এই যুগত তেওঁৰ দৃঢ় বিশ্বাস যে ইউৰোপীয় ইউনিয়ন আৰু ভাৰতৰ অংশীদাৰিত্ব আৰু অধিক শক্তিশালী হ’ব লাগিব।

চাইপ্ৰাছ-ভাৰতৰ সম্পৰ্ক ভাগ-বতৰা কৰা ঐতিহাসিক অভিজ্ঞতা আৰু উমৈহতীয়া মূল্যবোধৰ ওপৰত ভিত্তি কৰি গঢ় লৈ উঠিছে।

তেওঁ কয় যে দুয়োখন দেশৰ মাজৰ সম্পৰ্ক এতিয়া কৌশলগত দৃষ্টিকোণৰ পৰা এক কঠিন অংশীদাৰিত্বলৈ বিকশিত হৈছে, যিটো অংশীদাৰিত্বই ইতিমধ্যে নিৰাপত্তা, প্ৰতিৰক্ষা, প্ৰযুক্তি, উদ্ভাৱন, সামুদ্ৰিক সহযোগিতা, শিক্ষা, আৰু অৰ্থনৈতিক সংযোগকে ধৰি মূল ক্ষেত্ৰত সুনিৰ্দিষ্ট ফলাফল দিছে।

উল্লেখযোগ্য যে চাইপ্ৰাছৰ ৰাষ্ট্ৰপতি চাৰিদিনীয়া ৰাজ্যিক ভ্ৰমণত ভাৰতত আছে। ইয়াৰ পূৰ্বে তেওঁ মুম্বাই ভ্ৰমণ কৰিছিল। কালি তেওঁ দিল্লীত উপস্থিত হয়। আজি তেওঁ জাতিৰ পিতা মহাত্মা গান্ধীৰ স্মৃতিসৌধত শ্ৰদ্ধাঞ্জলি জ্ঞাপন কৰে।

হিন্দুস্থান সমাচাৰ / মনোজ কুমাৰ শইকীয়া